Zaj Kawm 14

Yehau-vas Cov Timkhawv Coj Li Cas

Yehau-vas Cov Timkhawv niaj hnub no pib thaum twg los? (1)

Tej kev sib ntsib ntawm Yehau-vas Cov Timkhawv coj li cas? (2)

Lawv ua li cas them lawv tej nqi? (3)

Leejtwg ua tus coj nyob rau txhua lub koom txoos? (4)

Tej kev sib ntsib loj dabtsi muaj nyob txhua xyoo? (5)

Yam haujlwm dabtsi muaj nyob pem hauvpaus loj thiab cov ceg? (6)

1. Yehau-vas Cov Timkhawv niaj hnub no pib tsis ntev tom qab xyoo 1870. Thaum xub thawj, lawv hu ua Cov Tub Kawm Vajlugkub. Tiamsis nyob rau xyoo 1931 lawv tau txais lub npe Yehau-vas Cov Timkhawv. (Yaxayas 43:10) Thaum pib tsawg tiamsis lub koom haum kuj tau loj tuaj mus txog tsheej xeem tus Timkhawv, uas rau siab ntso qhia txoj moo zoo nyob thoob 230 tawm lub tebchaws.

2. Cov koom txoos feem coob ntawm Yehau-vas Cov Timkhawv muaj sib ntsib peb zaug rau txhua lub lim piam. Caw koj mus koom cov no lub twg los tau. (Henplais 10:24, 25) Phau Vajlugkub yog lub hauvpaus rau lawv kev qhia. Cov kev sib ntsib pib thiab xaus nrog kev thov. Tej “nkauj plig” hu tawm nruab siab los kuj hu nyob rau ntau qhov kev sib ntsib. (Efexaus 5:18, 19, NW ) Mus dawb xwb, thiab tsis cev tawb sau nyiaj.​—Mathais 10:8.

3. Cov koom txoos feem coob mus sib ntsib nyob rau hauv Tsev Nceeg Vaj. Cov tsev no feem ntau tsis loj thiab tsis muaj ub muaj no thiab yog sib pab tsa dawb los ntawm Cov Timkhawv. Koj yuav tsis pom mlom, ntoo khaub lig, los yog lwm yam zoo li tej no nyob  rau hauv Tsev Nceeg Vaj. Tej nqi yog them los ntawm cov nyiaj pab dawb. Cov uas xav tso nyiaj pab, los kuj muaj ib lub thawv paj tshab rau tso.​—2 Kaulinthaus 9:7.

4. Nyob rau txhua lub koom txoos, muaj cov txwjlaus, los yog cov saib xyuas. Lawv yog cov thawj coj qhia nyob rau hauv lub koom txoos. (1 Ti-mautes 3:1-7; 5:17, NW ) Lawv tau kev pab los ntawm cov tsobhwb. (1 Ti-mautes 3:8-10, 12, 13, NW ) Cov txivneej no yeej tsis tsa siab dua lwm tus nyob hauv lub koom txoos. (2 Kaulinthaus 1:24, NW ) Lawv yeej tsis muaj cim tseem ceeb rau sawvdaws hu. (Mathais 23:8-10) Lawv tsis hnav tej tsoos uas txawv tshaj lwm tus. Thiab luag tsis them nqi rau lawv tej haujlwm. Cov txwjlaus zoo siab hlo saib xyuas tej kev ntseeg uas nyob hauv lub koom txoos. Lawv pab kev nplij thiab kev coj qhia thaum lub sijhawm muaj kev nyuaj siab.​—Yakaunpaus 5:14-16; 1 Petus 5:2, 3.

5. Yehau-vas Cov Timkhawv kuj muaj kev koom sau loj rau txhua xyoo. Lub sijhawm no ntau lub koom txoos tuaj koom uake qhia cov nqe Vajlugkub tseem ceeb. Kevcai raus dej yog ib qho muaj tsis tu ncua rau cov thwjtim tshiab nyob rau cov kev koom sau no.​—Mathais 3:13-17; 28:19, 20.

6. Lub hauvpaus loj ntawm Yehau-vas Cov Timkhawv yog nyob rau New York. Pawg Tswjfwm nyob rau ntawd, Pawg Txwjlaus yog lub plawv paub zoo uas saib xyuas cov koom txoos thoob qabntuj. Kuj muaj tshaj li 100 ceg khiav haujlwm nyob thoob qabntuj. Nyob rau cov chaw no, cov neeg pab dawb nrog luam thiab xa tawm tej ntaub ntawv Vajlugkub. Muaj qhia lub hauv kev yuav mus tshaj tawm txoj moo zoo li cas. Ua koj puas xav mus xyuas ib ceg uas nyob ze koj?