Vam Thoj piav tias ib puas tsav yam uas Vajtswv tsim qhia txog nws tus yam ntxwv. Nws nyeem ib nqes Vajlugkub uas raug siab heev rau Xaiv Nplooj thiab Kab Yeeb nkawd mloog.

• “[Yehauvas, NWT ], koj tsim ib puas tsav yam! Thaum peb saib tej uas koj tsim los ntawd ua rau peb pom hais tias koj yog tus muaj tswvyim! Lub ntiajteb puv nkaus txhua tsav yam uas koj tau tsim tseg.”​—Phau Ntawv Nkauj 104:24.

Vam Thoj hais tias: “Tej me kab me ntsaum los kuj qhia tau Yehauvas lub tswvyim thiab. Xws li tus ntsaum, phau Vajlugkub hais tias nws muaj tswvyim heev.”

Vam Thoj hais kom Xaiv Nplooj xav txog tej ntsaum uas nkawd niaj hnub pom mus txiav nplooj thiab kwv mus rau hauv lub pov toj lossis lub tsev ntsaum. Ua cas ntsaum ho paub ua li ntawd? Ib tug uas sau phau Vajlugkub tau piav tias ntsaum “ntse kawg li.” Tiamsis leejtwg tsim ntsaum kom txawj ua li ntawd? Leejtwg pub tswvyim rau ntsaum? Phau Vajlugkub hais tias yog Vajtswv Yehauvas tus uas tsim ntuj tsim teb.​—Pajlug 30:24, 25.

Xaiv Nplooj teb tias: “Tej me kab me ntsaum muaj tswvyim npaum li no yuav tsum muaj tus tsim xwb.”

Vam Thoj nug Xaiv Nplooj nkawd tias: “Neb puas tau paub tias yog muaj Yehauvas lub tswvyim peb thiaj muaj sia nyob?” Lo lus nug no ua rau nkawd xav tsis thoob li.

Vam Thoj hais ntxiv tias thaum nws xav txog lub ntiajteb thiab tej huab cua uas tabtom haum rau tibneeg, mas  ua rau nws xav tsis thoob li. Lub ntiajteb kiv ncig lub hnub kom tej sab hnub ci tuaj txog lub ntiajteb thiaj haum nkaus. Lub zog ntiajteb thiaj rub tau tej pa los ua ib txheej ib txheej qhwv lub ntiajteb, tiamsis kuj tsis rub kom dhau qhov uas ua rau tibneeg mus tsis taus. Tsis tas li ntawd, lub ntiajteb muaj dej nyob puv nkaus kom txhua yam thiaj ciaj sia. Cov av los kuj muaj dej muaj chiv thiaj ua rau tej qoob loo loj hlob mos nywb nyoos.

Vam Thoj hais tias: “Kuv ntseeg tias txhua yam no yuav tsum muaj tus tsim xwb. Tus ntawd yog Vajtswv Yehauvas tus uas muaj laj lim tswvyim dav kawg nkaus, nws tsim txhua yam xwv peb thiaj muaj txojsia nyob.”

Xaiv Nplooj thiab Kab Yeeb nkawd ncaws hau tias zoo heev.

Vam Thoj txawm piav ntxiv txog Vajtswv lub hwjchim ua rau nkawd xav tsis thoob li. Xaiv Nplooj kuj xav paub seb phau Vajlugkub hais li cas thiab. Vam Thoj thiaj nthuav ib nqes Vajlugkub los nyeem rau nkawd mloog:

• “[Yehauvas, NWT ] uas kav ib puas tsav yam, koj lub hwjchim thiab tus zog loj zog nchav tsim lub ntiajteb thiab lub ntuj; tsis muaj ib yam dabtsi nyuaj rau koj ua tsis tau li.”​—Yelemis 32:17.

Tom qab ntawd Vam Thoj hais rau Xaiv Nplooj tias: “Yog peb saib lub hnub, peb yuav pom tias Vajtswv Yehauvas muaj hwjchim npaum li cas. Thaum peb tawm mus ziab tshav mas kub kawg li, puas yog? Koj xav lub hnub kub npaum li cas?”

 Xaiv Nplooj teb tias: “Kub kawg li, lub caij ntuj qhua mas hajyam kub tshaj.” Kab Yeeb kuj xav li ntawd thiab.

Vam Thoj hais rau nkawd tias nws tau nyeem hauv ib phau ntawv uas qhia tias hauv lub plawv hnub kub txog 27,000,000°F (15,000,000°C). Ib chib twg, lub hnub cig tej niag ntshua muaj zog npaum li qas txhiab qas vam lub hoob pob loj nus qhias (nuclear) tawg. Yog txhem lub hnub ib qho luaj li lub hau koob los rau hauv ntiajteb, yus yuav tsum nyob deb li 100 mais (150 kilumev) mas thiaj nyob taus!

Vam Thoj nug tias: “Yog lub hnub muaj zog npaum li ntawd, Vajtswv tus uas tsim lub hnub yuav tsum muaj zog tshaj, puas yog? Qhov tseeb peb yeej tsis paub tias Vajtswv muaj hwjchim npaum li cas tiag. Lub hnub tsuas yog ib qho pov thawj me me los qhia tias Vajtswv Yehauvas muaj hwjchim heev.”

Xaiv Nplooj thiab Kab Yeeb nkawd pom tias txhua yam uas Vam Thoj piav, yuav tsum muaj ib tug tswv tsim xwb xwb li. Nkawd to taub zuj zus tias txawm tibneeg tsis pom Vajtswv los yeej qhia tias muaj Vajtswv tiag, nws yog tus Vajtswv uas muaj kev hlub, kev ncaj ncees, muaj tswvyim, thiab muaj hwjchim.