Lub 7 Hli xyoo 2022, muaj xov xwm tshaj tawm tias huab cua kub heev thoob ntiaj teb uas tsis tau pom dua li.

•   “Tib lub hlis no xwb, Suav Teb tau ceeb toom ob zaug rau 70 lub nroog tias yuav sov heev, yuav tau xyuam xim.”—Lub 7 Hli tim 25, 2022, CNN Wire Service.

•   “Hluav taws kub hav zoov thoob sab Yus Luv vim muaj huab cua kub heev dhau lawm.”—Lub 7 Hli tim 17, 2022, The Guardian.

•   “Ntau lub nroog thoob teb chaws U.S.A. huab cua tsis tau kub npaum li Hnub 7 no. Cov xeev uas nyob sab hnub tuaj, sab qab teb, thiab hauv plawv teb chaws U.S.A. muaj huab cua kub heev.”—Lub 7 Hli tim 24, 2022, The New York Times.

 Tej no ua pov thawj li cas? Yog tej huab cua tsuas kub zuj zus tuaj lawm xwb peb puas yuav nyob taus? Phau Vajlugkub hais li cas?

 Yeej qhia. Qhov uas huab cua hloov li no yeej muaj raws nkaus li phau Vajlugkub tau hais txog peb tiam. Yexus hais tias peb yuav pom “tej yam txaus ntshai heev.” (Lukas 21:11) Vim muaj huab cua kub zuj zus thoob ntiaj teb, coob tus thiaj ntshai tsam muaj ib hnub tib neeg yuav muab lub ntiaj teb ua puas tsuaj tas.

 Tsis muaj. Vajtswv tsim lub ntiaj teb rau tib neeg nyob mus ib txhis. (Phau Ntawv Nkauj 115:16; Tej Lus Qhia 1:4) Vajtswv yuav tsis cia tib neeg muab lub ntiaj teb no rhuav tshem. Nws cog tseg tias nws “yuav rhuav cov neeg uas ua rau lub ntiajteb no puastsuaj kom lawv puastsuaj mus.”—Tshwmsim 11:18.

 Ob zaj lus faj lem no qhia tias Vajtswv tau cog tseg li cas ntxiv:

•   “Tiaj suabpuam thiab lub tebchaws uas qhuav nkig nkuav yuav zoo siab heev, thiab yuav muaj paj tawg ntsa iab rau saum tej av qhuav.” (Yaxayas 35:1) Vajtswv yuav tsis cia lub ntiaj teb qhuav nkig nkuav, tiam sis nws yuav kho kom lub ntiaj teb rov ntsuab xwb xiab.

•   “Koj tso nag los ywg thaj av uas koj tsomkwm saib xyuas, koj ua rau thaj av ntawd rog thiab muaj chiv.” (Phau Ntawv Nkauj 65:9) Vajtswv yuav muab lub ntiaj teb kho ua ib lub vaj kaj siab.

 Yog xav paub ntxiv seb phau Vajlugkub hais li cas txog tej huab cua hloov, mus nyeem zaj “Climate Change and Our Future—What the Bible Says.”

 Yog xav paub ntxiv txog phau Vajlugkub tej lus cog tseg seb yuav muab lub ntiaj teb no kho li cas, mus nyeem zaj “Leej Twg Thiaj Txuag Tau Lub Ntiaj Teb?”