Zaj Kawm 11

Ntseeg Thiab Kevcai Uas Tsis Haum Vajtswv Siab

Yam ntseeg twg thiab kevcai dabtsi thiaj tsis yog? (1)

Ua li Khetias puas ntseeg tias Vajtswv yog pebleeg? (2)

Vim li cas cov Khetias thiaj tsis ua kev coj “Christmas,” “Easter,” lossis hnub yug? (3, 4)

Cov tuag ua mob puas tau rau cov ciaj? (5)

Yexus puas tuag rau saum tus ntoo khaub lig? (6)

Ua haum Vajtswv siab tseem ceeb npaum li cas? (7)

1. Tsis yog txhua yam ntseeg thiab txhua cov kevcai puavleej phem. Tab sis Vajtswv tsis pom zoo tej ntawd yog tias lawv los ntawm kev ntseeg cuav los los yog tawmtsam tej Vajlugkub qhia.​—Mathais 15:6, NW.

2. Pebleeg: Yehau-vas puas yog Pebleeg​—peb tug neeg ua ib tug Vajtswv? Tsis yog! Yehau-vas, Leej Txiv, yog “tib tug tseem Vajtswv.” (Yauhas 17:3, NW; Malakaus 12:29) Yexus yog Nws tus Tub xub yug, thiab nws hwm Vajtswv. (1 Kaulinthaus 11:3) Leej Txiv muaj hwjchim loj dua tus Tub. (Yauhas 14:28) Tus plig dawbhuv tsis yog ib tug neeg; nws yog Vajtswv lub hwjhuam.​—Chivkeeb 1:2; Haujlwm 2:18, NW.

3. “Christmas” Thiab “Easter”: Yexus tsis yog yug rau lub 12 hlis tim 25. Nws yug kwv yeej lis lub 10 hlis tim 1, lub sijhawm txhua xyoo uas cov tswv yug yaj tseg lawv cov yaj nyob rau nraum zoov hmo ntuj. (Lukas 2:8-12) Yexus yeej tsis tau hais kom Khetias ua kev lom zem rau nws hnub yug. Tiamsis, nws hais rau nws cov thwjtim kom nco rau nruab siab, los yog nco ntsoov, txog nws hnub tuag. (Lukas 22:19, 20) Christmas thiab nws cov kevcai yog los ntawm cov kev ntseeg cuav thaum ub. Cov kevcai Easter los kuj zoo tib yam li thiab, zoo li siv qe thiab luav. Cov Khetias ntxov thaum ub yeej tsis noj tsiab Christmas lossis Easter, cov tseem Khetias niaj hnub no los yeej tsis noj tib yam.

4. Hnub Yug: Tsuas muaj ob lub hnub yug kev lom zem uas hais nyob rau hauv phau Vajlugkub yog ua los ntawm cov neeg tsis teev Yehau-vas. (Chivkeeb  40:20-22; Malakaus 6:21, 22, 24-27) Cov Khetias ntxov thaum ub tsis ua kev lom zem rau hnub yug. Txojkevcai ua kev lom zem rau hnub yug yog los ntawm cov kev ntseeg cuav thaum ub. Tseem Khetias muab khoom plig thiab muaj kev lom zem uake rau lwm lub sijhawm rau ib xyoo.

5. Ntshai Cov Tuag: Cov tuag ua tsis tau dabtsi lossis tsis hnov dabtsi. Peb pab tsis tau lawv, thiab lawv ua tsis tau rau peb mob. (Phau Nkauj 146:4; Da-viv tus tub tej lus qhia 9:5, 10, NW ) Tus ntsuj tuag, nws yeej tsis ciaj sia nyob tom qab thaum tuag lawm. (Exakhees 18:4, NW ) Tab sis tej zaum cov tub timtswv phem, hu ua dab, ua txuj txia ua cov tuag tus plig. Txhua txojkevcai uas cov tib neeg ntshai los yog teev tiam cov tuag puavleej tsis yog.​—Yaxayas 8:19, NW.

6. Tus Ntoo Khaub Lig: Yexus tsis yog tuag saum tus ntoo khaub lig. Nws tuag rau saum tus ncej, lossis yav ntoo txhos sawv ntsug. Lo lus Greek txhais “ntoo khaub lig” nyob rau ntau phau Vajlugkub pes tau tias tsuas yog ib yav cav xwb. Qhov pov txwv ntawm tus ntoo khaub lig yog los ntawm cov kev ntseeg cuav thaum ub. Cov Khetias ntxov thaum ub tsis tau siv lossis tau muab tus ntoo khaub lig coj los teev. Yog li ntawd, koj puas xav tias yuav yog ib qho zoo uas siv tus ntoo khaub lig rau kev teevtiam?​—Kevcai 7:26, NW; 1 Kaulinthaus 10:14.

7. Tej zaum nws yuav nyuab heev tso yam ntseeg thiab tej kevcai no tseg. Kwvtij thiab phoojywg yuav sim ntsw kom koj tsis txhob hloov qub kev ntseeg. Tab sis ua haum Vajtswv siab tseem ceeb tshaj ua haum tib neeg siab.​—Paj Lug 29:25, NW; Mathais 10:36, 37.

[Duab nyob sab 22]

Vajtswv tsis yog Pebleeg

[Duab nyob sab 23]

“Christmas” thiab “Easter” los ntawm kev ntseeg cuav thaum ub

[Duab nyob sab 23]

Yeej tsis tsim nyog teev cov tuag lossis ntshai lawv li