Thaum peb tham txog Yehauvas, tej zaum tibneeg yuav luag peb thiab cem peb. Thaum zoo li no, peb yuav tsis xav tham txog Yehauvas ntxiv lawm. Puas tau muaj ib zaug uas koj xav tias koj yuav tsis tham txog Yehauvas ntxiv lawm?— Phau Vajlugkub qhia txog ib tug tub hluas uas hlub Yehauvas heev. Muaj ib zaug tus tub hluas no tau hais tias nws yuav tsis tham txog Yehauvas ntxiv li lawm. Tus tub hluas no yog Yelemi. Cia peb kawm ntxiv txog nws.

Thaum Yelemi tseem hluas, Yehauvas tau txib nws mus hais rau cov tibneeg kom lawv tsis txhob ua phem ntxiv lawm. Yelemi ntshai mus hais cov lus no rau cov tibneeg heev. Yog li ntawd, nws thiaj hais rau Yehauvas tias: ‘Kuv tsis paub yuav hais li cas, rau qhov kuv tseem hluas.’ Tiamsis  Yehauvas hais rau Yelemi tias: ‘Tsis txhob ntshai. Kuv mam li pab koj.’

Yog li ntawd, Yelemi thiaj mus hais rau cov tibneeg tias yog lawv pheej ua phem, Yehauvas yuav rau txim rau lawv. Koj xav cov tibneeg puas mloog Yelemi hais?— Lawv tsis mloog. Lawv luag thiab cem Yelemi heev. Muaj ib txhia tseem xav muab nws tua thiab! Koj xav Yelemi puas ntshai?— Yelemi ntshai heev. Yog li ntawd, nws thiaj hais tias: ‘Kuv yuav tsis tham txog Yehauvas ntxiv lawm.’ Tiamsis Yelemi puas ua li nws tau hais tiag?— Yelemi tsis ua, rau qhov nws hlub Yehauvas heev. Vim Yelemi pheej tham txog Yehauvas tas zog, Yehauvas thiaj tiv thaiv nws zoo heev.

Muaj ib zaug cov neeg phem muab Yelemi pov rau hauv ib lub qhov dej tob heev uas muaj av nkos puv nkaus. Yelemi tsis muaj mov noj lossis dej haus li. Cov neeg phem tso Yelemi nyob hauv lub qhov kom nws tuag. Tiamsis Yehauvas pab Yelemi, nws thiaj dim lawm.

Koj kawm tau dabtsi txog Yelemi?— Muaj tej thaum Yelemi kuj ntshai heev. Txawm li ntawd los, nws yeej tham txog Yehauvas tsis tseg. Thaum koj tham txog Yehauvas, tej zaum tibneeg yuav luag koj thiab cem koj. Qhov no yuav ua rau koj txaj muag thiab ntshai heev. Tiamsis koj yuav tsum tsis txhob ntshai tham txog Yehauvas. Yehauvas yeej yuav pab koj ib yam li nws twb pab Yelemi los lawm.