Nyob rau tiam kawg no peb txhua tus yeej ntsib ntau yam kev nyuaj siab ntxhov plawv. Tej thaud, peb yuav xav tias peb tej kev nyuaj siab zoo li lub nra uas peb ev tsis taus li lawm. Txawm li ntawd los, yog peb tuav rawv peb leej txiv Yehauvas txhais tes, nws yeej yuav pab kom peb thev dhau. (Yaxayas 43:2, 4) Thaum peb ntsib kev nyuaj siab, peb yuav ua li cas thiaj nyob ze Yehauvas?

Thov Yehauvas. Yog peb qhia txhua tsav txhua yam hauv nruab siab rau Yehauvas, nws yeej yuav pab kom peb muaj lub siab tus thiab ua taus lub siab ntev thev.​—Filipis 4:6, 7; 1 Thexalaunikes 5:17.

Mus kev sib txoos. Niaj hnub niam no, haj yam tseem ceeb rau peb mus koom peb tej kev sib txoos thiab nrog cov kwv tij nkauj muam ua ke. (Henplais 10:24, 25) Yog peb ua zoo npaj rau tej kev sib txoos thiab tsa tes teb ces twb yog peb cia Yehauvas lub hwj huam pab peb ntag.​—Tshwmsim 2:29.

Mus tshaj tawm. Yog peb rau siab ntso mus tshaj tawm, yuav txhawb tau peb xav txog qhov zoo. Tsis tas li ntawd, peb haj tseem yuav sib raug zoo ntxiv nrog cov uas peb mus tshaj tawm thiab Yehauvas.​—1 Kauleethaus 3:5-10.

SAIB ZAJ YEEB YAJ KIAB YEHAUVAS YUAV QAWS KOJ CIA CES TEB COV LUS NO:

• Malus (Malu) ua li cas thiaj nyob ze Yehauvas thaum nws ntsib kev tsaus ntuj?

  Lus teb

• Phau Ntawv Nkauj 34:18 nplig tau peb li cas thaum peb ntsib kev ntxhov siab?

  Lus teb

• Zaj no qhia tias Yehauvas muaj peev xwm pab tau peb li cas?​—2 Kauleethaus 4:7

  Lus teb