Zaj Kawm 5

Vajtswv Lub Ntsiab rau Ntiajteb Yog Dabtsi?

Vim li cas Yehau-vas ho tau tsim lub ntiajteb? (1, 2)

Vim li cas tamsim no lub ntiajteb thiaj tsis yog vajkajsiab? (3)

Cov neeg phem yuav raug dabtsi? (4)

Nyob rau yav tom hauv ntej, Yexus yuav ua dabtsi rau cov muaj mob? cov neeg laus? cov tuag? (5, 6)

Koj yuav tsum ua dabtsi, thiaj tau koob hmoov yav tom ntej? (7)

1. Yehau-vas tau tsim lub ntiajteb no kom tib neeg tau nyob xyiv fab ua neej mus ib txhis. Nws xav kom lub ntiajteb tsuas muaj cov neeg ncaj ncees, zoo siab nyob tas mus li. (Phau Nkauj 115:16; Yaxayas 45:18) Lub ntiajteb yeej tsis muaj ib hnub yuav puas tsuaj li, nws yuav nyob ruaj nreeg mus ib txhis.​—Phau Nkauj 104:5; Da-viv tus tub tej lus qhia 1:4.

2. Ua ntej Vajtswv tsim tib neeg, Nws xaiv ib thaj av me me ntawm lub ntiajteb thiab ua tau ib lub vajkajsiab zoo nkauj heev. Nws tau hu qhov chaw no ua lub vaj Edees. Qhov chaw no yog qho uas nws tso thawj tug txivneej thiab pojniam, Adas thiab E-vas. Vajtswv lub ntsiab rau nkawd mas kom muaj tubki coob coob thiab nyob mus puv lub ntiajteb. Zuj zus lawv yuav muab lub ntiajteb no tu thoob plaws kom zoo li ib lub vajkajsiab.​—Chivkeeb 1:28; 2:8, 15.

3. Adas thiab E-vas nkawd tau ua txhaum txhob txwm hla Vajtswv txojcai. Vim li ntawd Yehau-vas thiaj tau muab nkawd tshem tawm hauv lub vaj Edees. Lub vajkajsiab thiaj ploj lawm. (Chivkeeb 3:1-6, 23) Tab sis Yehau-vas yeej tsis hnov qab nws lub ntsiab rau lub ntiajteb. Nws cog lus tseg tias yuav tu kom lub ntiajteb zoo li ib lub vajkajsiab, uas tib neeg yuav nyob rau hauv mus ib txhis. Nws yuav kho li cas rau qhov no?​—Phau Nkauj 37:29.

4. Ua ntej lub ntiajteb no yuav txia ua ib lub vajkajsiab, cov neeg phem yuav tsum raug tshem tawm. (Phau Nkauj 37:38) Qhov no yuav muaj tshwm sim nyob rau A-makhedoos, uas yog Vajtswv ua rog kom kev phem kawg. Ntxiv ntawd, Xatas yuav raug coj mus kaw 1,000 xyoo. Qhov no pes tau tias yuav tsis muaj neeg phem los rhuav lub ntiajteb lawm. Tsuas yog Vajtswv cov neeg thiaj ciaj xwb.​—Tshwm Sim 16:14, 16; 20:1-3.

 5. Thaum ntawd Yexus Khetos mam kav lub ntiajteb xws li Vajntxwv mus 1,000 xyoo. (Tshwm Sim 20:6) Nws yuav tshem zuj zus txojkev txhaum hauv peb lub siab thiab lub cev. Peb yuav rov tig ua tib neeg zoo tiav ib yam li Adas thiab E-vas nkawd uas ua ntej nkawd tau ua txhaum. Thaum ntawd yuav tsis muaj kev mob, kev laus, thiab kev tuag lawm. Cov neeg muaj mob yuav zoo tuaj, thiab cov neeg laus yuav rov qab hluas dua.​—Yauj 33:25, NW; Yaxayas 33:24; Tshwm Sim 21:3, 4.

6. Thaum lub caij ib Txhiab Xyoo Kav los ntawm Yexus, cov tib neeg ntseeg uas raws nraim yuav ua num kho thoob lub ntiajteb kom yog ib lub vajkajsiab. (Lukas 23:43, NW ) Ntxiv nov, txheej vam leej neeg uas tuag lawm yuav tau tsa sawv los ua neeg nyob rau lub ntiajteb. (Haujlwm 24:15) Yog tias lawv ua kom muaj raws li Vajtswv xav kom lawv ua, lawv yuav tau nyob hauv lub ntiajteb no mus ib txhis. Yog tias tsis kam ua li ntawd, lawv yuav raug piam sij povtseg mus ib txhis. ​—Yauhas 5:28, 29; Tshwm Sim 20:11-15.

7. Vajtswv thawj thawj lub ntsiab rau lub ntiajteb mas yeej muaj tseeb. Koj puas xav koom nrog tej koob hmoov tom ntej no? Yog tias koj xav, koj yuav tsum tau rau siab kawm txog Yehau-vas thiab mloog yam nws kom koj ua. Mus koom tej kev sib ntsib hauv Tsev Nceeg Vaj ntawm Yehau-vas cov Timkhawv ntawm lub zos koj nyob yuav pab tau koj ua tej no.​—Yaxayas 11:9; Henplais 10:24, 25.

[Duab nyob sab 10]

Vajkajsiab ploj lawm

[Duab nyob sab 11]

Dhau A-makhedoos los, lub ntiajteb yuav muab pauv ua lub vajkajsiab