Hmo ntawd Xaiv Nplooj los txog tsev, Kab Yeeb qhia tag nrho tej uas Mim tau hais rau nws. Tej uas Kab Yeeb hais ntawd ua rau Xaiv Nplooj xav paub heev, tiamsis Xaiv Nplooj twb hnov coob tus qhia txog lub neej kaj siab lug lawm. Tus yuav qhia li cas los muaj. Nws thiaj tsis tshua ntseeg tej uas Kab Yeeb hais. Thaum txog hnub 6 nws txawm mus nug Vam Thoj txog phau ntawv ntawd.

Vam Thoj hais rau Xaiv Nplooj tias: “Phau ntawv no hu ua phau Vajlugkub. Kuv niaj hnub nyeem phau ntawv no kuv thiaj pom tias qhia tau qhov tseeb tiag tiag li.”

Xaiv Nplooj qhia tej uas nws xav paub rau Vam Thoj. Nws hais tias: “Ua cas lub neej no muaj kev nyuaj siab ua luaj. Txawm haiv neeg twg los txom nyem tsis paub kawg li. Tsis tas li ntawd, tibneeg coj ntau txoj kevcai thiab muaj ntau lub tswvyim qhia tias yuav ua li cas thiaj nrhiav tau lub neej kaj siab tiamsis tsis muaj neeg tshem tau tej kev tsov tej kev rog, tej nom tswv los coj tsis ncaj, muaj kev xaiv ntsej xaiv muag, thiab kev txom nyem. Ua li phau ntawv kod puas qhia li lawv qhia thiab xwb?”

Vam Thoj thiaj nyeem ib nqes Vajlugkub ua rau Xaiv Nplooj tsis paub xav li. Nqe ntawd hais tias: “Ib txhia raug txomnyem vim kev tswjhwm ntawm cov neeg muaj hwjchim” thiab “tsis muaj leejtwg nws rov tswj nws lub neej.” Xaiv Nplooj pom tias yeej muaj tseeb li ntawd tiag. Txawm nyob hauv nws lub tebchaws, nyob hauv sab tebchaws Amelikas thiab Askiv los xij yeej coj ib yam li ntawd.

Vam Thoj piav rau Xaiv Nplooj ntxiv tias nws yeej ntseeg tau tej uas phau Vajlugkub qhia. Vam Thoj hais tias: “Phau Vajlugkub tsis yog muaj kev pab rau lub neej zoo li Mim hais rau  Kab Yeeb xwb, tiamsis tseem qhia tias noob neej tej teeb meem pib los li cas.” Nws hais ntxiv tias: “Koj puas paub, txawm phau Vajlugkub tsis yog ib phau ntawv uas qhia txhua yam txujci hauv ntiajteb los thaum hais txog tej txujci ntawd, yeej muaj tseeb tiag.”

Xaiv Nplooj tsis paub xyov puas muaj tseeb li ntawd tiag. Nws thiaj nug tias: “Phau Vajlugkub yog ib phau ntawv uas qub heev, puas yuav daws tau peb tej teeb meem thiab puas qhia raug tej txujci uas luag qhia nimno tiag?” Xaiv Nplooj kuj xav paub seb leejtwg yog tus sau phau Vajlugkub.

Vam Thoj thiaj piav tias: “Phau Vajlugkub muaj 66 phau ntawv me me thiab muaj li 40 tus txivneej sau. Lawv siv li 1,600 xyoo los sau. Phau ntawv no twb sau tiav li 1,900 xyoo dhau los lawm. Cov neeg uas sau phau Vajlugkub tsis yog neeg kawm txuj kawm ci, tiamsis txhua yam uas lawv sau muaj tseeb. Xws li, yav thaud tibneeg tsis paub zoo txog lub ntiajteb, tiamsis ib tug hauv phau Vajlugkub twb sau lawm tias muab lub ntiajteb tso rau ntawm qhov chaw uas [“khoob ntshuv,” TT ]. Puag tom qab no cov neeg tshawb txujci mam nrhiav pom tias tej uas Vajlugkub qhia muaj tseeb tiag.”

Thaum Xaiv Nplooj hnov tej no nws nyiam heev. Vam Thoj txawm piav ib zaj ntxiv ua rau Xaiv Nplooj hajyam xav tsis thoob.

Vam Thoj hais tias: “Thaum ub muaj ib lub tebchaws uas vam meej heev hu ua Npanpiloos. Phau Vajlugkub hais tseg ua ntej tias lub nroog yuav raug puam tsuaj. Phau Vajlugkub qhia meej tias lub nroog yuav poob li cas, thiab kuj qhia ntxiv tias tus vajntxwv twg yuav kov yeej. Ob puas xyoo tom qab no, txawm muaj tiav raws nkaus li ntawd tiag. Tsis yog tas zaj lus faj lem no xwb, phau Vajlugkub tseem muaj ntau zaj ntxiv.”

Thaum Xaiv Nplooj tabtom xav, Vam Thoj txawm hais tias: “Koj puas paub tias phau Vajlugkub twb qhia tseg li 1,900 xyoo  los lawm tias kev txom nyem yuav los raug peb sawvdaws?” Vam Thoj thiaj nyeem cov lus nram no rau Xaiv Nplooj:

• “Koj yuav tsum nco ntsoov hais tias thaum lub sijhawm uas ntiajteb yuav kawg yuav muaj kev ntxhov siab heev. Rau qhov tej neeg nyias yuav xav txog nyias xwb, lawv yuav xav tsis txog lwm tus li. Lawv yuav ntshaw nyiaj, yuav khavtheeb, yuav muab hlob, yuav tsis mloog niam txiv lus, yuav tsis ris luag txiaj ntsig, thiab yuav saib tsis taus Vajtswv txoj kevcai; lawv yuav tsis sib hlub, tsis zam txim rau lwm tus, nyiam taug xaiv, tsis tswj lawv lub siab, ua neeg tsivtsaim thiab tsis nyiam ua zoo; lawv yuav ua neeg ntxeev siab, ua neeg siab heev, thiab lawv saib lawv tsimtxiaj dua lwm tus; lawv nyiam kev lomzem heev dua nyiam Vajtswv. Lawv yuav hais tias lawv yog cov uas ntseeg Vajtswv. Tiamsis lawv yeej tsis ua raws li Vajtswv txoj kevcai.”

Vam Thoj hais rau Xaiv Nplooj tias tseem muaj ntau zaj lus faj lem hauv phau Vajlugkub uas hais txog kev txom nyem thoob qab ntuj, kev tsov kev rog, kev mob kev nkeeg, kev tshaib kev nqhis, av qeeg loj, thiab kev phem kev qias.

Xaiv Nplooj xav tsis thoob tias tej teeb meem uas nws thiab Kab Yeeb nkawd raug, twb sau tseg hauv phau Vajlugkub los lawm.

Xaiv Nplooj nyiam heev nws thiaj hais tias: “Phau ntawv no yog ib phau uas zoo heev!”