Salamat gid sa imo interes sa pagreport sang mga hilikuton sang mga Saksi ni Jehova. Ini nga giya ginhanda para buligan ka sa spelling kag kahulugan sang ginagamit nga mga termino sang amon organisasyon. Kon may pamangkot ka parte sa topiko nga wala nabinagbinag sa sini nga giya, palihug kontaka ang branch office sang mga Saksi ni Jehova.

Ang Lalantawan Nagabantala sang Ginharian ni Jehova. Ang kompleto nga titulo sang panguna nga magasin nga ginabalhag kag ginapanagtag sang mga Saksi ni Jehova. Ginatawag man nga Ang Lalantawan. Ang ngalan sini naghalin sa ideya nga ini nga magasin nagabulig sa mga bumalasa nga mangin alisto sa pagbantay sa katumanan sang mga katuyuan sang Dios. (Mateo 24:42) Ang publiko nga edisyon sang Ang Lalantawan ginahatag sa mga interesado kag wala sing bayad. Ang tulun-an nga edisyon sang Ang Lalantawan ginagamit kada semana sa pamangkot kag sabat nga pagbinagbinag sa mga kongregasyon sa bilog nga kalibutan. Ang English nga edisyon nga The Watchtower, padayon nga ginabalhag sugod pa sang 1879 kag amo ini nga magasin ang pinakalapnag nga napanagtag kada bulan sa bilog nga kalibutan.

asembleya. Tan-awa ang:  sirkito nga asembleya.

Assembly Hall of Jehovah’s Witnesses. Isa ka daku nga lugar para sa pagsimba nga ginapanag-iyahan sang mga Saksi ni Jehova. Ginagamit ini sa dalagku nga mga pagtilipon sang mga kongregasyon sa isa ka lugar. Ginatawag man ini nga “Assembly Hall.”

Bag-ong Kalibutan nga Badbad sang Balaan nga Kasulatan. Ang kompleto nga titulo sang Hebreong Kasulatan (“Daan nga Katipan”) kag sang Griegong Kasulatan (“Bag-ong Katipan”) nga gin-translate kag ginbalhag sang mga Saksi ni Jehova. Puede man ini tawgon nga Bag-ong Kalibutan nga Badbad.

Bethel, Bethelite, Bethel family. Ang “Bethel” isa ka Hebreo nga tinaga nga nagakahulugan sang “Balay sang Dios.” Amo ini ang tawag sa mga pasilidad nga ginagamit sang mga Saksi ni Jehova para dumalahan kag suportahan ang ila base sa Biblia nga mga hilikuton sa kada pungsod ukon rehiyon. Ang mga Saksi nga nagaalagad sa sini nga mga pasilidad bahin sang organisasyon sang mga Saksi nga ginatawag nga mga “Bethelite.” Wala sila sing sueldo. Sa kabilugan, ginatawag sila nga “Bethel family” bangod pareho sang isa ka pamilya, nagaistar sila, nagasimba, kag updanay nga nagaobra sa sini nga mga pasilidad. Ang termino nga “Bethelite,” wala ginagamit para padunggan ang mga nagaobra diri.

Branch Committee. Kon may ginpatindog nga isa ka branch office, may ginatangdo dayon nga Branch Committee. Ginahuman ini sang tatlo ukon mas madamo pa nga mga gulang para magdumala sa mga hilikuton sang isa ka pungsod ukon mga pungsod nga sakop sina nga branch.

branch office. Ang pasilidad nga ginagamit sang Branch Committee para suportahan kag dumalahan ang relihioso nga mga hilikuton sang mga Saksi ni Jehova sa isa ka pungsod ukon mga pungsod. Kon kaisa ginatawag ini nga “branch.”

brother. Lalaki nga nabawtismuhan bilang isa sa mga Saksi ni Jehova. Gina-lowercase kon ginapatuhuyan ang madamo nga kauturan. Gina-capital naman ang una nga letra kon ginasugpon sa apelyido sang isa ka lalaki nga Saksi (halimbawa, Brother Smith). Wala ini ginagamit bilang pagpadungog. Pareho man sa sini ang pagtawag sa babayi nga Saksi (halimbawa, Sister Smith).

