Zaj Kawm 7

Txav Ze rau Vajtswv Ntawm kev Thov

Vim li cas thiaj ho tseem ceeb yuav tsum thov Vajtswv tsis tu ncua? (1)

Peb yuav thov leejtwg, thiab yuav thov li cas? (2, 3)

Yam dabtsi thiaj haum rau peb thov? (4)

Thaum twg thiaj yog lub caij thov? (5, 6)

Vajtswv puas mloog txhua yam thov? (7)

1. Txojkev thov yog qhov ua siab muag nyoos hais lus rau Vajtswv. Koj yuav tsum thov Vajtswv tsis tu ncua. Yog li ntawd koj thiaj yuav txav ze nws xws li txav ze rau ib tug phoojywg hmov tshua. Yehau-vas zog loj tshaj plaws thiab muaj hwj huam heev, tab sis nws tseem mloog peb tej lus thov! Koj puas thov Vajtswv tsis tu ncua?​—Phau Nkauj 65:2; 1 Thexalaunikes 5:17.

2. Txojkev thov yog ib feem ntawm peb txoj kev teev. Yog li, peb yuav tsum thov Vajtswv Yehau-vas tib leeg xwb. Thaum Yexus  nyob ntiajteb no, nws tsuas tau thov nws Txiv xwb, tsis thov lwm tus li. Peb yuav tsum ua tib yam li. (Mathais 4:10; 6:9) Tiamsis, peb tej kev thov yuav tsum hais cob rau Yexus lub npe. Qhov no tau qhia tias peb hwm nws lub npe thiab peb muaj kev ntseeg tias nws txi theej peb lub txhoj.​—Yauhas 14:6; 1 Yauhas 2:1, 2.

3. Thaum peb thov peb yuav tsum hais lus rau Vajtswv tawm hauv nruab siab. Peb yuav tsum tsis txhob qog zaj qub los yog nyeem hauv ib phau ntawv qhia thov. (Mathais 6:7, 8) Peb yuav nyob li cas thov los tau tsuav yog saib rau nqi, thaum twg los tau, thiab nyob qhov chaw twg los tau. Vajtswv yeej hnov txawm yog ua twj ywm thov rau hauv peb nruab siab. (1 Xa-muyees 1:12, 13) Yog qhov zoo mas mus nrhiav tej qhov chaw ntsiag to tsis muaj neeg es mam hais tej lus ntawm peb ntiag tug thov.​—Malakaus 1:35.

4. Koj yuav thov txog yam dabtsi? Dabtsi los tau tsuav yog txhawb koj txojkev phoojywg nrog nws. (Filipis 4:6, 7) Qhov Yexus ua qauv thov qhia tias peb yuav tsum thov txog Yehau-vas lub npe thiab lub ntsiab. Peb kuj thov tau kom pab tej uas peb yuav tsum muaj siv, kom zam txim rau peb tej txhaum, thiab kom pab tiv thaiv peb ntawm tej kev haub ntxias. (Mathais 6:9-13) Peb tej lus thov yuav tsum txhob thov raws kev cuaj khaum. Peb yuav tsum thov txog tej yam uas haum Vajtswv lub siab nyiam xwb.​—1 Yauhas 5:14.

5. Thaum twg koj xav ua Vajtswv tsaug los yog xav qhuas nws ces koj cia li thov xwb. (1 Vajntxwv lub neej 29:10-13, NW ) Koj yuav tsum thov thaum koj muaj teeb meem thiab koj txojkev ntseeg raug sim. (Phau Nkauj 55:22, NW; 120:1) Nws yog ib qho zoo uas koj thov ua ntej koj noj mov. (Mathais 14:19) Yehau-vas caw peb thov rau “txhua lub sijhawm.”​—Efexaus 6:18.

6. Qhov tseem ceeb peb yuav tau thov mas yog thaum peb tau ua ib qho txhaum loj heev. Lub sijhawm ntawd peb yuav tsum tau txhos caug thov Yehau-vas txojkev khuv leej thiab zam txim. Yog peb lees qhia peb tej kev txhaum rau nws thiab yuj xeeb lias txhob ua dua ib zaug ntxiv lawm, Vajtswv yeej “nyob nres nroos tos zam lub txim xwb.”​—Phau Nkauj 86:5, NW; Paj Lug 28:13.

7. Yehau-vas tsuas mloog cov neeg ncaj ncees tej lus thov xwb. Yuav kom Vajtswv hnov koj tej lus thov, mas koj yuav tsum yuj xeeb lias ua lub neej nyob raws li nws txojcai. (Paj Lug 15:29; 28:9, NW ) Koj yuav tsum tau ua tus meejmom mluas thaum koj thov. (Lukas 18:9-14) Koj yuav tsum tau ua kom raws nkaus li tej koj thov. Ces koj yuav ua tau povthawj qhia tias koj muaj kev ntseeg thiab koj yeej ua tiag tiag raws li tej koj hais. Raws li ntawd Yehau-vas mam li teb koj tej lus thov.​—Henplais 11:6.