Zaj Kawm 1

Yuav Ua Li Cas Koj Thiaj Paub Tias Vajtswv Xav Kom Peb Ua Dabtsi?

Lus xov xwm tseem ceeb dabtsi muaj nyob hauv phau Vajlugkub? (1)

Leejtwg txawm tej lus hauv phau Vajlugkub? (2)

Yog vim li cas koj thiaj yuav tsum tau kawm phau Vajlugkub? (3)

1. Phau Vajlugkub yog ib qho khoom plig muaj nqi heev uas Vajtswv muab. Nws zoo li ib tsab ntawv uas leej txiv tau xa rau nws cov menyuam uas nws hlub. Nws qhia peb txog qhov tseeb ntawm Vajtswv​—seb nws yog leejtwg thiab nws txojkevcai li cas. Nws qhia tias yuav ua li cas thiaj kho tau tej kev ntxhov siab thiab thiaj nrhiav tau txojkev zoo siab. Tib phau Vajlugkub xwb thiaj qhia peb tias peb yuav tsum tau ua dabtsi es thiaj haum Vajtswv siab.​—Phau Nkauj 1:1-3; Yaxayas 48:17, 18.

2. Phau Vajlugkub yog muaj li 40 leej tib neeg sau hos siv sijhawm li 1,600 xyoo, pib nyob rau xyoo 1513 B.C.E. Nws muaj 66 phau ntawv me me. Vajtswv yog tus uas qhia rau lawv sau phau Vajlugkub. Lawv sau li Vajtswv lub siab xav, tsis yog li lawv lub siab xav. Ces yog Vajtswv tus nyob saum ntuj, tsis yog tib neeg nyob rau ntiajteb no, Txawm tej lus hauv phau Vajlugkub.​—2 Ti-mautes 3:16, 17; 2 Petus 1:20, 21.

3. Vajtswv ua tib zoo saib xyuas kom leejtwg sau phau Vajlugkub los kom sau raug raug thiab tseg tau cia. Phau Vajlugkub tau luam tawm ntau tshaj plaws lwm phau ntawv. Tsis yog txhua txhua tus neeg yuav zoo siab rau koj los kawm phau Vajlugkub, tab sis tsis txhob cia qhov no los cheem koj. Koj lub neej tom hauv ntej nyob mus ib txhis yog qhov vam khom rau tej kev paub txog Vajtswv thiab ua nws tej dejnum txawm tias muaj neeg tsis nyiam es cheem koj.​—Mathais 5:10-12; Yauhas 17:3.