Zaj Kawm 4

Dab Ntxwg Nyoog Yog Leejtwg?

Xatas Ntxwg Nyoog​—nws los qhovtwg los? (1, 2)

Xatas dag ntxias tib neeg li cas? (3-7)

Vim li cas koj thiaj yuav tsum tawmtsam Ntxwg Nyoog? (7)

1. Lo lus “ntxwg nyoog” pes tau tias yog ib tug neeg uas hais tej lus phem dag txog lwm tus neeg. “Xatas” pes tau tias yog ib tug yeebncuab los yog ib tug tiv txheem. Cov npe no yog tau muab tis rau Vajtswv tus tuam thawj yeebncuab. Thaum xub thawj, nws yog ib tug timtswv zoo tiav txhua yam nyob saum ntuj nrog Vajtswv. Tab sis tom qab ntawd ces nws khav txog rau nws tus kheej heev dhau thiab xav kom tau txojkev teev tiam uas yeej yog Vajtswv tug.​—Mathais 4:8-10.

2. Tus timtswv no, Xatas, tau siv ib tug nab los hais lus rau E-vas. Tim nws hais lus dag rau E-vas, nws yaum tau E-vas tsis mloog Vajtswv hais. Yog li no Xatas tau tawmtsam qhov uas hu tias yog Vajtswv lub “hwjchim kav,” los yog txeeb nws qhov chaw Loj Kawg Nkaus. Xatas tau nug tias ua li Vajtswv kav puas tsim nyog thiab puas nrog kev txaus siab ntawm Nws cov tsoom fwv. Xatas kuj tau tsa lo lus nug tias ua li puas yuav muaj ib tug tib neeg twg uas nrog nraim mloog Vajtswv lus. Vim tau ua tej no, Xatas tau muab nws tus kheej ua Vajtswv tus yeebncuab. Vim yog li ntawd thiaj tau hu nws ua Xatas Ntxwg Nyoog.​—Chivkeeb 3:1-5; Yauj 1:8-11; Tshwm Sim 12:9.

3. Xatas sim ntxias tib neeg kom los mus teev tiam nws. (2 Kaulinthaus 11:3, 14, NW ) Ib txojkev uas nws haub tib neeg yog los ntawm kev ntseeg cuav. Yog tias ib txojkev ntseeg qhia qhov dag txog Vajtswv, nws yeej yog leg Xatas tej num ntag. (Yauhas 8:44) Cov neeg uas koom nrog cov kev ntseeg cuav tej zaum lawv muaj siab dawb paug ntseeg tias lawv yeej yog teev tiam tus tseem Vajtswv. Tab sis qhov tseeb yog lawv tiam Xatas xwb. Nws yog ‘Vajtswv rau lub qab ntuj no.’​—2 Kaulinthaus 4:4, NW.

4. Kev coj dab kuj yog ib txojkev uas Xatas coj tib neeg los nyob rau hauv nws txojkev khoo. Tej zaum lawv yuav hu dab los povhwm lawv, los ua kom lwm tus mob, los qhia tau yav tom hauv ntej, lossis los ua tau txujci. Xatas yog lub zog phem npuab tuaj tom qab tagnrho tej kev xyaum no. Yuav ua kom Vajtswv zoo siab, peb yuav tsum tsis txhob muaj ib yam dabtsi txuam nrog tej kev coj dab.​—Kevcai 18:10-12, NW; Haujlwm 19:18, 19.

5. Xatas kuj haub tib neeg los ntawm txojkev khav theeb heev cais haiv neeg  thiab los ntawm kev teev hawm cov tsoom tseemfwv koom haum. Tej co xav tias lawv lub tebchaws lossis ib haiv neeg zoo dua lwm pab. Tab sis qhov no yeej tsis muaj tseeb. (Haujlwm 10:34, 35) Lwm tus neeg tso siab rau tej tseemfwv koom haum los mus kho tib neeg tej kev teeb meem. Vim ua li no, lawv tso tseg Vajtswv lub Nceeg Vaj. Nws yog tib txojkev kho rau peb tej teeb meem xwb.​—Danias 2:44, NW.

6. Lwm txojkev uas Xatas ntxias tib neeg mas yog muab txojkev ntshaw uas phem coj los sim. Yehau-vas qhia kom peb zam tej kev xyaum uas phem, rau qhov nws paub tias tej no yuav ua mob rau peb. (Kalatias 6:7, 8) Tej txhia tib neeg xav kom koj koom nrog lawv tej kev xyaum. Nco ntsoov, ov, Xatas yog tus uas xav kom koj ua tej no.​—1 Kaulinthaus 6:9, 10; 15:33.

7. Tej zaum Xatas yuav siv kev tsimtxom lossis kev cheem yuam kom koj khiav tawm ntawm Yehau-vas. Tej zaum qee tus neeg uas koj hlub yuav npau taws heev rau qhov vim koj kawm phau Vajlugkub. Ib txhia yuav thuam dag ntsuav rau koj. Tab sis koj tshuav nqe rau txojsia ntawm leejtwg? Xatas xav ua kom koj ntshai es koj tso tseg tsis txhob kawm txog Yehau-vas. Tsis txhob cia Xatas yeej! (Mathais 10:34-39; 1 Petus 5:8, 9) Qhov koj tawmtsam Ntxwg Nyoog, koj yuav ua tau rau Yehau-vas zoo siab thiab qhia tias koj txhawb Nws lub hwj chim kav.​—Paj Lug 27:11, NW.

[Duab nyob sab 9]

Kev ntseeg cuav, kev coj dab, thiab kev khav theeb cais nws haiv neeg ntxias neeg

[Duab nyob sab 9]

Kawm kom paub Yehau-vas zoo yuav tawmtsam tau Xatas