Nyob thoob ntiaj teb muaj dej nyab loj heev los raug tib neeg. Cia peb mus nyeem ob peb zaj xov xwm uas hais txog qhov no:

•   Nyob rau lub 8 Hli tim 2, xyoo 2023 zaj xov xwm AP News hais tias, “Tau peb plaub hnub no, muaj nag los hlob heev nyob hauv lub tuam ceeb loj hauv teb chaws Suav, uas twb yuav luag tau 140 xyoo lawm uas tsis tau pom muaj li no. Los nag tau plaub hnub xwb, dej nyab txog 744.8 mis lis mev (millimeters) los sis siab dua 2 yav teg (29.3 inches).”

•   Nyob rau lub 8 Hli tim 3, xyoo 2023 tshooj TV Deutsche Welle tshaj tawm tias, “Hnub 4 (Thursday) yog hnub ob uas los kob nag cua daj cua dub hu ua Khanun, tau los nag thiab muaj cua hlob heev los raug Nyiv Pooj qab teb, ua rau ob tug neeg tau tas sim neej. . . . Tej zaum kob nag cua daj cua dub no yuav muaj nag siab txog li 0.6 mev (meters) los sis 2 yav teg (2 feet) nyob rau lub pov roob hauv plawv teb chaws Tais Vam (Taiwan).”

•   Nyob rau lub 7 Hli tim 24, xyoo 2023 tshooj TV BBC News tshaj tawm tias, “Ob hnub so dhau los no muaj dej los nyab lub xeev Nova Scotia vim muaj nag hlob heev nyob rau sab Kanada (Canada) uas nyob npuas ntug hiav txwv Atlantic uas twb tau 50 xyoo no lawm tsis tau muaj dua.”

 Phau Vajlugkub qhia li cas txog tej xwm txheej no?

 Phau Vajlugkub qhia tias peb nyob rau ib lub sij hawm uas yog “tiam kawg.” (2 Timautes 3:1) Yexus twb qhia lawm tias nyob rau peb tiam no peb yuav pom “tej yam txaus ntshai heev,” los sis tej yam xwm txheej uas txaus ntshai kawg. (Lukas 21:11) Qhov uas huab cua hloov zuj zus thiaj ib sij ua rau muaj cua daj cua dub los nag hlob heev thiab tsis paub tias thaum twg yuav muaj tej huab cua phem.

 Phau Vajlugkub qhia tias tej xwm txheej uas txaus ntshai kawg los raug lub ntiaj teb niaj hnub nim no yuav tsum ua rau peb muaj kev cia siab. Yog vim li cas? Yexus hais tias, “thaum nej pom tej no ces nej yeej paub tias Vajtswv txoj kev kav twb los ze lawm.”​—Lukas 21:31; Mathais 24:3.

 Tej xwm uas peb pom no qhia tias tsis ntev tom ntej, Vajtswv lub Nceeg Vaj yuav los tswj txhua yam thiab kho tej huab cua thiab tej dej kom zoo.​—Yauj 36:27, 28; Phau Ntawv Nkauj 107:29.

 Yog xav paub ntxiv tias Vajtswv lub Nceeg Vaj yuav txhim kho lub ntiaj teb li cas mus nyeem zaj “Leej Twg Thiaj Txuag Tau Lub Ntiaj Teb?”