Gilead, Gilead School. Ginpalip-ot nga Watchtower Bible School of Gilead, nga ginsugdan sang 1943. Ang katuyuan sini sadto amo ang paghanas sa mga misyonero. Subong, lima ini ka bulan nga kurso sang pagtuon sa Biblia para sa mga Saksi ni Jehova nga gin-agda nga mag-eskwela sa sini nga eskwelahan. Lowercase ang “school” kon wala nagapatuhoy sa ngalan sang eskwelahan.

gulang. Hamtong sa espirituwal nga lalaki nga Saksi nga gintangdo nga magtudlo kag mag-atipan para sa kaayuhan sang kada isa sa kongregasyon. Dapat padayon nga masunod sang isa ka gulang ang mga kalipikasyon nga ginsambit sa Biblia sa 1 Timoteo 3:1-7; Tito 1:5-9; Santiago 3:17, 18; kag 1 Pedro 5:2. Ang mga gulang wala ginasuelduhan nga mga ministro kag indi man mga empleyado sang ila kongregasyon ukon sang bisan ano nga korporasyon sang mga Saksi ni Jehova. Ang kalabanan nga mga gulang nagaobra para suportahan ang ila kaugalingon kag ang ila pamilya. Ang mga Saksi wala natunga sa klero ukon lego nga mga grupo. Ini nga termino wala ginagamit para magpadungog.

 internasyonal nga kombension. Tatlo ka adlaw nga pagtinipon para magsimba kag magtuon sa Biblia nga gin-organisar sang mga Saksi ni Jehova. Ginahiwat ini kada pila ka tuig sa ginpili na nga daan nga mga siudad sa bilog nga kalibutan. Ang mga Saksi halin sa sarisari nga mga pungsod ginaagda nga magtambong sa sini bilang mga delegado. Ini nga kombension bukas sa publiko kag ang katuyuan sini amo nga buligan ang mga nag-attend nga mangin mas suod sa Dios kag sa pareho nila nga mga Saksi ni Jehova. Ang mga kombension masami ginahiwat sa gin-arkilahan nga mga pasilidad kag nagasugod sa Biernes asta sa Domingo. Wala ini sing bayad kag wala sang nagapangolekta.

Jehova. Base sa Biblia, amo ini ang personal nga ngalan sang labing gamhanan nga Dios kag Manunuga. (Salmo 83:18) Ang “Jehova” indi dapat paggamiton nga tawag (halimbawa, “Jehova na sia”) sa isa sa mga Saksi ni Jehova.

Jesucristo. Ang bugtong nga Anak sang Dios. (Juan 3:16) Para sa mga Saksi ni Jehova, ang ila Lider amo si Jesucristo kag ginatinguhaan nila nga sundon ang iya halimbawa kag himuon ang iya mga gintudlo. Para sa mga Saksi, sia man ang pinakabantog nga tawo nga nagkabuhi, ang pinakaimportante nga Saksi ni Jehova, kag ang isa nga gamiton ni Jehova nga Dios para luwason ang katawhan.—Isaias 9:6, 7; Bugna 1:5.

Kingdom Hall of Jehovah’s Witnesses. Lugar para sa pagsimba nga ginagamit sang isa ukon mas madamo pa nga kongregasyon. Pirme ini ginatawag nga “Kingdom Hall.” Palihug indi ini pagtawga nga “simbahan.”

kombension. Tan-awa ang:  internasyonal nga kombension kag  rehiyonal nga kombension.

kongregasyon. Isa ka naorganisar nga grupo sang mga Saksi nga regular nga nagatipon sa pagsimba. May grupo sang mga gulang nga gin-asayn para magdumala sang sarisari nga programa sang pagtudlo kag maghatag sang paggiya base sa Biblia para sa kongregasyon bilang grupo ukon bilang indibiduwal. Ang mga miting sa kongregasyon bukas sa publiko. Wala ini sing bayad kag wala sang nagapangolekta.

