Xaiv Nplooj nyuaj siab heev. * Nws ntxhov siab txog ntau yam. Twb ntev loo lawm uas Xaiv Nplooj xav tau ib txoj haujlwm them nyiaj ntau kom koob nws lub cuab lub yig. Nws xav kom nws tej metub menyuam kawm ntaub kawm ntawv thiaj tau lub neej zoo yav tom hauv ntej. Tiamsis tej uas nws xav tau ntawd tsis yoojyim li. Qhov uas nws ua tau ces tsuas yog saib xyuas nws tus kheej kom noj qab nyob zoo, txhob muaj mob muaj nkeeg, rau siab ntso khwv kom nws tsev neeg muaj noj muaj haus, thiab them tej nuj nqes. Tiamsis nws kuj txhawj tias yog muaj li cas raug nws lawd, leejtwg yuav saib xyuas nws tsev neeg?

Kab Yeeb uas yog niam Xaiv Nplooj kuj muaj kev nyuaj siab ib yam nkaus thiab. Ib ntus no nkawd hais lus tsis sib haum li. Kab Yeeb xav kom Xaiv Nplooj cob qhia tej metub menyuam mloog lus, paub hwm niam hwm txiv. Tiamsis Xaiv Nplooj khwv heev tsis muaj sijhawm cob qhia cov menyuam li. Kab Yeeb kuj txhawj qhov uas nkawd niaj hnub sib cav sib ceg rau menyuam hnov. Tsis tas li ntawd xwb, nws txhawj tias yog cov menyuam ib tug ho muaj mob xyov yuav ua li cas, yuav muab nyiaj qhov twg los kho. Kab Yeeb tsis xav kom raug tej teeb meem no li!

Xaiv Nplooj thiab Kab Yeeb nkawd kuj pom tias tej neeg zej zos tsis coj li yav thaud thiab. Lawv tsis muaj sijhawm thiab tsis sib pab li yav tas los. Nkawd tej txheeb ze thiab tej phoojywg los kuj muaj teeb meem ib yam nkaus. Lawv puavleej txhawj txog lub neej yav tom hauv ntej, thiab tsis muaj kev kaj siab li. Kab Yeeb xav tias yog muaj ib txojkev pab ntshe yuav  kaj siab dua. Xaiv Nplooj thiab Kab Yeeb nkawd siv zog tsav lub neej npaum li cas los mus tsis taus li.

Muaj ib hnub, Xaiv Nplooj thiab Kab Yeeb thiaj piav txog nkawd tej teeb meem.

Xaiv Nplooj hais tias: “Kheev lam muaj ib txoj hau kev los pab kom peb nyob kaj siab lug tso siab plhuav, ntshe yuav zoo heev li?”

Kab Yeeb teb tias: “Yog los mas! Kuv kuj xav li kod thiab. Yog muaj li ntawd, ntshe yuav kho tau wb tej teeb meem.”

Xaiv Nplooj teb tias “Tiamsis nimno muaj ntau txojkev ntseeg thiab ntau lub tswvyim cob qhia kom peb txawj ua neej. Yuav ua li cas wb thiaj nrhiav tau txoj uas nyob kaj siab lug tso siab plhuav? Wb yuav nrhiav kom mus thoob txhua txoj mas ntshe yuav laj nrhiav tau! Rau qhov nyias qhuas tias nyias txoj thiaj pab tau lub neej, tiamsis koj yeej xav tias ntshe tsis muaj ib txoj twg yuav hloov tau neeg lub neej li. Kuv saib mas mus nrhiav los tsis muaj qabhau dabtsi.”

Txawm Kab Yeeb xav ib yam li Xaiv Nplooj thiab los, hauv nws lub siab nws yeej xav nrhiav ib txojkev los pab nkawd lub neej. Nws xav tias yuav tsum muaj ib txoj zoo xwb.

Tej zaum koj kuj nyuaj siab ib yam li Xaiv Nplooj nkawd thiab. Tej kev nyuaj siab uas nkawd raug muaj nyob thoob plaws lub qab ntuj khwb. Tibneeg txhua tus yeej ntshaw lub neej nyob kaj siab lug tso siab plhuav, thiab noj qab haus huv tsis muaj mob muaj nkeeg. Tiamsis lub neej zoo li no ntshe ceeb laj nrhiav tau. Yog li, puas cia siab tau tias muaj ib hnub twg yuav nrhiav tau lub neej nyob kaj siab lug tso siab plhuav?