Thaum Xaiv Nplooj thiab Kab Yeeb nkawd kawm tias muaj ib hnub lub ntiajteb yuav muaj cov neeg zoo nyob lawm xwb, nkawd zoo siab heev. Thaum ntawd sawvdaws yuav txawj sib hlub sib pab, yuav tsis muaj kev mob kev nkeeg, kev ploj kev tuag thiab tsis muaj kev tshaib nqhis li lawm. Tibneeg thoob ntiajteb yuav nyob kaj siab lug. Nkawd xav kom txhua yam no muaj tiav kiag tamsid!

Xaiv Nplooj thiaj nug Vam Thoj tias: “Thaum twg peb mam pom tej no?”

Vam Thoj teb tias: “Koj nug li ko zoo heev. Ua li, koj puas tau kawm txog ib tug txivneej hu ua Yexus?”

Vam Thoj piav tias: “Kwvlam li 2,000 xyoo dhau los, thaum Yexus tseem nyob hauv ntiajteb nws cov thwjtim kuj nug ib yam li ko thiab. Yexus qhia rau lawv tias yuav muaj ib ‘xwm txheej’ rau tibneeg pom, yog yam uas yuav tib txhij muaj tshwm los rau hauv lub ntiajteb. Tej xwm txheej no kuj qhia tias tshuav tsis ntev lawm yuav muaj tiav raws li Vajtswv tau teem tseg.”​—Mathais 24:3, TT.

Xaiv Nplooj nug tias: “Tej xwm txheej ntawd yog dabtsi?”

Vam Thoj teb tias: “Phau Vajlugkub hais txog tej xwm txheej uas tib txhij tshwm los no. Cia peb mus nyeem ua ke.”

•  “Ib lub tebchaws yuav sawv tawmtsam ib lub tebchaws.”​—Mathais 24:7.

• “Yuav muaj kev tshaib kev nqhis.”​—Mathais 24:7.

• “Kev phem huam loj heev.”​—Mathais 24:12.

• “Yuav muaj av qeeg loj heev.”​—Lukas 21:11.

• “Yuav muaj mob thoob plaws txhua qhov huv tibsi.”​—Lukas 21:11.

Xaiv Nplooj thiab Kab Yeeb nkawd thiaj pom tias txhua yam no tabtom muaj tshwm sim. Twb yog tej uas nkawd niaj hnub nroo ntag.

Vam Thoj hais tias: “Tej xwm txheej no qhia tias tshuav tsis ntev xwb Vajtswv Yehauvas yuav kav lub ntiajteb. Nws yuav tsa ib lub tseem fwv saum ntuj los kho kom txhua yam muaj tiav raws li nws lub ntsiab. Phau Vajlugkub muab lub tseem fwv ntawd hu ua Vajtswv lub Nceeg Vaj.” Tom qab ntawd, Vam Thoj txawm nyeem ib nqes Vajlugkub uas piav tias Vajtswv lub Nceeg Vaj yuav ua dabtsi yav tom hauv ntej:

• “Lub sijhawm uas cov nomtswv ntawd tseem kav tebchaws, Vajtswv tus uas nyob saum ntuj yuav tsa ib lub tebchaws [Nceeg Vaj, NWT ] uas yuav nyob mus tsis paub kawg li. Lub tebchaws ntawd yuav tsis muaj leejtwg kovyeej nws, nws yuav rhuav tej tebchaws ntawd kom puastsuaj tas, tiamsis nws yuav nyob mus ibtxhis.”​—Daniyees 2:44.

Vam Thoj hais ntxiv tias: “Thaum Vajtswv lub Nceeg Vaj kav ntiajteb yuav tsis muaj kev phem limhiam ib zaug ntxiv li lawm. Ntshe thaum ntawd yuav zoo tshaj plaws xwb, puas yog?”

Tej uas Xaiv Nplooj thiab Kab Yeeb nkawd tau hnov hnub no ua rau nkawd xyiv fab heev. Nkawd yeej xav nyob hauv ib lub ntiajteb uas muaj kev thaj yeeb li ntawd xwb.

 Xaiv Nplooj nug tias: “Kab Yeeb wb yuav ua li cas wb thiaj pom tej no?”

Vam Thoj teb tias: “Neb yeej paub tias txhua yam zoo tsis yog tau dawb dawb xwb. Xav txog Adas thiab Evas, nkawd yuav tsum ua li cas nkawd thiaj tau txojsia?”

Xaiv Nplooj teb tias: “Nkawd yuav tsum mloog Vajtswv lus, tiamsis nkawd ho hla nws txojcai lawm.”

Vam Thoj piav tias: “Yog lawm, niaj hnub no yog peb xav muaj sia nyob hauv lub Vaj Kaj Siab peb yuav tsum mloog Vajtswv lus thiab xyaum coj raws li nws tej kevcai.”

Xaiv Nplooj pom tias nkawd ob niam txiv yuav tau ua li ntawd tiag. Tiamsis nkawd tsis paub xyov yuav pib tog twg ua ntej.

Vam Thoj hais rau nkawd tias: “Tej uas Yehauvas xav kom peb ua yeej tsis ua nra hnyav rau peb. Nws yog Leej Txiv uas hlub peb heev, nws tsuas xav kom peb tau zoo xwb. Yehauvas thiaj niaj hnub cob qhia peb ua neej. Zoo ib yam li nws tuav rawv peb tes coj peb kev mus kom txog lub ntiajteb tshiab. Cia peb saib ib nqes Vajlugkub ua ke.”

• ‘Kuv yog [Yehauvas, NWT ] uas yog nej tus Vajtswv, tus uas qhia qhov zoo rau nej thiab coj nej taug txojkev uas tsimnyog taug. Yog nej ua tib zoo mloog kuv tej lus samhwm! Ces tej koob hmoov yuav ntws laub lug los rau nej ib yam li tus dej ntws tsis paub nqhuab li. Nej tej kev vammeej yuav zoo ib yam li hiavtxwv ntas. Nej tej tubki yuav huamvam coob suav tsis txheeb ib yam li tej xuabzeb, lawv tej npe yuav tsis raug rho tawm ntawm kuv lossis raug puastsuaj li.’​—Yaxayas 48:17-19.

 Cov nqe Vajlugkub no raug Xaiv Nplooj nkawd siab heev, nkawd yeej xav kom nkawd tsev neeg muaj lub neej zoo thiab tau nyob kaj siab lug mus ib txhis hauv lub ntiajteb tshiab.

Vam Thoj hais rau nkawd tias: “Yog neb rau siab kawm Vajtswv Txojlus thiab coj raws nraim li nws tej lus sam hwm ces Yehauvas yeej yuav foom koob hmoov rau neb.”

Xaiv Nplooj nug tias: “Wb yuav kawm li cas thiab? Neb puas kam qhia wb ntxiv?”

Vam Thoj teb tias: “Tau kawg, wb yuav zoo siab qhia neb. Wb muaj ib yam uas yuav pab kom neb nrhiav tau lub neej kaj siab lug thiab tso siab plhuav!”