Magmata! Isa ka magasin nga ginahimo kag ginabalhag sang mga Saksi ni Jehova. Una ini nga ginhimo sa English sang 1919 kag gintawag nga The Golden Age, pero gintawag ini nga Consolation sang 1937. Ginpili ang titulo nga Awake! sugod sang Agosto 22, 1946, nga isyu. Ang ngalan nga Awake! ukon Magmata! sa Hiligaynon, ginpili para buligan ang mga bumalasa nga mabal-an nga nagakabuhi na kita sa importante nga mga tion base sa Biblia.

manugbantala. Isa nga nagaministeryo kag bahin sang kongregasyon sang mga Saksi ni Jehova. Nalakip sa kalipikasyon para mangin manugbantala amo ang paghangop kag pagpati sa panguna nga mga panudlo sang Biblia kag pagkabuhi base sa mga prinsipio sang Dios. Ang mga manugbantala wala ginasuelduhan sa ila pagministeryo kag indi man sila empleyado sang ila kongregasyon ukon sang bisan ano nga korporasyon sang mga Saksi ni Jehova. Ini nga termino wala ginagamit para magpadungog.

manugtatap sang sirkito. Isa ka eksperiensiado nga gulang nga nagaalagad sa direksion sang branch office (upod sa iya asawa, kon may asawa sia). Regular sia nga nagabisita sa kada kongregasyon sa sirkito, sa masami duha ka beses kada tuig. Ginapalig-on niya ang mga kauturan sa kada kongregasyon. Ginapalig-on man niya kag ginahatagan sang direksion ang mga gulang kag ang mga ministeryal nga alagad. Ang manugtatap sang sirkito nagahanda sing instruksion base sa kinahanglanon sang kada kongregasyon. Ini nga termino wala ginagamit para magpadungog.

Memoryal sang kamatayon sang Cristo. Ang pagdumdom sang kamatayon ni Jesucristo nga ginahiwat kada tuig. Ginatawag man ini nga Panihapon sang Ginuo, ang Katapusan nga Panihapon, ang Memoryal, ukon ang Memoryal sang kamatayon ni Jesus. Para sa mga Saksi ni Jehova amo ini ang pinakaimportante nga okasyon sang tuig kag amo lang ini nga seremonya ang ginsugo sang Cristo nga selebrahon sang iya mga sumulunod.—Lucas 22:19, 20.

 Mga Saksi ni Jehova. Isa ka grupo sang mga Cristiano nga nagasimba kay Jehova nga Dios kag nagagamit sang ila tion para suportahan ang pagtudlo sang Biblia sa sarisari nga paagi. Ang katuyuan sang ila pagpanudlo sang Biblia amo ang pagsugid sang maayong balita sang Ginharian sang Dios ukon gobierno sang Dios. (Mateo 24:14) Lain sila sangsa iban nga relihion bangod sang ila ngalan, indi lamang bangod nagapatuhoy ini sa isa nga ila ginarepresentar kundi pati man sa boluntaryo nga hilikuton nga ila ginahimo para sa ngalan sang Dios. Ang isa ka tawo mangin isa lang sa mga Saksi ni Jehova kon bastante na ang iya naintiendihan sa mga panudlo sang Biblia, kon kalipikado na sia nga magbantala kag bahin na sang kongregasyon sang mga Saksi ni Jehova, kag kon nabawtismuhan na sia bilang simbulo sang iya personal nga dedikasyon kay Jehova nga Dios. Kon sambiton sa isa ka artikulo dapat opisyal kag kompleto nga ngalan ang gamiton sa una nga pagsambit sini, “Mga Saksi ni Jehova.” Ukon puede man gamiton “ang mga Saksi.” Kon nagapatuhoy sa indibiduwal, gamita ang “isa ka Saksi” ukon “isa sa mga Saksi ni Jehova.”—Isaias 43:10.

