Nyob thoob ntiaj teb muaj coob tus tsis kam noj thiab siv tej yam uas los ntawm tsiaj ntau zuj zus tuaj lawm.

•   “Qhov uas coob tus tsis kam noj nqaij thiab tsis siv tej uas los ntawm tsiaj los, yog ib txoj kev xav thiab yog ib txoj kev ua neej uas lawv tsis kam ua phem rau tej tsiaj, tsis kam tua los noj, tsis kam siv tsiaj tej nqaij tawv los sis tej plaub los ua tsoos tsho hnav, thiab los ua lwm yam.”​—The Vegan Society.

 Ib yam ntxiv, tos ib txhia tsis xav noj nqaij los sis tsis siv tej uas los ntawm tsiaj los, twb yog vim lawv xav txuag lub ntiaj teb, xav kom lawv noj qab nyob zoo los sis vim yog lawv txoj kev ntseeg.

•   “Qhov uas tsis kam noj nqaij thiab tsis kam siv tej uas los ntawm tsiaj, txawv ntawm lwm txoj kev uas tsis kam noj tej yam ub yam no. Qhov uas lawv ua li no, lawv saib tam li yog ib txoj kev ntseeg, yog ib txoj kev txiav txim siab zoo, thiab yog ib txoj hauv kev uas lawv yuav siv los kho lub ntiaj teb kom zoo tuaj.”—Britannica Academic.

 Qhov uas tsis noj nqaij thiab tsis siv tej uas los ntawm tsiaj los puas daws tau tej teeb meem hauv ntiaj teb? Phau Vajlugkub hais li cas?

 Phau Vajlugkub qhia tias peb tus Tswv Tsim uas yog Vajtswv Yehauvas, a tsim neeg muaj hwj chim dua tsiaj thiab kom neeg kav tej tsiaj txhu. (Chivkeeb 1:27, 28) Ntev mus ntev tuaj, Vajtswv tso cai rau tib neeg noj tej tsiaj. (Chivkeeb 9:3) Tiam sis, Vajtswv txwv tsis pub kom neeg ua phem rau tej tsiaj.​—Pajlug 12:10.

 Phau Vajlugkub hais tias, peb yuav noj nqaij thiab tsis noj los nyob ntawm peb. b Txawm peb xaiv noj yam twg los, Vajtswv yeej pom peb txhua tus muaj nqis tib yam nkaus. (1 Kauleethaus 8:8) Peb ib leeg tsis txhob thuam ib leeg, tus twg yuav noj dab tsi los nyob ntawm nws tus kheej.​—Loos 14:3.

 Phau Vajlugkub qhia tias, ib tug yuav noj thiab coj lub neej zoo li cas los nws yeej kho tsis tau tej teeb meem hauv ntiaj teb no. Rau qhov tej teeb meem no yog chiv los ntawm tej nom tej tswv, tej laj mej pej xeem, thiab kev txom nyem nyiaj txiag, uas yeej tsis muaj ib tug neeg twg yuav kho tau li lawm. Phau Vajlugkub hais tias:

•   “Yam uas nkhaus lawm muab ua kom ncaj tsis tau.”​—Tej Lus Qhia 1:15.

 Peb tus Tswv Tsim yuav kho tej teeb meem uas los raug peb. Muaj tej lus piv txwv uas hais nyob hauv phau Vajlugkub qhia tias Vajtswv yuav kho li cas.

•   ‘Tom qab ntawd kuv pom lub ntuj tshiab thiab lub ntiaj teb tshiab. Lub ntuj qub thiab lub ntiaj teb qub twb ploj tas lawm, thiab dej hiav txwv los ploj tas ib yam nkaus.’​—Tshwmsim 21:1.

 Vajtswv yuav hloov tib neeg tej nom tswv los sis, “lub ntuj qub,” rau “lub ntuj tshiab,” uas yog lub Nceeg Vaj nyob saum ntuj. Nws lub Nceeg Vaj nyob saum ntuj yuav rhuav tshem “lub ntiaj teb qub,” uas yog cov neeg lim hiam, thiab yuav kav “lub ntiaj teb tshiab,” los sis cov uas txaus siab zwm rau nws txoj kev kav.

 Tsuas yog Vajtswv lub Nceeg Vaj xwb thiaj yuav pab tau tib neeg ua tau lub neej sib haum xeeb nrog tej tsiaj txhu thiab txuag tau lub ntiaj teb.​—Yaxayas 11:6-9.