CIA LI CEEV FAJ ZOV TOS!
Neeg Thoj Nam—Tsheej Plhom Leej Khiav Tawm Yus Khees Teb
Nyob rau lub 2 Hlis tim 24 xyoo 2022, teb chaws Lav Xias tau mus txeeb teb chaws Yus Khees (Ukraine) ua rau coob leej khiav tawm teb chaws txom nyem ntsuav. a
“Muaj hoob pob tawg nrov pig poog ua rau peb ntshai kawg nkaus li, kuv tsis paub yuav piav li. Thaum peb hnov tias muaj tsheb nqaj tuaj tos tib neeg khiav, peb thiaj txiav txim siab khiav thiab. Ib leeg tsuas nqa tau ib lub nyuag hnab xwb. Peb nqa tej ntaub ntawv tseem ceeb, tshuaj, dej, thiab me ntsis khoom txom ncauj xwb. Dua ntawd ces peb muab tso tseg tas, dhia mus caij tsheb nqaj lawm xwb. Lub sij hawm ntawd muaj hoob pob poob cuag cas los.”—Natalias, nyob lub nroog Khakiv teb chaws Yus Khees.
“Kuv yeej tsis xav tias yuav muaj tsov rog li. Kuv txawm hnov nrov poog tuaj tsis deb ntawm kuv ua rau tej qhov rais co cuag cas. Kuv thiaj txiav txim siab khiav. Kuv tsuas nqa tej yam tseem ceeb xwb. Kuv khiav thaum 8 teev sawv ntxov mus caij tsheb nqaj rau lub nroog Lu Viv ces mam caij npav mus rau teb chaws Phaulees.”—Nadiyas, nyob lub nroog Khakiv teb chaws Yus Khees.
Zaj no piav txog
Ua li cas thiaj muaj neeg thoj nam?
Cov neeg Yus Khees tau ua neeg thoj nam vim teb chaws Lav Xias mus txeeb lawv lub teb lub chaw. Tiam sis phau Vajlugkub qhia tias kuj muaj lwm yam uas ua rau tib neeg tawg ua sab ua sua ua neeg thoj nam thiab. Yog dab tsi?
Tib neeg tej tseem fwv pab tsis tau noob neej tiag. Ntau zaus tej nom tej tswv siv lawv lub hwj chim los caij tsuj pej xeem.—Tej Lus Qhia 4:1; 8:9.
Xatas Ntxwg Nyoog yog “tus uas kav lub ntiajteb.” Nws muaj peev xwm tshum kom tib neeg ua phem ua lim hiam. Phau Vajlugkub thiaj hais tias: “Lub ntiajteb huvsi nyob hauv tus uas Phem qab hwjchim.”—Yauhas 14:30; 1 Yauhas 5:19.
Ib tiam dhau ib tiam yeej muaj ntau yam teeb meem los raug noob neej. Tiam sis tam sim no peb nyob rau tiam uas phau Vajlugkub hais tias yog ‘tiam kawg thiab yuav yog lub sijhawm txom nyem nyuaj siab kawg.’ (2 Timautes 3:1) Tsis tas li ntawd xwb, tiam no yuav muaj kev tsov kev rog, huab cua phem, kev tshaib kev nqhis, thiab kab mob kev nkeeg. Tej no ua rau neeg tawg ua sab ua sua khiav rau ub rau no.—Lukas 21:10, 11.
Dab tsi thiaj pab tau cov neeg thoj nam muaj kev cia siab?
