Thoob qab ntuj, kev nom kev tswv cais tib neeg ua pab ua pawg. Nyob rau xyoo 2022, lub koom haum Pew Research Center tau tshawb pom tias “65 feem pua ntawm cov tib neeg uas nyob rau 19 lub teb chaws hais tias tib neeg tsis sib haum vim nyias txhawb nqa nyias roog nom tswv.”

 Koj puas pom tias kev nom kev tswv nyob rau koj thaj tsam tsuas ua rau tib neeg sib cais ntau zuj zus xwb? Vim li cas thiaj zoo li ntawd? Puas yuav daws tau qhov teeb meem no? Cia peb mus saib seb phau Vajlugkub hais li cas.

 Phau Vajlugkub qhia tias nyob rau peb lub sij hawm uas yog “lub sijhawm uas ntiajteb yuav kawg,” coob tus tib neeg yuav muaj tej cwj pwm uas yuav nyuaj heev rau tib neeg sib koom siab.

•   “Thaum lub sijhawm uas ntiajteb yuav kawg yuav muaj kev ntxhov siab heev. Rau qhov tej neeg nyias yuav xav txog nyias xwb, . . . tsis zam txim rau lwm tus.”​—2 Timautes 3:1-3.

 Txawm tib neeg yuav sib zog txhawb npaum li cas los tej tseem fwv yeej mus tsis taus. Tej nom tej tswv ib tog yeej hais tsis haum ib tog los mus tu tej teeb meem hauv lub teb chaws. Qhov no yeej mus raws li phau Vajlugkub tau hais ntev los lawm.

•   “Ib txhia muaj hwjchim thiab ib txhia raug txomnyem vim kev tswjhwm ntawm cov neeg muaj hwjchim.”—Tej Lus Qhia 8:9.

 Tiam sis phau Vajlugkub hais txog ib roog nom tswv uas tus kav yuav tshem tau tej teeb meem uas raug tib neeg niaj hnub nim no.

 Phau Vajlugkub qhia tias tus thawj coj uas tsim nyog ua tus kav yog Yexus Khetos. Yexus muaj lub hwj chim thiab lub siab los pab kom tib neeg muaj kev sib koom siab thiab muaj kev thaj yeeb.

•   “Thov kom tej kev ncaj ncees muaj nyob rau nws tiam, thiab thov kom muaj kev vammeej mus tsis tu.”—Phau Ntawv Nkauj 72:7.

•   “Txhua haivneeg yuav ua haujlwm rau nws.”​—Phau Ntawv Nkauj 72:11.

 Yexus yeej yog ib tug zoo thawj coj rau qhov nws mob siab thiab xav pab tib neeg, tshwj xeeb yog cov uas raug tej kev tsis ncaj ncees.

•   “Nws cawm cov neeg pluag uas thov txog nws, thiab cov neeg txomnyem uas tsis muaj leejtwg pab. Nws hlub tshua cov uas qaug zog thiab cov pluag, nws cawm cov neeg txomnyem txojsia. Nws cawm lawv dim ntawm cov neeg tsimtxom thiab cov neeg limhiam.”​—Phau Ntawv Nkauj 72:12-14.

 Mus kawm ntxiv txog Vajtswv lub Nceeg Vaj, uas yog lub tseem fwv saum ntuj uas Yexus yog tus kav. Mus saib seb Vajtswv lub Nceeg Vaj yuav pab tau koj li cas thiab seb koj yuav txhawb roog nom tswv ntawd li cas.

•   Saib zaj yeeb yaj kiab Vajtswv Lub Nceeg Vaj Yog Dabtsi?

•   Nyeem zaj “Vajtswv Lub Nceeg Vaj—Yog Lub Tseem Fwv Uas Ua Ncaj.”