Nyob Zoo Txog Cov Kwv Tij Nkauj Muam:

Kev hlub rau Vajtswv thiab tib neeg yog qhov uas txhawb peb xav ua raws li Mathais 28:19, 20 uas hais tias, ‘Cia li mus coj txhua haiv neeg los ua kuv cov thwj tim thiab muab lawv ua kev cai raus dej.’ (Malakaus 12:28-31) Yog peb muaj txoj kev hlub uas tsis xam pom yus tus kheej nkaus xwb ces yuav pab tau ‘txhua tus uas muaj lub siab xib rau Vajtswv tau txoj sia ib txhis tsis kawg.’​—Tes Hauj Lwm 13:48.

Yav tas los, peb kheev cim cov qauv lus thiab tseb ntaub ntawv rau tib neeg xwb, tiam sis nim no peb xav xyaum kom peb txawj nrog tib neeg tham dua li tseb ntaub ntawv. Peb hlub tib neeg peb thiaj xav tham tej ntsiab uas lawv xav tham tiag tiag. Qhov no txhais tias peb yuav tau ua tib zoo xav thiab yoog raws li tus neeg uas peb nrog tham. Phau ntawv no lub hom phiaj yog tsim los pab peb kom ua tau raws li tau hais no.

Phau ntawv no muaj 12 zaj uas tham txog ib co yeeb yam peb yuav tau xyaum, xwv thiaj qhia tias peb hlub tib neeg thiab xav kom lawv los ua Yexus li thwj tim. Hauv txhua zaj peb yuav xyaum seb Yexus los sis cov nyob thawj ib puas xyoo muaj tus yeeb yam zoo li cas thaum mus tshaj tawm. Peb lub hom phiaj tsis yog cim kom tau tej lus uas peb yuav nrog luag tham xwb, tiam sis yog qhia tias peb yeej hlub tshua lawv tiag. Thaum peb mus tshaj tawm peb yeej yuav tau siv ib qho ntawm 12 qho yeeb yam no, tiam sis cov yeeb yam no nyias qhia nyias lawm ib seem. Xws li, thaum pib nrog luag tham pem, thaum rov mus xyuas los sis thaum qhia Vajlugkub.

Thaum nyeem ib zaj twg, ua tib zoo xav seb yuav xyaum qhov yeeb yam ntawd li cas koj thiaj paub nrog cov uas nyob hauv koj lub zej lub zos tham. Yeej meem peem tiag kom koj haj yam hlub Yehauvas thiab tib neeg. Txawm peb yuav txawj qhia npaum li cas los, kev hlub thiaj yog yam uas yuav pab tau peb coj tib neeg los ua Yexus cov thwj tim.

Yog ib qhov koob hmoov zoo tshaj plaws uas peb tau los nrog nej koom ib lub siab ua hauj lwm ua ke. (Xefaniyas 3:9) Thov Yehauvas foom koob hmoov nplua mias rau nej kom nej muaj lub siab hlub, thiab kub siab lug mus coj tib neeg los ua Yexus cov thwj tim!