Xav txog qhov no: David tabtom tsav tsheb tiamsis nws mus yuam kev lawm. Nws saib tej npe kev thiab ib ncig ntawm nws txawv tas. Nws mam xav tias, ‘Kuv poob zoo lawm sav. Xyov kuv mus txog twg lawm lauj.’

Yog koj ne, koj yuav ua li cas xwb?

Koj yuav ua li cas?

1. Thov lwm tus pab qhia kev rau koj.

2. Mus saib daim ntawv qhia kev lossis lub twj taw kev GPS.

3. Tsav tsheb ncig mus ncig los seb puas nrhiav tau kev.

Yog koj ua li qhov 3, yuav nkim koj lub sijhawm xwb.

Yog koj ua li qhov 2, yuav zoo dua. Yog koj muaj daim ntawv qhia kev lossis lub twj taw kev GPS, ces koj mus qhovtwg los koj yuav tsis poob zoo li.

Phau Vajlugkub pab tau koj zoo ib yam li ntawd ntag!

Phau ntawv no yuav:

• pab tau koj thaum muaj kev nyuaj siab

• pab koj txawj tshuaj koj lub siab thiab ua tau tus neeg paub qab hau

• pab kom koj tau lub neej zoo tshaj plaws

Txij thaum peb xeev xwm los, peb yeej xav paub txog ntau yam.

• Ua li cas lub ntuj ho ntsuab ntsuab?

• Cov hnub qub yog dabtsi?

Thaum peb loj lawd, peb xav paub txog tej uas nyob puag ncig peb.

• Vim li cas ho muaj kev txom nyem?

• Vim li cas tibneeg ho txawj tuag?

Phau Vajlugkub puas teb tau cov lus nug no?

Coob leej hais tias phau Vajlugkub tsuas yog dab neeg xwb. Yog sau rau cov neeg txheej thaum ub xwb, ib txhia tsis nyeem rau qhov lawv xav tias nyuaj to taub heev. Puas yog li lawv xav ntawd tiag, los yog tibneeg xav yuam kev txog phau Vajlugkub lawm? Puas yog leejtwg qhia yuam kev rau lawv lawd?

Coob leej xav tias phau Vajlugkub qhia tias Vajtswv yog tus kav lub ntiajteb no. Tiamsis puas yog li lawv xav? Yog tias muaj li ntawd, ua cas ho muaj kev kub ntxhov ua luaj? Muaj kev nyuaj siab ntxhov plawv thiab kev txom nyem txhua qhov, kev mob kev nkeeg thiab kev ploj kev tuag, kev tshaib kev nqhis thiab tej huab cua phem. Vajtswv hlub tibneeg ua luaj, nws puas yuav tsim tej kev kub ntxhov no?

Koj puas xav paub seb leejtwg tsim tej kev kub ntxhov no? Thaum koj kawm tias phau Vajlugkub qhia li cas, koj yuav xav tsis thoob li!

Tej uas nyob hauv phau ntawv no yog rho hauv phau Vajlugkub los. Yehauvas Cov Timkhawv ntseeg ruaj nreeg tias phau Vajlugkub pab tau peb lub neej tiag. Lawv ntseeg li ntawd vim tias “txhua nqe yog tawm hauv Vajtswv lub qhov ncauj los thiab siv tau qhuab qhia, qhuab ntuas, qhia tus uas txhaum rov ua zoo.” (2 Timaute 3:16, 17) Yeej tsim nyog koj nyeem phau Vajlugkub rau qhov tseem pab tau koj lub neej tamsim no!