Vam Thoj nug tias: “Xaiv Nplooj thiab niam Xaiv Nplooj, kuv xav nug seb thaum neb saib ib tug menyuam twg, neb puas pom tias tus menyuam ntawd muaj ib tsos zoo li nws niam nws txiv?”

Xaiv Nplooj teb tias: “Yog mas! Kuv tus mentxhais muaj ib tsos zoo li nws niam. Nws mas yoog kiag nws niam ntag.”

Vam Thoj teb tias: “Yog kawg, thaum pom koj tus ntxhais mas cuag li pom nws niam ntag. Ib yam li ntawd, thaum peb paub zoo txog tej uas peb Leej Txiv Yehauvas tau tsim, zoo ib yam li peb paub txog nws lawm thiab.”

Xaiv Nplooj teb tias: “Lov, kuv tsis tau paub dua li.”

Vam Thoj piav tias: “Phau Vajlugkub yeej hais li ntawd tiag. Koj sim saib Loos 1:20 hais tias: ‘Txawm yog neeg tsis pom Vajtswv tus muaj hwjchim uas nyob mus ibtxhis thiab qhov uas nws yog Vajtswv los yog lawv saib ib puas tsav yam uas Vajtswv tsim, lawv yeej paub hais tias muaj Vajtswv tiag.’” Xaiv Nplooj thiaj nug tias: “Qhov no yog li cas tiag?”

Vam Thoj teb tias: “Xaiv Nplooj xav seb ib leej txiv hlub nws cov menyuam npaum li cas. Txawm cov menyuam tsis mloog lus, tsis hwm niam hwm txiv los leej txiv tseem mob siab thiab tu nws cov menyuam qees, puas yog? Ua cas leej txiv ho coj li ntawd? Twb yog Vajtswv Yehauvas tsim kom cov niam txiv txawj hlub lawv cov menyuam ntag.  Xaiv Nplooj, koj puas paub Yehauvas hlub peb npaum li ntawd thiab?”

Vam Thoj hais ntxiv tias: “Txawm ib txhia tsis paub Yehauvas los tej uas nws tsim tseem niaj hnub yug lawv txojsia. Nqe Vajlugkub hauv Mathais 5:45 thiaj hais tias: ‘Vajtswv ua nws lub hnub ci rau cov neeg ua phem thiab cov neeg ua zoo, thiab tso nag los rau cov neeg ncaj thiab cov neeg tsis ncaj ib yam nkaus.’ Tej uas Yehauvas ua ntawd, yug tau peb txojsia thiab ua rau tej qoob loo loj hlob. Nws ua li ntawd los txog niaj hnub nimno txawm tsis muaj leejtwg ua nws tsaug los xij. Qhov no ua pov thawj tias Yehauvas yog tus Vajtswv uas hlub peb tiag. Nqe Vajlugkub hauv 1 Yauhas 4:8 thiaj hais tias ‘Vajtswv yog tus uas muaj kev hlub’. Txhua yam uas nws ua twb yog txojkev hlub.”

Tom qab ntawd, Vam Thoj ho nug ntxiv tias: “Ib leej txiv yeej ua ncaj ua ncees rau nws tej tubki nws yeej tsis hlub ib tug tseg ib tug, puas yog? Tsis tas li ntawd xwb, nws kuj cob qhia kom lawv paub tab, saib taus luag lwm tus thiab ua lub neej ncaj ncees. Qhov no qhia tias tibneeg nyiam kev ncaj ncees, thiab lawv txhua leej txhua tus los xav kom luag ua ncaj rau lawv. Ua cas peb ho xav tau li ntawd? Twb yog Vajtswv tsim kom peb nyiam coj ncaj li nws.”

Tom qab ntawd, Vam Thoj nthuav cov nqe Vajlugkub nram no uas hais txog Vajtswv Yehauvas rau nkawd saib:

• “Nws yog tus uas zoo kawg nkaus, tej uas nws ua yeej ncaj ncees.”​—2 Kevcai 32:4.

•  “Nws nyiam txojkev ncaj ncees thiab qhov uas ua ncaj.”​—Phau Ntawv Nkauj 33:5, TT.

Yog li ntawd, peb nyiam coj ncaj vim Yehauvas nyiam kev ncaj ncees. Nws tsim kom peb muaj tus yam ntxwv zoo li nws. (Chivkeeb 1:27) Tiamsis peb tsis muaj cai txiav txim seb qhov twg ncaj qhov twg tsis ncaj, tsuas yog Yehauvas tib leeg xwb thiaj muaj cai tu li ntawd. Nws thiaj rhawv kevcai rau tibneeg coj. Thaum leejtwg hla Vajtswv txojcai yeej yuav nyuaj thiab tsim teeb meem rau lwm tus.

Vam Thoj hais ntxiv tias: “Neb puas tau paub tias ntau lub tebchaws tej kevcai lij choj muaj ntsis qhia raws li phau Vajlugkub tej kevcai thiab?” Qhov ntawd ua rau Xaiv Nplooj thiab Kab Yeeb nkawd xav tsis thoob li.

Vam Thoj hais ntxiv tias: “Muaj tej kevcai sam hwm kom tsis txhob tua neeg, tsis txhob ua tub sab tub nyiag, deev luag poj luag txiv. Tej kevcai no twb muab sau tseg rau hauv phau Vajlugkub ntev li 3,500 xyoo los lawm. Thaum peb coj lub neej raws li Yehauvas tej kevcai, qhia tias peb nyiam coj ncaj coj zoo li nws. Yog peb coj ncaj peb yuav nyob kaj siab lug, thiab txaus siab rau peb lub neej.”

Tom qab Xaiv Nplooj thiab Kab Yeeb nkawd mloog tej uas Vam Thoj tham tas, nkawd pom tias Yehauvas yog tus Vajtswv uas muaj kev hlub thiab coj ncaj rau txhua fab. Nkawd ib txwm xav tias ib leeg yuav tsum hlub ib leeg, thiab ib leeg yuav tsum  ua ncaj rau ib leeg. Nkawd thiaj hlub thiab ua ncaj rau nkawd cov menyuam. Nimno nkawd nkag siab lawm tias tos tibneeg txawj ua li no los yog Yehauvas xub muab tej no tso rau hauv tibneeg lub siab lawm.

Tej uas Xaiv Nplooj kawm no ua rau nws zoo siab heev thiab ua rau nws pom tias yeej muaj Yehauvas tiag. Kuj ua rau nws yim huab hlub thiab xav ua ncaj ncees rau nws pojniam menyuam. Xaiv Nplooj kuj xav tias yuav zoo heev yog nws yoog raws li Yehauvas es ua ncaj rau lwm tus thiab.

Vam Thoj thiaj hais zoo siab hlo tias: “Zoo kawg, Xaiv Nplooj. Koj xav ib yam li phau Vajlugkub qhia lawm tiag. Kuv xav nthuav ib nqes Vajlugkub rau koj saib.” Vam Thoj thiaj nyeem nqe Vajlugkub nram no:

• “Yog nej xav kom lwm tus ua li cas rau nej, nej yuav tsum ua ib yam li ntawd rau lwm tus.”​—Mathais 7:12.

Vam Thoj hais tias Yehauvas tsis yog hlub thiab coj ncaj nkaus xwb, nws tseem muaj ntau yam uas tsis tau tham txog. Xaiv Nplooj thiab Kab Yeeb nkawd xav paub ntxiv txog Yehauvas, nkawd thiaj hais kom Vam Thoj piav mus ntxiv rau nkawd.