Peb zoo siab kawg tias peb muaj ib phau ntawv loj thiab ib phau ntawv me tshiab los qhia Vajlugkub! Peb yeej thov Yehauvas foom koob hmoov kom peb mus coj tau coob tus los ua thwjtim ntxiv. (Mathais 28:18-20; 1 Kauleethaus 3:6-9) Ua li, peb yuav siv 2 phau ntawv no li cas?

Phau Nyob Kaj Siab Lug Mus Ib Txhis qhia txawv lwm phau uas peb tau siv yav tas los. Thaum koj qhia ib tug ua raws li no. *

• Nyeem ua ke thiab tham txog cov lus nug

• Yog tej nqe Vajlugkub twg hais “nyeem” ces mus nyeem thiab pab kom tus koj qhia nkag siab thiab xyaum coj li nqe ntawd

• Tso cov yeeb yaj kiab saib thiab tham txog cov lus nug

• Thaum qhia lawm qhia kom tag ib zaj

Thaum mus tshaj tawm muab phau me los sim seb tus neeg ntawd puas nyiam kawm tso. (Saib lub ntsiab me “ Thaum Mus Qhia Thawj Zaug Yuav Siv Phau Ntawv Me Nyob Kaj Siab Lug Mus Ib Txhis Li Cas.”) Yog koj qhia phau me tag es nws xav kawm ntxiv ces muab phau loj los qhia, pib ntawm zaj kawm 04 mus. Yog tias koj tabtom qhia phau “Nyob Hauv Vajtswv Txojkev Hlub” lossis phau Phau Vajlugkub Qhia Txog Dabtsi Tiag? rau ib tug ces muab nws hloov mus kawm phau Nyob Kaj Siab Lug Mus Ib Txhis. Saib seb zoo rau neb pib kawm zaj twg mus.

SAIB ZAJ YEEB YAJ KIAB ZOO SIAB TOS TXAIS KOJ LOS KAWM VAJLUGKUB, TOM QAB SAIB TAG TEB COV LUS NUG NO:

• Cov uas kawm yuav kawm tau dabtsi hauv phau ntawv no?

• Vim li cas zoo rau peb muab zaj yeeb yaj kiab no tso rau cov uas nyuam qhuav los kawm saib?

• Peb yuav txhawb tus kawm kom nws muaj hom phiaj thiab ncav cuag nws tej hom phiaj li cas?​—Mus saib lub ntsiab “ Tej Kev Kawm Thiab Hom Phiaj Hauv Ib Ntu Twg” ntawm sab 16