Kab Yeeb pom tias Vam Thoj thiab Mim nkawd tsev neeg nyob kaj siab lug tsis sib cav sib ceg. Kab Yeeb thiaj hais rau Xaiv Nplooj tias nws xav mus nug Mim seb vim li cas nkawd ho muaj kev sib haum xeeb. Yog li ntawd, Kab Yeeb thiaj mus nug Mim.

Mim teb Kab Yeeb tias: “Peb kuj muaj teeb meem, kev nyuaj siab ib yam li Xaiv Nplooj neb thiab. Tiamsis tsis ntev tas los no, kuv nrhiav tau ib phau ntawv uas pab tau kuv tsev neeg heev. Txawm niaj hnub no muaj kev txom nyem thiab kev nyuaj siab los phau ntawv no qhia peb ua neej kom nyob kaj siab lug tso siab plhuav.”

Mim cov lus ua rau Kab Yeeb xav paub ntxiv. Mim thiaj hais tias: “Phau ntawv no yog ib phau uas qub heev, tau sau nyob rau sab tebchaws Midaus Ij (Middle East) thiab sab Axia. Tiamsis phau ntawv no yeej pab tau txhua leej txhua tus, txawm yog haiv twg thiab coj kevcai dabtsi los xij. Phau ntawv no kuj tau muab txhais ua ntau pua yam lus thiab. Yog li ntawd, txhua tus yeej nrhiav tau ib phau los nyeem.” Mim hais ntxiv tias: “Cov kws qhia ntawv nyiam siv phau ntawv no heev. Tsis tas li ntawd xwb, ntau lub tebchaws siv phau ntawv no los rhawv tej kevcai lij choj los tu plaub tu ntug.”

Kab Yeeb xav tau phau ntawv no heev. Yav tav su nws mus tom Mim tsev ces Mim thiaj muab phau ntawv no los qhia rau nws. Mim piav cov ntsiab lus no:

• “Qhia menyuam kom paub ua nws lub neej, nws yuav nco ntsoov tej lus ntawd mus tas nws sim neej.”

• “Nej cov uas ua niam ua txiv, nej tsis txhob ua rau nej tej menyuam chim.”

• “Tus uas ibtxwm nyiag luag tug tsis txhob nyiag lawm. Nws khwv ntawm nws tes zoo dua, nws thiaj li yuav muaj yam ub yam no pab cov neeg txomnyem.”

• “Yog leejtwg tsis kam ua haujlwm, nej tsis txhob pub mov rau tus ntawd noj.”

• “Peb yuav tsum tso plhuav tej kev txhaum uas peb ua thiab peb xav huv tibsi tseg.”

• “Haus cawv ntau ua rau koj vwm thiab qw lom vab vab. Tsuas yog tus neeg ruam thiaj quav cawv xwb.”

• “Txojkev sib yuav yog ib qho uas tseemceeb, tsimnyog nej txhua tus yuav tsum saib taus qhov ntawd. Tus txiv thiab tus niam, ib tug yuav tsum ncaj ncees rau ib tug.”

• “Tsis txhob ua kev nkauj kev nraug.”

• “Yog leejtwg saib ib tug pojniam thiab xav deev tus pojniam ntawd, qhov uas nws saib li ntawd kuj txhaum ib yam li nws twb tau deev tus pojniam ntawd lawm ntag.”

• “Nej yuav tsum hwm nej niam nej txiv.”

• “Mloog koj txiv tej lus, yog tsis muaj nws yeej tsis muaj koj. Thaum koj niam laus lawm, koj yuav tsum pauj nws txiaj ntsig.”

• “Txhua tus txiv, nyias yuav tsum hlub nyias tus pojniam ib yam li nyias hlub nyias lub cev. Thiab txhua tus pojniam nyias yuav tsum hwm nyias tus txiv.”