Phau Vajlugkub qhia tias tus Tswv Tsim uas yog Yehauvas b yog ib tug Vajtswv uas muaj kev hlub thiab hmov tshua cov neeg thoj nam thiab cov uas tawg ua sab ua sua tsis muaj vaj muaj tse nyob. (2 Kevcai 10:18) Nws cog lus tias nws yuav siv nws lub Nceeg Vaj uas yog nws lub tseem fwv saum ntuj los kho tej teeb meem uas ua rau tib neeg tawg ua sab ua sua ua neeg thoj nam. Nws lub tseem fwv yuav los pauv tib neeg tej tseem fwv huv si. (Daniyees 2:44; Mathais 6:10) Yehauvas yuav siv nws lub Nceeg Vaj los rhuav tshem Xatas Ntxwg Nyoog. (Loos 16:20) Vajtswv lub Nceeg Vaj yuav kav thoob ntiaj teb, yuav tsis muaj kev sib faib sib cais. Thoob ntiaj teb tib neeg yuav nyob sib koom siab li ib tse neeg lawm xwb. Yuav tsis muaj leej twg khiav rau ub rau no ntxiv lawm, vim phau Vajlugkub cog lus tias: “Txhua tus yuav nyob kaj siab lug ntawm nyias tej vaj txiv hmab, txiv ncuavpias, thiab yuav tsis muaj leejtwg ua rau nws tau kev txhawj kev ntshai li. Tus TSWV [Yehauvas] uas muaj Hwjchim Loj kawg nkaus tau coglus tseg li ntawd.”—Mikhas 4:4.
Tsuas yog Vajtswv lub Nceeg Vaj xwb thiaj kho tau tib neeg tej teeb meem niaj hnub nim no. Yehauvas yuav siv nws lub Nceeg Vaj los tshem tej teeb meem uas ua rau tib neeg tawg ua sab ua sua ua neeg thoj nam. Nws yuav tshem tej yam twg mus?
Kev tsov kev rog. “[Yehauvas] ua rau tej kev tsov kev rog hauv ntiajteb no tiaj tus.” (Phau Ntawv Nkauj 46:9) Mus nyeem zaj “Thoob Ntiajteb Yuav Muaj Kev Sib Haum Xeeb Tau Li Cas?” thiaj pom tias Vajtswv yuav ua kom muaj kev sib haum xeeb li cas.
Kev caij tsuj thiab kev lim hiam. “[Yehauvas] cawm lawv dim ntawm cov neeg tsimtxom thiab cov neeg limhiam.” (Phau Ntawv Nkauj 72:14) Txawm cov neeg lim hiam los yeej hloov tau. Yog xav paub seb ua li cas lawv ho hloov tau mus nyeem ntu “Kov Yeej Txoj Kev Sib Ntxub.”
Kev txom nyem. “[Yehauvas] cawm cov neeg pluag uas thov txog nws.” (Phau Ntawv Nkauj 72:12) Mus saib zaj “Is a Fair Economic System Possible?” ua lus Askiv seb Vajtswv yuav tshem kev txom nyem tawm li cas.
Kev Tshaib Nqhis. “Lub tebchaws ntawd muaj nplej ntsu nplua mias.” (Phau Ntawv Nkauj 72:16) Yog xav paub seb Vajtswv yuav pub kom txhua tus muaj txaus noj txaus haus li cas, mus saib zaj “A World Without Hunger?” ua lus Askiv.
Phau Vajlugkub puas pab tau cov neeg thoj nam?
Yeej pab tau. Phau Vajlugkub tsis yog pab kom cov neeg thoj nam muaj kev vam kev cia siab rau yav tom ntej xwb, tiam sis yeej pab tau lawv tam sim no thiab.
Vajlugkub tej hauv paus ntsiab lus: “Tus neeg ruam ntseeg txhua yam, tiamsis cov neeg ntse ua tib zoo xav lawv mam li ua.”—Pajlug 14:15.
Qhov no txhais tias: Npaj seb tej yam teeb meem twg yuav los raug koj thiab seb koj yuav tiv thaiv koj tus kheej li cas. Ceev faj tej neeg phem uas tsom ntxias cov neeg thoj nam uas khiav lwm teb chaws los.
Vajlugkub tej hauv paus ntsiab lus: “Yog li ntawd, yog peb muaj noj muaj hnav lawm, peb cia li txaus siab rau tej ntawd xwb.”—1 Timautes 6:8.
Qhov no txhais tias: Txhob pheej xav txog tej qhov txhia chaw. Yog koj txaus siab rau tej uas koj cheem tsum xwb, koj yuav zoo siab dua.
