Tej xov xwm uas peb hnov, tsuas hnov txog kev tsov kev rog, hnov tej lus ntxub ntxaug, ib leeg ua nruj ua tsiv rau ib leeg vim kev sib ntxub, thiab ua lim hiam rau luag vim luag yog luag ib haiv neeg.

•   Thaum lub 11 Hlis tim 15, xyoo 2023, ib zaj xov xwm qhia tias, “Vim kev tsov kev rog nyob hauv teb chaws Ixayees thiab lub nroog Kaxas, thiab vim cov tib neeg uas muaj kev ntxub ntxaug pheej txhawb kev sib ntxub tas zog, niaj hnub nim no, thiaj li ua rau tib neeg haj yam hais tej lus ntxub ntxaug hauv tej vej xaij zeem phooj ywg.

•   Thaum lub 11 Hlis tim 3, xyoo 2023, Dennis Francis, uas yog tus thawj coj thaum muaj kev sib tham nyob hauv lub koom haum UN hais tias,“Txij thaum lub 10 Hli tim 7 los, qhov uas ib tug xav phem thiab tsis nyiam ib tug los sis vim kev xaiv ntsej xaiv muag, cia li yim huab muaj kev ua nruj ua tsiv thiab muaj kev ntxub ntxaug ntau tshaj yav tag los.

 Tej lus ntxub ntxaug, kev ua nruj ua tsiv, thiab kev tsov kev rog yeej tsis yog nyuam qhuav muaj xwb. Qhov tseeb, phau Vajlugkub twb piav txog cov neeg yav thaum ub uas hais ‘tej lus zoo li lus iab lus daw zuag ib yam li tej xub vos’ thiab lawv tos tsis hnyoo yuav ua tsov ua rog thiab ua nruj ua tsiv. (Phau Ntawv Nkauj 64:3; 120:7; 140:1) Txawm li los, phau Vajlugkub kuj qhia tias txoj kev ntxub ntxaug niaj hnub nim no, yog ib lub sij hawm uas tseem ceeb kawg rau peb.

 Phau Vajlugkub qhia txog ob yam tias, vim li cas niaj hnub no thiaj li muaj kev sib ntxub ua luaj.

1.  1. Phau Vajlugkub qhia tias yuav muaj ib lub sij hawm thaum “coob tus txoj kev hlub yuav tsuag zuj zus mus.” (Mathais 24:12) Tib neeg yuav tsis muaj kev hlub, tiam sis lawv yuav coj tus cwj pwm uas ua rau ib leeg ntxub ib leeg.​—2 Timautes 3:1-5.

2.  2. Qhov uas tib neeg haj yam sib ntxub niaj hnub nim no, twb yog los ntawm Xatas uas yog Ntxwg Nyoog. Phau Vajlugkub qhia tias, ‘Dab Ntxwg Nyoog twb kav cov neeg uas nyob hauv ntiaj teb no lawm.’​—1 Yauhas 5:19; Tshwmsim 12:9, 12.

 Txawm li los, phau Vajlugkub kuj qhia tias tsis ntev tom ntej no, Vajtswv yuav rhuav tshem lub hauv paus uas chiv kev sib ntxub. Tsis tas li ntawd, Vajtswv yuav kho txhua yam kev txom nyem uas tsim los ntawm kev ntxub ntxaug. Phau Vajlugkub cog lus tias:

•   Vajtswv ‘yuav so lawv tej kua muag huv tib si mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm. Tej uas sawv daws ib txwm muaj los twb ploj tas lawm.’​—Tshwmsim 21:4.