Nyob hauv tej koom txoos, muaj cov uas twb ntseeg Yehauvas tau ntau xyoo los lawm. Peb yuav tau mus nrog lawv tham txog tej uas Yehauvas lub koom haum tau ua yav tas los, thiab Yehauvas tau pab lawv li cas thaum lawv ntsib kev nyuaj siab. Ua li no, peb thiaj paub seb lawv tso siab npaum li cas rau Yehauvas. Tsis tas li ntawd, kuj zoo rau peb caw lawv tuaj koom hmo uas peb tsev neeg pe hawm Vajtswv ua ke, peb thiaj yuav paub lawv zoo dua qub.

Yog tias koj twb teev tiam Yehauvas tau ntev lawm, qhia rau cov nyuam qhuav los ntseeg seb Yehauvas tau pab koj li cas. Zoo ib yam li Yakhauj thiab Yauxej, nkawd yeej qhia nkawd cov xeeb leej xeeb ntxwv txog tej yam uas Yehauvas tau ua. (Chivkeeb 48:21, 22; 50:24, 25) Tom qab no, Yehauvas kuj xav kom cov txiv tsev cob qhia lawv tej menyuam txog nws. (2 Kevcai 4:9, 10; Phau Ntawv Nkauj 78:4-7) Niaj hnub no los, cov ua niam ua txiv thiab lwm tus hauv lub koom txoos yuav tau qhia cov hluas txog tes haujlwm zoo kawg nkaus uas Yehauvas lub koom haum niaj hnub ua.

SAIB ZAJ YEEB YAJ KIAB TXHOB SIB CAIS THAUM NOM TSWV TXWV PEB TES HAUJLWM, TOM QAB NTAWD TEB COV LUS NUG NO:

• Nom tswv txwv peb tes haujlwm hauv tej lub tebchaws. Ua li, ceg Npe-ee hauv tebchaws Auxita (Austria) pab cov kwvtij li cas?

• Hauv tej tebchaws ntawd, cov kwvtij ua li cas lawv txojkev ntseeg thiaj ruaj khov?

• Vim li cas cov ntseeg hauv tebchaws Laumenias (Romania) tawm Yehauvas lub koom haum lawm, tiamsis ua li cas lawv thiaj rov qab los?

• Zaj yeeb yaj kiab no puas txhawb koj txojkev ntseeg?