Tsis ntev tas los no, cov thawj coj, cov tshawb txuj ci, thiab cov neeg txawj ntse txog sab koos pis tawj, lawv tham txog tias lub koos pis tawj uas hu ua artificial intelligence (AI) a muaj peev xwm npaum li cas diam. Lawv lees tias lub koos pis tawj no yeej ua tau ntau yam zoo, tiam sis lawv kuj txhawj tsam tib neeg muab siv ua tej yam tsis zoo.

•   Nyob rau lub 5 Hlis tim 4, xyoo 2023, Kamala Harris, uas yog tus nom loj ob nyob hauv teb chaws Mekas hais tias, “AI yog lub koos pis tawj uas yuav muaj peev xwm pab tau tib neeg lub neej niaj hnub no . . . Txawm li los, tib neeg kuj tsis tso siab, vim tias AI muaj peev xwm yuav hla tej cai uas tej pej xeem muaj. Thaum muaj zoo li no ces yuav ua rau tej pej xeem ib leeg tsis ntseeg ib leeg siab thiab tsis ntseeg tej nom tej tswv siab.”

•   Nyob rau lub 5 Hlis tim 9, xyoo 2023, muaj ib pab kws kho mob uas nyob ntau lub teb chaws uas Frederik Federspiel yog tus coj, lawv sau ib zaj xov xwm hais tias, “Txawm tias lub koos pis tawj AI yuav pab tau tej yam kev kho mob kom zoo dua los kuj yuav ua tau lwm yam teeb meem thiab.” b

•   Nyob rau lub 5 Hlis tim 1, xyoo 2023, tsab ntawv xov xwm The New York Times hais tias, “Tib neeg yeej siv tau koos pis tawj AI los nthuav tawm tej yam uas tsis muaj tseeb. Thiab tom ntej no, yuav muab koos pis tawj AI los ua tib neeg tej hauj lwm ces tib neeg yuav tsis muaj hauj lwm ua. Cov tib neeg uas ua hauj lwm nyob sab koos pis tawj txhawj tias yog muaj li no tiag ces yuav ua teeb meem rau tib neeg.”

 Peb mam saib mus seb tib neeg yuav siv lub koos pis tawj AI los ua qhov zoo los sis ua qhov phem. Phau Vajlugkub hais li cas?

 Phau Vajlugkub qhia tias tib neeg tso siab tsis tau tias lwm tus yuav siv tej twj koos pis tawj tshiab thiab lwm yam uas lawv tsim tau los ua qhov zoo xwb.

1.  1. Txawm tib neeg xav ua rau qhov zoo xwb los, lawv twb tsis paub tias tsam ho yuav tsim tau teeb meem.

   •   ‘Muaj ib txoj kev uas neeg xav hais tias yog txoj zoo, tiam sis txoj ntawd coj mus raug kev ploj kev tuag.’​—Pajlug 14:12.

2.  2. Ib tug neeg yeej tsis paub seb lwm tus yuav coj qhov uas nws tsim tau mus ua qhov zoo los sis ua qhov phem.

   •   ‘Kuv yuav muab tej [uas kuv ua tau] tso tseg rau tus uas yuav los hloov kuv chaw, thiab leej twg yuav paub hais tias tus uas yuav los ntawd nws yog tus ntse los sis yog tus ruam? Txawm yog nws yuav zoo li cas los xij, nws yeej yuav tau tej uas kuv lub tswv yim khwv tau rau hauv qab ntuj no.’​—Tej Lus Qhia 2:18, 19.

 Vim peb tsis paub tias yuav muaj tshwm sim li cas, peb thiaj cheem tsum tus Tswv Tsim coj peb txoj hau kev.

 Peb tus Tswv Tsim cog lus tias nws yuav tsis cia tib neeg los sis tej koos pis tawj uas tib neeg tsim tau los ua kom lub ntiaj teb los sis noob neej puas tsuaj mus.

•   ‘Lub ntiaj teb nyob ruaj mus ib txhis.’​—Tej Lus Qhia 1:4.

•   ‘Cov ncaj ncees yuav tau lub teb chaws ua lawv teej lawv tug, thiab tau nyob rau hauv mus ib txhis.’​—Phau Ntawv Nkauj 37:29.

 Nyob hauv phau Vajlugkub, peb tus Tswv Tsim muaj tej lus taw qhia pab kom peb ua lub neej nyob kaj siab lug thiab nyob tso siab plhuav. Yog xav paub ntxiv seb phau Vajlugkub qhia li cas, mus nyeem zaj hu ua “Dabtsi Thiaj Yuav Ua Rau Peb Nyob Tso Siab Plhuav?” thiab zaj ua lus Askiv hu ua “A Real Hope for a Better Tomorrow.”