Zaj Kawm 15

Pab Lwm Tus Ua Raws Vajtswv Siab Xav

Ua li cas thiaj qhia lwm tus txog tej koj tabtom kawm? (1)

Koj yuav qhia txoj moo zoo rau cov neeg twg? (2)

Koj tej kev coj kev ua muaj nqes li cas rau lwm tus? (2)

Thaum twg koj mam qhia tau Vajlugkub nrog lub koom txoos? (3)

1. Los txog rau tamsim no koj twb tau kawm ntau yam zoo nyob rau hauv phau Vajlugkub. Tej koj paub yuav tsum coj koj ua tus yamntxwv uas phim li ib tug Khetias. (Efexaus 4:22-24, NW ) Qhov uas koj paub mas tseem ceeb kawg rau koj yog tias koj xav kom tau txojsia mus ib txhis. (Yauhas 17:3) Tiamsis, lwm tus los yuav tsum tau hnov txoj moo zoo tib yam es thiaj cawm tau lawv thiab. Txhua tus tseem Khetias yuav tsum tau ua timkhawv qhia rau lwm tus. Qhov no yog Vajtswv txib.​—Loos 10:10, NW; 1 Kaulinthaus 9:16, NW; 1 Ti-mautes 4:16.

2. Koj pib qhia qhov zoo uas koj kawm tau rau cov nyob ze koj. Qhia rau koj tsev neeg, cov phoojywg, cov tub ntxhais kawm ntawv nrog koj, thiab cov neeg nrog koj ua haujlwm uake. Ua siab dav thiab siab ntev thaum koj qhia. (2 Ti-mautes 2:24, 25) Nco ntsoov tias tib neeg ntsia tej uas lwm tus coj thiab ua heev dua li lawv mloog tej yam nws hais. Li ntawd tej koj coj thiab ua yuav ua rau lwm tus los mloog txoj xov xwm koj qhia lawv.​—Mathais 5:16; 1 Petus 3:1, 2, 16.

3. Lub sijhawm tom ntej, tej zaum koj yuav xoos pib tshaj txoj moo zoo nrog lub koom txoos ntawm Yehau-vas Cov Timkhawv uas nyob ze koj. Qhov no yog ib qib tseem ceeb rau koj hlob zuj zus hauv txojkev ntseeg. (Mathais 24:14, NW ) Yuav yog ib qho zoo siab heev yog koj pab tau lwm tus los ua Yehau-vas ib tug tub txib thiab tau txojsia mus ib txhis!​—1 Thexalaunikes 2:19, 20, NW.