Los Paub Tus Tswv Tsim
Thaum Xaiv Nplooj kawm Yehauvas tej lus cog tseg ua rau nws kaj siab heev. Tiamsis nws kuj xav paub seb Vajtswv puas muaj hwjchim ua tau tiag. Yuav kom to taub txog qhov no Vam Thoj hais kom nws ua tib zoo xav seb tej uas Yehauvas tau tsim puas muaj hauv paus hauv ntsis.
Vam Thoj thiaj nthuav ib nqes Vajlugkub rau Xaiv Nplooj saib. Nqe ntawd hais tias:
-
“Tej tsev yeej muaj tus ua.”—Henplais 3:4.
Xaiv Nplooj teb tias: “Yog, muaj tseeb li ntawd. Txhua lub tsev yuav tsum muaj tus tsa thiaj tau.”
Vam Thoj hais ntxiv tias: “Tej zaub mov los yuav tsum muaj neeg ua thiab.”
Tom qab ntawd, Vam Thoj hais kom Xaiv Nplooj ua tib zoo xav txog ib puas tsav yam nyob puag ncig nws, tsis hais yam loj yam me huvsi. Nws hais tias: “Koj sim saib tej nroj tsuag, toj roob hauv pes, dej hiavtxwv, thiab tej hnub qub saum nruab ntug. Yog lub tsev twb muaj tus tsim tsa thiab tej zaub mov los twb muaj tus npaj ces ib puas tsav yam hauv qab ntuj khwb no los yuav tsum muaj ib tug tsim thiab, puas yog?”
Xaiv Nplooj saib mas tej uas Vam Thoj hais ntawd muaj tseeb tiag.
Vam Thoj hais tias: “Phau Vajlugkub qhia tias yeej muaj ib tug tsim ib puas tsav yam. Tus tswv ntawd, yuav tsum muaj hwjchim loj kawg nkaus li. Vajlugkub muab tus ntawd hu ua Vajtswv. Lo lus no txhais tias ‘Tus uas muaj hwjchim loj kawg nkaus.’ Niaj hnub no muaj ntau tus ‘vajtswv,’ tiamsis tus Tswv Tsim ib puas tsav yam huvsi yog Yehauvas. Yog li ntawd, thiaj tsim nyog hu nws tias Vajtswv tus uas muaj hwjchim loj kawg nkaus.”
Txhua yam yuav tsum muaj tus tsim
Xaiv Nplooj xav tsis thoob tias Vajlugkub hais txog ntau yam uas Vajtswv Yehauvas tau tsim. Vam Thoj hais kom Xaiv Nplooj nyeem cov nqe Vajlugkub nram no:
-
“Thaum chivkeeb Vajtswv tsim lub ntuj thiab lub ntiajteb.”—Chivkeeb 1:1.
-
“Cia li lees hais tias [Yehauvas, NWT ] yog Vajtswv. Nws tsim peb thiab peb yog nws tug.”—Phau Ntawv Nkauj 100:3.
-
“Saum nruab ntug twb ua rau peb pom Vajtswv lub hwjchim tseeb, thiab qhia tes haujlwm uas nws ua tiav lawm rau peb paub.”—Phau Ntawv Nkauj 19:1.
-
“Tus TSWV tsim nws lub tsev rau saum ntuj ceebtsheej. Nws tsim nruab ntug zoo li lub kaus roos lub ntiajteb. Nws hu kom dej tawm hauv hiavtxwv tuaj thiab muab hliv rau lub ntiajteb. Nws lub npe hu ua [Yehauvas, NWT ].”—Amaus 9:6.
Vajtswv Yehauvas yog tus Tswv Tsim txhua tsav txhua yam tibsi, tsis hais tej yam uas ciaj sia thiab tsis ciaj sia huvsi. Phau Vajlugkub thiaj hais tias nws yog “txoj hauv paus siav.” (Phau Ntawv Nkauj 36:9, TT ) Yog li ntawd, Yehauvas yog tus pub txojsia thiab yog tus Tswv Tsim. Peb thiaj hu tau tias nws yog peb Leej Txiv. Phau Vajlugkub hais tias: “Puas yog peb sawvdaws koom ib leeg txiv? Puas yog tib tug Vajtswv tsim peb sawvdaws xwb?”—Malakis 2:10.
Yehauvas yog tus pub txojsia
Xaiv Nplooj teb tias: “Yog mas! Thaum kuv saib ib puas tsav yam puag ncig kuv ces kuv txawm xav tias yuav tsum muaj ib tug tsim lossis tus pub txojsia.”
Kab Yeeb hais zoo siab hlo tias: “Yog Vajtswv muaj hwjchim tsim ib puas tsav yam ces nws kuj muaj hwjchim ua kom tej lus cog tseg hauv Vajlugkub muaj tiav thiab!”
Xaiv Nplooj thiab Kab Yeeb nkawd xav tias txhua yam uas nkawd tau hnov hnub ntawd yeej muaj hauv paus hauv ntsis tiag. Nkawd thiaj xav paub seb tus Tswv Tsim uas muaj hwjchim loj dua ntais zoo li cas.
