Yog peb muaj hom phiaj peb thiaj tsis nkim peb lub dag lub zog thiab lub sij hawm. (1 Kauleethaus 9:26) Peb nyob rau tiam kawg lawm. Yog peb xav siv lub sij hawm kom muaj nqis, peb yuav tsum muaj hom phiaj. (Efexus 5:15, 16) Thaum peb tsev neeg los pe hawm ua ke, kuj zoo rau peb siv lub sij hawm ntawd los tham txog tej hom phiaj rau xyoo uas yuav los tom ntej. Thov Vajtswv kom nws pub tswv yim rau nej. (Yakaunpaus 1:5) Phau kawm no tseem yuav muaj lwm zaj uas yuav pab peb xaiv hom phiaj ntxiv.

Thaum nej tsev neeg los sab laj ua ke, xav seb sawv daws yuav koom tes li cas thiaj pab tau ib tug hauv nej tsev neeg los tho kev. Yog nws txhawj tsam nws qhia tsis tau 70 txoos teev, kuj zoo rau nws nrog ib tug tho kev uas tau ntshai li nws tham. (Pajlug 15:22) Caw tus tho kev tuaj koom hmo nej pe hawm ua ke thiab nrog nws tham seb nws ua li cas nws thiaj ua tau. Tom qab ntawd sau seb ib lub lim tiam twg nej yuav mus tshaj tawm pes tsawg txoos teev. Yog tias nej twb tho kev yav tas los lawm, rov ntsuas seb nej puas yuav rov qab tho kev tau.

Muab xav seb nej tsev neeg pab tho kev puas tau ib ob lub hlis los sis ntau tshaj ntawd. Yog koj laus los sis muaj mob muaj nkeeg, koj yeej tseem mus tshaj tawm tau me ntsis ua ib tug pab tho kev. Txawm koj ua hauj lwm los sis kawm ntawv los, koj yeej ua tau ib tug pab tho kev rau tej lub hlis uas muaj hnub so ntau dua los sis rau tej lub hlis uas muaj koob tsheej so. Xyuas seb koj yuav pab tho kev rau lub hli twg thiab sau seb koj yuav mus tshaj tawm hnub twg rau hnub twg.​—Pajlug 21:5.

SAIB ZAJ YEEB YAJ KIAB MUAJ LUB SIAB TUAB . . . COV THO KEV CES THAM TXOG LO LUS NO:

• Aumas (Aamand) lub neej qhia tias Yehauvas saib xyuas cov tho kev zoo npaum li cas?