Zaj Kawm 2

Vajtswv Yog Leejtwg?

Tus tseem tseem Vajtswv yog leejtwg, thiab nws lub npe hu li cas? (1, 2)

Nws muaj lub cev zoo li cas? (3)

Nws cov yeebyam qhuas lug yog dabtsi? (4)

Puas tsim nyog peb siv mlom thiab pov txwv coj los teev tiam nws? (5)

Ob txojkev twg peb thiaj yuav kawm paub txog Vajtswv? (6)

1. Tib neeg teev tiam ntau ntau yam. Tab sis phau Vajlugkub qhia peb tias tsuas yog muaj tib tug TSEEM TSEEM Vajtswv. Nws yog tus tsim ib puas tsav yam nyob saum ntuj thiab nyob rau ntiajteb no. Rau qhov nws yog tus muab txojsia rau peb, nws tib leeg xwb thiaj li yog tus uas peb yuav tsum tau teev tiam.​—1 Kaulinthaus 8:5, 6; Tshwm Sim 4:11.

2. Vajtswv muaj ntau lub cim tab sis nws tsuas muaj tib lub npe xwb. Lub npe ntawd yog YEHAU-VAS. Nyob rau ntau phau Vajlugkub, Vajtswv lub npe muab tshem tawm lawm thiab muab lub cim tus Tswv lossis Vajtswv los tso rau. * Tab sis thaum sau phau Vajlugkub, lub npe Yehau-vas no muaj tshwm txog li 7,000 zaus!​—Khiav Dim 3:15, NW; Phau Nkauj 83:18, NW.

3. Yehau-vas muaj ib lub cev, tab sis nws tsis zoo li peb lub. Phau Vajlugkub hais  tias, “Vajtswv yog ib tug Plig.” (Yauhas 4:24, NW) Plig yog yam muaj txojsia muaj hwjchim tshaj peb. Tsis muaj ib tug tib neeg twg yuav pom tau Vajtswv dua ib zaug li. Yehau-vas nyob saum ntuj, tab sis nws yeej pom txhua yam. (Phau Nkauj 11:4, 5; Yauhas 1:18) Tus plig dawbhuv yog dabtsi? Nws tsis yog ib tug neeg zoo li Vajtswv. Tiamsis, nws yog Vajtswv lub hwj huam.​—Phau Nkauj 104:30, NW.

4. Phau Vajlugkub qhia tawm Yehau-vas tus yamntxwv rau peb. Nws qhia tias Vajtswv tej yeebyam qhuas lug mas yog kev hlub, kev ncaj ncees, muaj tswvyim, thiab muaj hwj huam. (Kevcai 32:4; Yauj 12:13, NW; Yaxayas 40:26, NW; 1 Yauhas 4:8) Phau Vajlugkub qhia rau peb tias nws khuv leej, siab zoo, zam txim, siab dav, thiab siab ntev uv. Peb, yuav tsum zoo li cov menyuam mloog mloog lus, yuav tsum sim xyaum taug nws qab.​—Efexaus 5:1, 2.

5. Ua peb puas pe lossis thov mlom, muab tej duab lossis tej pov txwv coj los teev tiam? Tsis tau! (Khiav-Dim 20:4, 5) Yehau-vas hais rau peb tias peb yuav tsum teev tiam nws tib leeg xwb. Nws yuav tsis pub leejtwg los yog ib yam dabtsi los koom nws lub hwjchim. Tej mlom yeej tsis muaj hwj huam yuav pab tau peb.​—Phau Nkauj 115:4-8; Yaxayas 42:8.

6. Yuav ua li cas peb thiaj paub Vajtswv zoo dua ntxiv? Ib qho mas yog saib tej yam nws tau tsim los lawm thiab ua tib zoo xav txog tej khoom ntawd seb nws qhia tau peb txog dabtsi. Tej Vajtswv tsim qhia rau peb tias nws yog ib tug muaj hwj huam loj thiab muaj tswvyim heev. Peb tau pom tias txhua yam nws tsim qhia tau tias nws yog ib tug neeg uas muaj lub siab hlub. (Phau Nkauj 19:1-6; Loos 1:20) Lwm txoj kev kawm kom paub Vajtswv mas yog peb kawm phau Vajlugkub. Nyob hauv phau Vajlugkub nws qhia rau peb ntau yam txog Vajtswv hais tias nws yog tus neeg zoo li cas. Nws kuj qhia rau peb txog nws lub ntsiab thiab qhia txog seb nws xav kom peb ua dabtsi.​—A-mauj 3:7; 2 Ti-mautes 3:16, 17.

[Cov lus hauv qab taw qhia]

[Duab nyob sab 5]

Peb kawm paub Vajtswv yog los ntawm nws tej kev tsim thiab los hauv phau Vajlugkub