Xaiv Nplooj pheej muab tej uas Vam Thoj qhia rau nws coj los xav, zaum no tsis yog thawj zaug uas Xaiv Nplooj hnov txog phau Vajlugkub. Nws paub tias phau Vajlugkub yog ib phau ntawv uas tseem ceeb heev. Tiamsis nimno nws pib xav tias yog phau Vajlugkub tej lus faj lem muaj tseeb tiag, ntshe phau Vajlugkub tsis yog ib phau ntawv qub qub xwb. Nws xav tias ua cas cov txivneej uas sau phau Vajlugkub ho paub txog tej txujci, thiab tej keeb kwm uas ntev heev ua ntej twb tsis tau muaj tshwm sim. Ua li cas lawv ho paub?

Hnub tom qab, Xaiv Nplooj thiab Kab Yeeb nkawd thiaj rov mus tsham Vam Thoj thiab Mim nkawd. Xaiv Nplooj txawm nug Vam Thoj tias: “Ua li cas cov uas sau phau Vajlugkub ho paub tej txujci thiab tej keeb kwm ntev ua ntej lawd?”

Vam Thoj piav tias: “Lub tswvyim hauv phau Vajlugkub tsis yog cov uas sau lub. Cov uas sau tsuas zoo li tus ceev ntawv uas sau lwm tus tej lus tseg cia xwb. Tiag tiag lub tswvyim ntawd yog peb Leej Txiv Yehauvas lub.”

Xaiv Nplooj thiaj nug tias: “Peb Leej Txiv Yehauvas? Es nws yog leejtwg?”

Vam Thoj piav tias: “Nws yog tus uas pub txojsia rau peb tibneeg puag thaum ub, nws kuj muaj ib lub npe ib yam li koj txiv thiab kuv txiv.” Vam Thoj thiaj nthuav Phau Ntawv Nkauj 83:18 los nyeem rau Xaiv Nplooj mloog:

• “Kom lawv paub hais tias koj tib leeg thiaj yog [Yehauvas, NWT ], thiab yog tus muaj hwjchim loj kawg nkaus uas kav lub ntiajteb no.”

 Tom qab ntawd Vam Thoj nthuav ib nqes Vajlugkub ntxiv los nyeem rau Xaiv Nplooj mloog. Nqe ntawd hais li no: “Thaum chivkeeb kuv twb yeej qhia zaj uas yuav tshwm sim los thaum ntiajteb yuav kawg lawm.” (Yaxayas 46:10) Vam Thoj piav tias: “Peb txiv uas yug peb yeej paub tshaj peb. Ib yam li ntawd, peb Leej Txiv Yehauvas yeej txawj ntse thiab muaj tswvyim tshaj peb txhua tus, thiab nws tseem paub tej uas yuav tshwm sim los rau yav tom hauv ntej. Vim li no, nws thiaj txawj qhia cov uas sau phau Vajlugkub txog tej uas yuav tshwm los tom ntej.”

Xaiv Nplooj nug tias: “Yog li ntawd, Yehauvas puas paub tias Kab Yeeb wb lub neej yav tom hauv ntej yuav zoo li cas?”

Vam Thoj teb tias: “Yehauvas tsis tswj peb lub neej yav tom hauv ntej. Tiamsis zoo li ib leej txiv, nws yeej paub txog peb tej teeb meem thiab xav pab peb.”

Vam Thoj hais rau Xaiv Nplooj tias yog nkawd mus nyeem phau Vajlugkub, nkawd yuav pom tej uas Yehauvas tau ua los pab kom nkawd tau lub neej kaj siab lug. Nkawd kuj yuav kawm tias tej uas nkawd txiav txim siab ua yuav raug nkawd lub neej li cas, tamsim no thiab yav tom hauv ntej.

Xaiv Nplooj pom tias tej uas Vam Thoj hais ntawd yeej txaus ntseeg, nws los kuj yog ib leej txiv thiab yeej ua txhua yam los pab nws cov menyuam kom tau lub neej zoo. Vam Thoj zoo siab hlo qhia Xaiv Nplooj thiab Kab Yeeb nkawd txog tej lus cog tseg hauv phau Vajlugkub. Nws nthuav cov nqe Vajlugkub nram no los qhia rau nkawd:

• “Nws ua rau tej kev tsov kev rog hauv ntiajteb no tiaj tus.”​—Phau Ntawv Nkauj 46:9.

• “Cov neeg ua tsev yuav tau nyob hauv tej tsev ntawd, tsis yog lwm tus yuav tau nyob. Lawv yuav cog txiv hmab thiab yuav tau haus tej cawv txiv hmab ntawd, tsis yog lwm tus yuav tau haus. Kuv haivneeg yuav muaj hnubnyoog nyob ntev ib yam li tej ntoo.”​—Yaxayas 65:21, 22.

•  “Thov kom muaj qoobloo puv nkaus saum tej pov roob.”​—Phau Ntawv Nkauj 72:16.

• “Nws yuav so lawv tej kua muag huv tibsi mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm. Tej uas sawvdaws ibtxwm muaj los twb ploj tas lawm.”​—Tshwmsim 21:4.

Cov lus cog tseg no raug Xaiv Nplooj siab kawg li. Nws nyiam qhov uas thoob ntiajteb ib leeg yuav ua ncaj rau ib leeg, yuav tsis muaj kev mob kev nkeeg, kev ploj kev tuag, thiab yuav muaj noj muaj haus nplua mias. Kab Yeeb los kuj nyiam ib yam nkaus thiab, tiamsis nws xav tias xyov puas yuav muaj tau tiag.

Vam Thoj hais tias: “Niam Xaiv Nplooj yav tas los kuv kuj xav ib yam li ko thiab. Tiamsis raws li peb tau kawm, Vajlugkub tej lus faj lem yeej muaj tseeb tsis poob ib los li. Yog li ntawd, peb thiaj ruaj siab tias cov lus cog tseg no yeej yuav muaj tiav xwb xwb li. Tus Vajtswv uas tshoov kom sau tej no tseg yeej hais hlo tias: ‘Cia li sau tej lus no cia, rau qhov tej lus no yog lus tseeb thiab tso siab tau.’”​—Tshwmsim 21:5.