Zaj Kawm 3

Yexus Khetos Yog Leejtwg?

Vim li cas thiaj hu Yexus ua Vajtswv tus Tub “xub yug”? (1)

Vim li cas thiaj hu nws ua “Lo Lus”? (1)

Vim li cas Yexus tau los rau ntiajteb xws li ib tug tib neeg? (2-4)

Vim li cas nws thiaj ua txujci? (5)

Yam dabtsi Yexus yuav ua nyob ze rau tom hauv ntej? (6)

1. Yexus tau nyob saum ntuj zoo li ib tug plig ua ntej nws nqis los rau ntiajteb. Nws yog tus uas Vajtswv tau xub xub tsim, yog li ntawd thiaj hu nws ua tus Tub ”xub yug” los ntawm Vajtswv. (Khaulauxais 1:15, NW; Tshwm Sim 3:14) Yexus yog tib tug Tub uas Vajtswv tus kheej tau tsim. Yehau-vas tau siv Yexus ua ntej nws tshwm los ua neeg xws li nws tus uas “muaj peevxwm leg num” uas tsim tagnrho lwm yam nyob saum ntuj thiab hauv ntiajteb. (Paj Lug 8:22-31, NW; Khaulauxais 1:16, 17) Vajtswv kuj siv nws tam li Nws tus tuam thawj cev lus. Yog vim li ntawd thiaj tau hu Yexus ua “Lo Lus.”​—Yauhas 1:1-3, NW; Tshwm Sim 19:13, NW.

2. Vajtswv tau xa Nws tus Tub los rau ntiajteb los mus hloov nws txojsia los xeeb rau hauv Maiv Liag lub tsev menyuam. Ces Yexus thiaj tsis muaj leej txiv uas yog noob neej. Vim li ntawd nws thiaj tsis tau txais txoj kev txhaum los yog zoo tsis tiav. Vajtswv tau xa Yexus los rau ntiajteb vim muaj peb lub ntsiab: (1) Los qhia peb qhov tseeb txog Vajtswv (Yauhas 18:37), (2) los tuav txoj kev ntseeg kom ruaj nreeg mus tiav tiav, tso tseg tau ib tug qauv rau peb taug (1 Petus 2:21, NW), thiab (3) los txi nws txojsia los yog tuag pauv kom peb dim ntawm kev txhaum thiab kev tuag. Vim li cas thiaj yuav tsum muaj tej ntawd?​—Mathais 20:28.

3. Vim tsis mloog Vajtswv lo lus qhia, thawj tug txivneej, Adas, tau ua puas rau qhov uas phau Vajlugkub hu ua “kev txhaum.” Vim li ntawd Vajtswv thiaj tau txiav txim rau nws mus txojkev tuag. (Chivkeeb 3:17-19) Nws ncav tsis cuag Vajtswv tej kevcai coj ntxiv, yog li nws thiaj tsis tiav lawm. Nws tau laus zuj zus thiab tuag. Adas, nws kis kev txhaum rau tagnrho nws tej xeebntxwv. Vim li ntawd peb thiaj txawj laus, txawj mob thiab txawj tuag. Yuav ua cas thiaj cawm tau noob neej?​—Loos 3:23; 5:12.

 4. Yexus yog ib tug neeg tsis muaj kev txhaum li Adas. Qhov nws tsis zoo li Adas, mas yog vim Yexus yeej ib txwm mloog Vajtswv lus txhua lo txawm tias nws tau raug kev txomnyem hnyav npaum li cas los xij. Yog vim li ntawd nws muaj peevxwm txi tau nws txojsia uas tiav them rau Adas txojkev txhaum. Qhov no yog qhov phau Vajlugkub hais txog tias “theej txhoj.” Yog muaj li no thiaj li tso tau Adas cov xeebntxwv dim ntawm lub txim tuag. Txhua tus neeg uas ntseeg Yexus lawv yuav dim lawv tej kev txhaum thiab yuav tau txais txojsia uas nyob mus ib txhis.​—1 Ti-mautes 2:5, 6, NW; Yauhas 3:16; Loos 5:18, 19.

5. Thaum nyob rau ntiajteb Yexus tau kho cov neeg mob, pub zaub mov rau cov tshaib plab, thiab ntaug tau nagxob nagcua. Nws haj tseem tsa tau cov tuag sawv rov qab muaj txojsia. Vim li cas nws thiaj ua tej txujci no? (1) Nws khuv leej cov neeg uas raug kev txomnyem thiab nws xav pab lawv. (2) Nws tej txujci ntawd qhia tau tias nws yog Vajtswv tus Tub. (3) Tej ntawm qhia tau tias yog yam uas nws yuav ua rau cov tib neeg mloog lus thaum nws los ua Vajntxwv kav lub ntiajteb.​—Mathais 14:14, NW; Malakaus 2:10-12; Yauhas 5:28, 29.

6. Yexus tau tuag tab sis Vajtswv twb tau tsa nws sawv los muaj lub cev plig, thiab nws rov qab mus saum ntuj. (1 Petus 3:18, NW) Txij thaum ntawd los txog tamsim no, Vajtswv tau muab nws tsa ua ib tug Vajntxwv lawm. Tsis ntev ces Yexus yuav tshem tagnrho txhua txojkev phem thiab kev txomnyem hauv lub ntiajteb no mus.​—Phau Nkauj 37:9-11; Paj Lug 2:21, 22, NW.

[Duab nyob sab 7]

Yexus txoj haujlwm xam tagnrho yog kev qhia, ua txujci, thiab haj tseem muab nws txojsia los txi rau peb