Vim kev ua tsov ua rog nyob hauv teb chaws Yus Khees (Ukraine), thiab muaj huab cua tsis zoo, thiaj tsis muaj txaus noj txaus haus nyob thoob ntiaj teb. Feem ntau, nyob rau cov teb chaws txom nyem tib neeg nrhiav tsis txaus noj tsis txaus haus.

•   “Tos tsis muaj zaub mov txaus noj los, twb vim yog muaj kev tsis sib haum xeeb, huab cua hloov zuj zus, tej nqi ub nqi no nce siab zuj zus tuaj, thiab muaj lwm yam.”—António Guterres UN secretary-general, Lub 7 Hli tim 17, 2023.

•   “Lub teb chaws Lav Xias (Russia) tsis kam xa tej khoom noj khoom haus tawm hauv teb chaws Yus Khees lawm. Qhov no ua rau cov neeg txawj ntse xav tias, yim huab yuav tsis muaj txaus noj txaus haus thiab khoom noj khoom haus yuav nce kim heev nyob rau tej teb chaws txom nyem xws li, Qaum Teb Afika thiab cov teb chaws nyob sab Midaus Ij (Middle East).”—Atalayar.com, lub 7 Hli tim 23, 2023.

 Phau Vajlugkub hais li cas txog tsis muaj txaus noj txaus haus thiab yav tom hauv ntej.

•   Yexus faj lem tias: “Yuav muaj ib haiv neeg sawv tawm tsam ib haiv neeg thiab ib lub teb chaws sawv tawm tsam ib lub teb chaws. Yuav muaj kev tshaib kev nqhis.”—Mathais 24:7.

•   Phau ntawv Tshwmsim hauv phau Vajlugkub ua lus piv txwv qhia txog plaub tug txiv neej uas caij nees. Ib tug uas caij nees ntawm plaub tug no yog piv txog kev tsov kev rog, hos tus uas lawv qab tus no yog qhia txog kev tshaib kev nqhis, uas yog ib lub sij hawm uas tsis muaj txaus noj txaus haus thiab tej khoom noj khoom haus yuav kim heev. “Kuv saib dheev, kuv pom ib tug txiv nees dub tawm plaws los. Tus uas caij tus txiv nees dub ntawd txhais tes tuav rawv ib rab teev. Kuv hnov ib lub suab . . . hais tias, ‘Yog yuav txhuv mas ib hnub twg ib taig txhuv, yog yuav pias ces ib hnub peb taig pias.’”—Tshwmsim 6:​5, 6.

 Tej lus faj lem uas qhia txog tsis muaj txaus noj txaus haus muaj tiav rau “tiam kawg” uas peb nyob no lawm tiag. (2 Timautes 3:1) Yog xav paub ntxiv txog “tiam kawg” thiab plaub tug txiv neej uas caij nees hais hauv phau Tshwmsim, mus saib zaj yeeb yaj kiab Txij Xyoo 1914 Los Lub Qab Ntuj No Tsis Zoo Li Qub Lawm thiab mus nyeem zaj ua lus Askiv hu ua “The Four Horsemen—Who Are They?”

•   Phau Vajlugkub muaj tej tswv yim uas yuav pab tau peb nyiaj taus tej kev nyuaj siab xws li, khoom noj khoom haus nce zuj zus tuaj los sis tsis muaj txaus noj txaus haus. Mus nyeem seb muaj tej yam twg pab tau peb ua lus Askiv hauv zaj hu ua “How to Live on Less.”

•   Phau Vajlugkub qhia tias peb muaj kev vam kev cia siab tias lub neej yav tom hauv ntej yeej yuav zoo tshaj tuaj. Phau Vajlugkub cog lus tias muaj ib hnub lub ntiaj teb yuav “muaj nplej ntsu nplua mias” thiab txhua tus yuav muaj txaus noj txaus haus. (Phau Ntawv Nkauj 72:16) Yog xav paub ntxiv tias yuav ua li cas peb thiaj tso siab tau thiab muaj kev cia siab rau yav tom hauv ntej, mus nyeem zaj ua lus Askiv hu ua “A Real Hope for a Better Tomorrow.”