midweek meeting. Isa ka miting sang kongregasyon nga ginahimo isa ka bes kada semana sa ginpili nga adlaw, halin Lunes asta Biernes, kag masami ginahiwat kon gab-i. Ini nga miting may tatlo ka bahin kag ginatawag ini nga Ang Aton Cristianong Pagkabuhi kag Pagministeryo, nga gindesinyo para buligan ang mga Saksi nga mangin mas maayo nga ministro sang Dios. Pareho sa iban nga mga miting sang mga Saksi ni Jehova, puede maka-attend sing face-to-face ukon paagi sa videoconference. Libre ini kag wala sang nagapangolekta.

ministeryal nga alagad. Isa ka Saksi nga lalaki nga hamtong sa espirituwal nga nagabulig sa mga gulang sa pag-atipan sang kongregasyon. Para mangin isa ka ministeryal nga alagad, dapat padayon niya nga ipakita ang kalipikasyon sa Biblia nga mabasa sa 1 Timoteo 3:8-10, 12, 13 kag sa Tito 2:2, 6-8. Ang ministeryal nga alagad nagaasikaso kag nagabulig sa importante nga mga hilikuton sang kongregasyon. Ang ministeryal nga alagad wala ginasuelduhan sa iya mga ginahimo kag indi man sia empleyado sang iya kongregasyon ukon sang bisan ano nga korporasyon sang mga Saksi ni Jehova. Ang kalabanan nga mga ministeryal nga alagad nagaobra para suportahan ang ila kaugalingon kag ang ila pamilya. Sa pagligad sang tion, ang pila ka ministeryal nga alagad mahimo mangin kalipikado nga mag-alagad bilang gulang. Ang termino wala ginagamit para magpadungog.

misyonero. Bawtismado nga Saksi nga gin-asayn sang Nagadumala nga Hubon sang mga Saksi ni Jehova sa sarisari nga lugar sa bilog nga kalibutan. Handa ang mga misyonero nga biyaan ang ila balay kag magsaylo sa iban nga pungsod para magbulig sa pagbantala sang maayong balita sang Ginharian.—Mateo 24:14.

Nagadumala nga Hubon sang mga Saksi ni Jehova. Isa ka gamay nga grupo sang mga gulang nga gintangdo para mag-atipan sa espirituwal nga kinahanglanon sang mga Saksi ni Jehova sa bilog nga kalibutan. Sa masami, ginapalip-ot sa “Nagadumala nga Hubon.” Sila ang direkta nga nagahanda sang base sa Biblia nga mga publikasyon. Bisan pa ang Nagadumala nga Hubon ang nagapanguna sa pag-organisar sang mga hilikuton sang mga Saksi sa bilog nga kalibutan, para sa ila si Jesucristo lang ang Lider sang mga Saksi ni Jehova. Ang mga opisina sang Nagadumala nga Hubon ara sa World Headquarters of Jehovah’s Witnesses sa Warwick, New York, U.S.A.

 pag-alagad sa latagon. Ang pagministeryo sang mga Saksi ni Jehova. Ginatuman nila ang sugo ni Jesus nga isugid ang “maayong balita sang Ginharian” sa tanan nga tawo “sa bug-os nga duta subong panaksi sa tanan nga pungsod.”—Mateo 24:14; 28:19.

pagbantala. Tan-awa ang:  pag-alagad sa latagon.

paghiliutod. Ang bilog kalibutan nga organisasyon sang mga Saksi ni Jehova (lalaki kag babayi).—1 Pedro 5:9.

payunir. Ang tawag sa isa ka bawtismado nga Saksi nga nagapanikasog nga gamiton ang insakto nga kadamuon sang oras sa pagministeryo. Masami nga amo sini ang ginpalip-ot nga tawag sa isa ka “regular nga payunir,” ukon sa isa nga nagagamit sang 600 ka oras kada tuig (50 ka oras kada bulan). Kon kaisa, amo man sini ang ginpalip-ot nga tawag sa “auxiliary payunir,” ukon sa isa nga nagagamit sang 15 ukon 30 ka oras sa isa ka bulan ukon sa sulod sang pila ka bulan. Ang mga payunir wala ginasuelduhan sa ila pagministeryo kag indi man sila empleyado sang ila kongregasyon ukon sang bisan ano nga korporasyon sang mga Saksi ni Jehova. Ang kalabanan nga mga payunir nagaobra para suportahan ang ila kaugalingon. Ang termino wala ginagamit para magpadungog.

