Zaj Kawm 10

Tej Kev Xyaum Uas Vajtswv Ntxub

Koj xav li cas rau tej yam uas Vajtswv hais tias phem? (1)

Hom kev sib deev dabtsi thiaj phiv? (2)

Khetias xav li cas rau kev dag? (3) twvtxiaj? (3) tubsab? (3) tsiv tsaim? (4) coj dab? (5) quav cawv? (6)

Yuav ua li cas ib tug neeg thiaj tseg tau tej kev xyaum phem? (7)

1. Vajtswv cov tub txib nyiam yam zoo. Tab sis lawv yuav tsum tau kawm ntxub yam phem. (Phau Nkauj 97:10, NW ) Qhov ntawd pes tias yuav tau zam tej yam kev xyaum uas Vajtswv ntxub. Tej kev xyaum no yog dabtsi?

2. Sib Deev: Sib deev ua ntej sib yuav, sib yuav lawm los tseem mus deev lwm tus, deev tsiaj, ua ntsaum, thiab txivneej deev txivneej tagnrho tej no yog kev txhaum loj heev rau Vajtswv. (Le-vis kevcai 18:6, NW; Loos 1:26, 27; 1 Kaulinthaus 6:9, 10) Yog tias ob tug neeg tseem tsis tau sib yuav tab sis nyob uake, nkawd yuav tsum tau sib cais los yog sib yuav kom raws txojcai.​—Henplais 13:4.

3. Kev Dag, Twvtxiaj, Tubsab: Vajtswv Yehau-vas yeej dag tsis tau. (Titaus 1:2) Cov neeg uas xav tau nws kev pom zoo yuav tsum zam kev dag. (Paj Lug 6:16-19; Khaulauxais 3:9, 10) Txhua txhua txojkev twvtxiaj yog tawm los ntawm kev siab hlob. Yog li ntawd Khetias tsis txhob koom nrog ib yam kev twvtxiaj dabtsi, xws li yuav leb, xeem nees, thiab  ua bingo. (Efexaus 5:3-5) Thiab Khetias tsis ua tubsab. Lawv tsis muas tej khoom uas paub tias tubsab nyiag los lossis yeej tsis lam nqa tej khoom uas tsis tau tso cai nqa.​—Khiav Dim 20:15; Efexaus 4:28.

4. Npau Taws, Tsiv Tsaim: Kev npau taws uas uv tsis tau yuav ua rau muaj kev sib ntaus. (Chivkeeb 4:5-8) Ib tug neeg tsiv tsaim ua tsis tau Vajtswv ib tug phoojywg. (Phau Nkauj 11:5; Paj Lug 22:24, 25, NW ) Nws yog ib qho txhaum uas rov pauj lossis rov qab ua phem rau yam phem uas tej zaum lwm tus tau ua rau peb.​—Paj Lug 24:29, NW; Loos 12:17-21.

5. Tso Dab thiab Coj Dab: Tej cov neeg hu lub zog ntawm tus plig los sim kho mob. Tej cov tso dab tom lawv cov yeebncuab ua kom lawv muaj mob lossis tua kom lawv tuag. Lub zog tuaj tom qab tej kev xyaum no yog Xatas. Yog li ntawd Khetias yuav tsum tsis txhob muaj ib yam dabtsi txuam nrog tej no. (Kevcai 18:9-13, NW ) Nyob ze rau Yehau-vas yog ib qho povhwm zoo heev tiv thaiv dab yog tej zaum lwm tus tau tso dab tom peb.​—Paj Lug 18:10, NW.

6. Quav Cawv: Yeej tsis txhaum yog tias haus me ntsis cawv txiv ntoo, beer, los yog lwm yam dej cawv. (Phau Nkauj 104:15; 1 Ti-mautes 5:23) Tab sis haus cawv ntau thiab qaug cawv yog txhaum nyob rau Vajtswv qhovmuag. (1 Kaulinthaus 5:11-13; 1 Ti-mautes 3:8) Haus cawv ntau yuav ua koj lub cev puas tsuaj thiab yuav ua rau koj tsev neeg tawg. Nws kuj yuav ua yoojyim rau koj qaug sai sai rau lwm yam kev haub ntxias.​—Paj Lug 23:20, 21, 29-35, NW.

7. Cov neeg uas xyaum tej yam Vajtswv hais tias phem yuav “tsis tau txais Vajtswv lub Nceeg Vaj.” (Kalatias 5:19-21, NW ) Yog tias koj hlub Vajtswv tiag tiag thiab xav ua kom haum nws siab, koj yeej thum tau tej kev xyaum no. (1 Yauhas 5:3, NW ) Kawm ntxub yam uas Vajtswv hais tias phem. (Loos 12:9) Koom nrog cov neeg uas muaj kev coj zoo. (Paj Lug 13:20) Phoojywg Khetias paub tab yuav pab tau koj. (Yakaunpaus 5:14) Tseem ceeb tshaj, vamkhom rau Vajtswv kev pab los ntawm kev thov.​—Filipis 4:6, 7, 13 NW.

[Duab nyob sab 20, 21]

Vajtswv ntxub quav cawv, tubsab, twvtxiaj, thiab tsiv tsaim