Nyob rau xyoo 2022, cov nom tswv nyob thoob ntiaj teb muaj peev xwm siv nyiaj ntau heev txog li ntawm 2.24 tshuas yeem (trillion) nyiaj Mekas. Cov nyiaj no feem ntau yog siv mus pab tiv thaiv lub teb chaws Yus Khees thaum Lav Xias tuaj tua lub teb chaws ntawd. Raws li tsab xov xwm uas lub koom haum Stockholm International Peace Research Institute (SIPRI) hais tawm nyob rau lub 4 Hlis xyoo 2023, tias nyob rau xyoo 2022 tau muaj li no:

•   Tib xyoos ntawd xwb, qhov uas cov nom tswv nyob sab Yus Luv siv nyiaj rau lawv cov tub rog “nce 13 feem puas, nce ntau tshaj txhua xyoo uas lawv siv nyiaj txij thaum ua rog nyob rau xyoo 1991.”

•   “Lub teb chaws Lav Xias siv nyiaj nce txog kwv lam li 9.2 feem puas, lawv lub teb chaws yog lub peb uas siv nyiaj loj tshaj plaws ntawm lwm cov teb chaws nyob thoob ntiaj teb.”

•   Teb chaws Mekas yog lub teb chaws uas siv nyiaj txiag loj tshaj plaws rau lawv cov tub rog, “lawv kam siv txog li 39 feem puas uas yog ntau tshaj lwm cov teb chaws.”

 Tus txiv neej hu ua Nan Tian uas yog ib tug tshawb nhriav thiab sau xov xwm rau lub koom haum SIPRI hais li no tias, “Tau ob peb xyoos dhau los no, qhov uas cov nom tswv siv nyiaj txiag ntau zuj zus rau tej tub rog nyob thoob qab ntuj, yog ib lub cim qhia rau peb paub tias peb nyob rau ib lub sij hawm uas yim huab tsis muaj kev sib ntseeg siab.”

 Phau Vajlugkub qhia tias cov nom tswv uas muaj tub rog coob, ib leeg yuav ua teeb meem rau ib leeg thiab ib leeg yuav tawm tsam ib leeg. Tsis tas li ntawd, phau Vajlugkub kuj qhia tias leej twg xwb thiaj yuav ua tau kom tib neeg muaj kev thaj yeeb.

•   Phau Vajlugkub qhia tias lub caij lub nyoog uas peb nyob tam sim no yog ‘lub sij hawm kawg.’—Daniyees 8:19.

•   Phau Daniyees qhia tias thaum txog lub sij hawm kawg, tej nom tswv thoob ntiaj teb nyias yuav twv ntxhias tias nyias lub teb chaws muaj hwj chim tshaj. Qhov uas lawv twv ntxhias khav li no ua rau lawv muaj kev sib tawm tsam thiab xav txeeb ua tus kav. Txoj kev sib tawm tsam uas lawv muaj ntawd yuav ua rau lawv siv nyiaj siv txiaj tag lawm ntau heev.—Daniyees 11:40, 42, 43.

 Yog xav paub ntxiv txog zaj faj lem no hauv phau Vajlugkub, mus saib zaj yeeb yaj kiab hu ua Daniyees Tshooj 11 Muaj Tshwm Sim Li Cas.

•   Phau Vajlugkub qhia tias Vajtswv yuav muab tag nrho cov nom tswv hauv lub ntiaj teb no hloov. ‘Vajtswv tus uas nyob saum ntuj yuav tsa ib lub teb chaws uas yuav nyob mus tsis paub kawg li. Lub teb chaws ntawd yuav tsis muaj leej twg kov yeej nws, nws yuav rhuav tej teb chaws ntawd kom puas tsuaj tas, tiam sis nws yuav nyob mus ib txhis.’​—Daniyees 2:44.

•   Tshuav tsis ntev lawm xwb Vajtswv Yehauvas a yuav ua yam uas tib neeg ua tsis tau—yog ua kom muaj kev thaj yeeb mus ib txhis. Yuav muaj tau li no li cas? Vajtswv roog nom tswv uas nyob saum ntuj ceeb tsheej yuav rhuav tshem tag nrho tej cuab yeej ua tsov ua rog thiab rhuav tshem tag nrho txhua yam kev ua nruj ua tsiv.​—Phau Ntawv Nkauj 46:8, 9.

 Yog xav paub ntxiv seb Vajtswv lub Nceeg Vaj yuav ua tau dab tsi, mus nyeem zaj hu ua “‘Kev Siab Tus Muaj Nplua Mias’ Hauv Vajtswv Lub Nceeg Vaj”