Lub caij ua kevcai nco txog Yexus, zoo rau peb xav txog tej koob hmoov uas peb yuav txais los ntawm tus nqe txhiv. Ib qho koob hmoov ntawd yog txojkev sawv hauv qhov tuag rov los. Thaum Yehauvas xub tsim noob neej, nws tsis yog tsim kom txawj laus txawj tuag. Twb yog vim li ntawd, thaum muaj kev ploj kev tuag thiaj ua rau neeg nyuaj siab kawg nkaus li. (1Khl. 15:26) Thaum Laxalau tuag Yexus mob siab heev thiab nyuaj siab kawg. (Yh. 11:33-35) Yexus muaj lub siab xav ib yam li nws Leej Txiv. Yog li ntawd, peb thiaj paub tseeb tias Yehauvas mob siab peb thaum ib tug uas peb hlub tshua tas sim neej lawm. (Yh. 14:7) Yehauvas tos ntsoov lub caij uas nws yuav tsa cov tuag ciaj sawv rov los. Peb yeej tos ntsoov ib yam li ntawd thiab, puas yog?​—Yauj 14:14, 15.

Vajtswv Yehauvas nyiam kom txhua yam muaj chaw txawb chaw rau. Yog li ntawd, thaum nws tsa cov tuag ciaj sawv rov los, nws yuav ua zuj zus tsa. (1Khl. 14:33, 40) Nimno muaj ntees ploj ntees tuag, tiamsis thaum ntawd yuav muaj kev tos txais cov ciaj sawv rov los xwb. Tej lub sijhawm muaj kev nyuaj siab koj puas ua tib zoo xav txog txojkev sawv hauv qhov tuag rov los? (2Khl. 4:17, 18) Koj puas ua Yehauvas tsaug uas nws pub tus nqe txhiv rau noob neej? Koj puas zoo siab uas nws qhia tej yam zoo hauv phau Vajlugkub rau koj paub?​—Khaulauxi 3:15.

• Koj yuav zoo siab tos txais leejtwg?

• Cov neeg nyob hauv phau Vajlugkub, koj yuav zoo siab tos txais leejtwg?