Vajlugkub tej hauv paus ntsiab lus: “Yog li ntawd, txhua yam uas nej xav kom lwm tus ua rau nej, nej yuav tsum ua ib yam li ntawd rau lawv thiab.”—Mathais 7:12.
Qhov no txhais tias: Ua siab ntev thiab xam pom lwm tus. Yog koj xyaum li no, zej zog yuav hwm thiab saib taus koj.
Vajlugkub tej hauv paus ntsiab lus: “Yog muaj leejtwg ua phem rau nej, nej tsis txhob ua phem pauj.”—Loos 12:17.
Qhov no txhais tias: Yog lwm tus ua phem rau koj, tsis txhob npau taws es ua phem pauj phem. Yog koj ua li ntawd tsuas yim huab tsim teeb meem xwb.
Vajlugkub tej hauv paus ntsiab lus: “Kuv thev taus tej no tib si vim Vajtswv pub dag pub zog rau kuv.”—Filipis 4:13.
Qhov no txhais tias: Txhua yam koj ua, nco ntsoov Vajtswv thiab thov nws pab. Nws yuav pub dag pub zog rau koj kom koj thev taus.
Vajlugkub tej hauv paus ntsiab lus: “Tsis txhob txhawj txog ib yam dab tsi li. Txawm zoo li cas los cia li thov Vajtswv, taij thov Nws, thiab ua Nws tsaug. Qhia txhua yam uas nej xav tau rau Vajtswv paub. Mas Vajtswv yuav pub nej muaj lub siab tus. Qhov ntawd yuav tsom kwm nej lub siab thiab nej txoj kev xav.”—Filipis 4:6, 7.
Qhov no txhais tias: Txawm koj ntsib teeb meem dab tsi los, thov kom Vajtswv muab lub siab tus rau koj. Mus saib zaj “Philippians 4:6, 7—‘Do Not Be Anxious About Anything’” ua lus Askiv.
a Hnub tom qab Lav Xias mus txeeb Yus Khees, lub koom haum saib xyuas neeg thoj nam (United Nations High Commissioner for Refugees [UNHCR]) muab qhov teeb meem no suav tias yog ib qho teeb meem loj kawg nkaus. Tau 12 hnub xwb twb muaj tshaj li 2 plhom tus neeg tau khiav Yus Khees teb mus rau cov teb chaws uas nyob ib ncig ntawd. Thiab muaj li 1 plhom tus tau khiav ua sab ua sua mus rau lwm qhov hauv teb chaws Yus Khees.
b Phau Vajlugkub qhia tias Vajtswv lub npe hu ua Yehauvas. (Phau Ntawv Nkauj 83:18, NWT ) Mus saib zaj “Who Is Jehovah?” ua lus Askiv.
Tej Yam No Yuav Pab Tau Koj Thiab
Teb Chaws Lav Xias Mus Txeeb Teb Chaws Yus Khees—Puas Yog Raws Li Phau Vajlugkub Tej Lus Faj Lem?
Nyeem seb phau Vajlugkub hais li cas txog tej xwm txheej no.
ESSENTIAL BIBLE TEACHINGS
Vajtswv Lub Nceeg Vaj Yog Dabtsi?
Thaum Yexus ua Vajtswv tes num, nws tham txog Vajtswv lub Nceeg Vaj heev dua lwm yam. Tau ntau pua xyoo, Yexus cov thwjtim thov Vajtswv kom lub Nceeg Vaj ntawd los.
LUS NUG THIAB LUS TEB TXOG PHAU VAJLUGKUB
Lub Ntiajteb Puas Yuav Raug Puam Tsuaj?
Phau Vajlugkub qhia tias Vajtswv tsim lub ntiajteb no muaj hauv paus hauv ntsis.
LUS NUG THIAB LUS TEB TXOG PHAU VAJLUGKUB
Ua Cas Lub Ntiajteb Tsis Muaj Kev Thaj Yeeb Li?
Txawm tibneeg yuav kho lub ntiajteb npaum li cas los yeej kho tsis tau kom muaj kev thaj yeeb li. Cia peb kawm seb yog vim li cas.