 Public Meeting. Isa ka miting sang kongregasyon nga ginahimo kada semana kon weekend. Sa sini nga miting, may 30 minutos nga pamulongpulong base sa Biblia nga ginhanda para sa publiko. Sundan ini sang Pagtinuon sa Lalantawan, nga isa ka oras nga pamangkot kag sabat nga pagbinagbinag sang isa ka topiko nga base sa Biblia, gamit ang isa ka artikulo sa tulun-an nga edisyon sang Ang Lalantawan. Pareho sa iban nga mga miting sang mga Saksi ni Jehova, puede maka-attend sing face-to-face ukon paagi sa videoconference. Libre ini kag wala sang nagapangolekta.

rehiyonal nga kombension. Tatlo ka adlaw nga pagtilipon sang madamo nga kongregasyon sa isa ka lugar nga ginahiwat isa ka bes kada tuig, nga gindesinyo para mangin suod pa gid ang relasyon sa Dios. Bukas ini sa publiko. Ang programa nagalakip sang mga panugda nga makabulig sa mga nag-attend nga makabenepisyo sa laygay sang Biblia bisan ano man ang ila edad. May mga presentasyon man parte sa adlaw-adlaw nga sitwasyon kag mga istorya sa Biblia nga nagapakita kon paano sundon ang mga prinsipio sa Biblia. Ang mga kombension masami ginahiwat sa dalagku kag gin-arkilahan nga mga lugar pareho sang mga arena, stadium, kag mga convention center. Kon indi gid damo ang ma-attend sa isa ka rehiyonal nga kombension, puede ini hiwaton sa malapit nga Assembly Hall of Jehovah’s Witnesses. Sa masami, ang face-to-face nga mga sesyon nagasugod sa Biernes asta sa Domingo. Sang nagligad nga mga tinuig, nangin available man online ang rekording sini nga mga kombension. Pareho sa tanan nga miting sang mga Saksi ni Jehova, ang pag-attend wala sing bayad kag wala sang nagapangolekta.

 sirkito nga asembleya. Isa ka adlaw nga pagtinipon sang madamo nga kongregasyon sang mga Saksi ni Jehova nga ginahiwat duha ka beses kada tuig. Ang sirkito nga asembleya bukas sa publiko kag ginhanda para buligan ang mga tawo nga mangin malapit sa Dios. Ang programa nagalakip sang mga panugda nga makabulig sa mga nag-attend nga makabenepisyo sa laygay sang Biblia bisan ano man ang ila edad. May mga presentasyon man nga nagapakita kon paano sundon ang ginatudlo sang Biblia sa adlaw-adlaw nga kabuhi. Sa masami, ginahiwat ini sa mga Assembly Hall of Jehovah’s Witnesses. Pero puede man ini hiwaton sa gin-arkilahan nga mga pasilidad ukon matan-aw online. Ang iskedyul sang mga sesyon pirme nagatupa sa weekend. Ang tanan nga sesyon wala sing bayad kag wala sang nagapangolekta.

sirkito. Grupo sang mga kongregasyon sang mga Saksi ni Jehova sa isa ka lugar.

sister. Babayi nga nabawtismuhan bilang isa sa mga Saksi ni Jehova. Gina-lowercase kon ginapatuhuyan ang madamo nga kauturan. Gina-capital naman ang una nga letra kon ginasugpon sa apelyido sang isa ka babayi nga Saksi (halimbawa, Sister Smith). Wala ini ginagamit bilang pagpadungog. Pareho man sa sini ang ginagamit sa lalaki nga Saksi (halimbawa, Brother Smith).

NOTE: Kon nagareport parte sa mga Saksi ni Jehova, dapat sambiton ang kompleto nga ngalan sa una nga pagsambit sini. Para sa dugang nga impormasyon, tan-awa ang:  Mga Saksi ni Jehova.