Tej uas Vam Thoj hais raug Xaiv Nplooj siab heev. Tiamsis tseem muaj lwm yam uas ua rau nws ntxhov siab. Nws thiaj nug Vam Thoj tias: “Vajtswv Yehauvas twb hlub peb thiab muaj hwjchim tsim ib puas tsav yam, ua cas lub ntiajteb ho muaj teeb meem thiab muaj kev txom nyem ntau ua luaj?”

Vam Thoj teb tias: “Koj nug li ko zoo heev, coob tus kuj xav li kod thiab. Raws li peb kawm mas Yehauvas yog ib tug Vajtswv zoo kawg li. Yog li ntawd, nws yeej tsis xav kom muaj tej xwm phem li. Tiamsis ua cas niaj hnub no ho muaj xwm phem ntau ua luaj? Cia peb saib seb chiv keeb thaum ub Vajtswv lub ntsiab rau noob neej yog li cas, thiab vim li cas ho tsis muaj raws li lub ntsiab ntawd.”

Tom qab ntawd, Vam Thoj piav rau Xaiv Nplooj tias, thaum Yehauvas tsim tau ib puas tsav yam hauv ntiajteb no mas nws zoo siab heev. Vam Thoj nyeem nqe Vajlugkub no rau Xaiv Nplooj:

• “Vajtswv saib ib puas tsav yam uas nws tsim ntawd, thiab ua rau nws txaus siab heev.”​—Chivkeeb 1:31.

Adas thiab Evas yog thawj nkawm niam txiv uas Yehauvas tau tsim. Nws tsim nkawd muaj txojsia nyob mus ib txhis hauv lub vaj Edees uas zoo nkauj heev. Hauv lub vaj ntawd Vajtswv tsim muaj txhij muaj txhua. Adas thiab Evas nkawd thiaj nyob kaj siab lug tsis tu ncua ib yam dabtsi li. (Chivkeeb 2:8, 9) Tsis tas li ntawd, Yehauvas sam hwm tias nkawd yuav muaj tub ki huam  vam puv nkaus ntiajteb thiab nkawd yuav saib xyuas lub ntiajteb. (Chivkeeb 1:28) Lub ntiajteb yuav yog ib lub vaj kaj siab thiab noob neej yuav koom ib lub siab ua kwvtij ces sawvdaws kuj yuav tsis muaj mob muaj nkeeg li. Koj xav puas zoo thiab?

Vim li cas niaj hnub no tsis pom muaj li ntawd? Vam Thoj nthuav ib nqes Vajlugkub los piav rau Xaiv Nplooj mloog:

• “Twb yog vim ib tug xub ua txhaum, neeg ntiajteb txhua tus thiaj ua txhaum. Vim tus ntawd ua txhaum, tus ntawd thiaj tuag. Yog li ntawd, txhua haivneeg uas nyob hauv ntiajteb no thiaj txawj tuag, rau qhov txhua tus puavleej tau ua txhaum lawm.”​—Loos 5:12.

Yehauvas hlub Adas thiab Evas heev, nws thiaj rhawv kevcai rau nkawd coj. Yog nkawd mloog lus nkawd yuav tau txojsia nyob mus ib txhis, thiab yuav tau nyob tu lub vaj zoo zoo nkauj ntawd. (Chivkeeb 2:15-17) Yehauvas yog leej txiv uas muaj kev hlub, nws tsis yuam kom nkawd ua raws li nws sam hwm. Tiamsis nws xav kom nkawd hlub nws thiab mloog nws lus. Yehauvas cia nkawd txiav txim siab seb nkawd yuav mloog los tsis mloog. Cia peb kawm seb nkawd tau ua li cas.

Tu siab kawg li, uas Adas nkawd txiav txim siab tsis mloog Vajtswv lus. Nkawd xav ua ywj siab xwb, nkawd thiaj poob kev txhaum. Qhov txhaum ntawd ua rau nkawd plam txojsia ntev mus ib txhis. Thaum kawg, nkawd thiaj txawj laus txawj tuag ib yam li Yehauvas tau hais tseg.​—Chivkeeb 2:17.

Vim peb yog Adas thiab Evas nkawd tej xeeb ntxwv peb thiaj muaj kev txhaum thiab txawj laus txawj tuag ib yam li nkawd. Txawm li ntawd los, Vajtswv lub ntsiab rau noob neej yeej tsis hloov li. Vajtswv tseem xav kom noob neej  nyob kaj siab lug rau hauv lub ntiajteb no mus ib txhis. Vam Thoj nthuav ib nqes Vajlugkub rau Xaiv Nplooj thiab Kab Yeeb nkawd nyeem:

• “[Yehauvas, NWT ] yog tus uas tsim lub ntuj, nws tib leeg thiaj yog Vajtswv. Nws yog tus uas tsim lub ntiajteb, nws ua kom ntiajteb nyob ruaj khov mus ibtxhis. Nws tsis tau tsim lub ntiajteb los nyob do cuas tsis muaj dabtsi, tiamsis nws tsim los rau neeg nyob.”​—Yaxayas 45:18.

Vam Thoj hais kom Xaiv Nplooj thiab Kab Yeeb nkawd nco ntsoov tej lus cog tseg hauv phau Vajlugkub. Vajtswv cog lus tias yuav tsis muaj mob muaj nkeeg, tsis muaj kev ploj kev tuag li lawm. Txhua tus yuav muaj noj muaj haus muaj vag muaj tse nyob hauv ntiajteb no mus ib txhis. Nov yog Vajtswv lub ntsiab rau noob neej ces Vam Thoj txawm nthuav cov lus cog tseg ntawd rau Xaiv Nplooj nkawd nyeem:

• “Cov ncaj ncees yuav tau lub tebchaws [ntiajteb, NWT ] ua lawv teej lawv tug, thiab tau nyob rau hauv mus ib txhis.”​—Phau Ntawv Nkauj 37:29, TT.

Vajtswv Yehauvas cog lus li cas lawm ces nws yeej yuav ua kom tiav li ntawd tiag.