ZAJ KAWM 10
Yehauvas Cov Tim Khawv Tej Kev Sib Txoos Pab Tau Koj Li Cas?
Puas tau muaj leej twg caw koj mus rau Yehauvas Cov Tim Khawv tej kev sib txoos ib zaug dua li? Yog koj tsis tau mus dua tej zaum ntshe koj yuav xav hais tias: Lawv mus ua dab tsi ntawm lawv tej kev sib txoos? Tej kev sib txoos ntawd puas tseem ceeb rau kuv? Vim li cas kuv yuav tsum mus koom thiab? Nyob rau hauv zaj kawm no, koj yuav kawm tias tej kev sib txoos yuav pab koj muaj kev sib raug zoo nrog Vajtswv thiab yuav pab koj lub neej li cas.
1. Vim li cas tseem ceeb rau peb tuaj sib txoos ua ke?
Muaj ib tug uas Vajtswv tshoov kom pab sau phau Vajlugkub tau hais tias vim li cas tseem ceeb rau peb tuaj sib txoos ua ke. Nws hais tias: ‘Kuv yuav ua Yehauvas tsaug tab meeg cov neeg coob coob uas tuaj txoos ua ke no.’ (Phau Ntawv Nkauj 26:12) Ces zoo ib yam li ntawd, niaj hnub nim no los Yehauvas Cov Tim Khawv yeej zoo siab hlo tuaj sib txoos ua ke. Nyob thoob plaws hauv lub qab ntuj khwb no, txhua lub li tiam lawv yeej tuaj sib txoos ua ke ob zaug. Lawv tuaj pe hawm, hu nkauj, thiab thov Vajtswv ua ke. Lawv kuj tuaj sib txoos ua tej pawg coob coob tuaj pe hawm Vajtswv ua ke ob peb zaug txhua lub xyoos.
2. Koj yuav kawm tau dab tsi ntawm peb tej kev sib txoos?
Nyob rau hauv peb tej kev sib txoos, peb siv Vajtswv Txoj Lus los qhuab qhia, muab los txhais thiab los piav kom peb nkag siab to taub zoo. (Nyeem Nehemis 8:8.) Thaum koj tuaj koom peb tej kev sib txoos koj yuav kawm txog Yehauvas thiab nws tej yeeb yam qhuas lug. Thaum koj paub txog nws txoj kev hlub rau koj, koj yim huab yuav xav muaj kev sib raug zoo nrog nws. Koj kuj yuav kawm tau tias nws yuav pab kom koj muaj ib lub neej uas muaj hauv paus hauv ntsis thiab.—Yaxayas 48:17, 18.
3. Thaum koj nrog lwm tus tom peb tej kev sib txoos tham ho yuav pab tau koj li cas?
Yehauvas hais kom peb “ib tug txawj hlub ib tug thiab ib tug ua zoo rau ib tug. Sawvdaws yuav tsum tuaj ua ke mloog lus qhuab qhia tsis txhob tso tseg.” (Henplais 10:24, 25) Tom peb tej kev sib txoos, koj yuav tau ua ke nrog cov neeg uas ib leeg mob siab txog ib leeg tiag tiag thiab cov uas xav paub ntxiv txog Vajtswv ib yam li koj. Lawv yuav siv phau Vajlugkub los qhuab qhia kom txhawb tau sawv daws txoj kev ntseeg. (Nyeem Loos 1:11, 12.) Tsis tas li ntawd, koj kuj yuav ntsib lwm tus tsis hais cov uas twb muaj txij nkawm lawm los cov tseem tsis tau muaj. Koj yuav pom tias txawm lawv muaj teeb meem los lawv tseem muaj taus kev zoo siab thiab. Tej no tsuas yog qho me ntsis uas qhia tias vim li cas Yehauvas xav kom peb tuaj sib txoos ua ke tsis tu ncua.
KAWM NTXIV
Mus saib seb muaj li cas ntawm Yehauvas Cov Tim Khawv tej kev sib txoos thiab vim li cas zoo rau peb mus koom thiab.
4. Yehauvas Cov Tim Khawv tej kev sib txoos
Cov Ntseeg nyob rau thawj 100 xyoo, yeej tuaj sib txoos thiab pe hawm Yehauvas ua ke. (Loos 16:3-5) Nyeem Kaulauxais 3:16, thiab tham txog lo lus no:
-
Cov Ntseeg nyob rau thawj 100 xyoo pe hawm Yehauvas li cas?
Niaj hnub no, Yehauvas Cov Tim Khawv kuj mus sib txoos ua ke tsis tu ncua hauv lawv cov tsev pe hawm Vajtswv. Saib zaj YEEB YAJ KIAB seb lawv tej kev sib txoos zoo li cas. Ces saib daim duab txog ib lub koom txoos uas tab tom muaj kev sib txoos, thiab tham txog ob lo lus no.
-
Tej uas koj pom muaj ntawm lub Tsev Nceeg Vaj thiab tej uas koj nyeem hauv Kaulauxais 3:16 ho zoo sib xws li cas?
-
Nyob rau hauv zaj yeeb yaj kiab los sis daim duab, koj pom dab tsi txog tej kev sib txoos uas koj nyiam thiab?
Nyeem 2 Kauleethaus 9:7, thiab tham txog lo lus no:
-
Vim li cas Yehauvas Cov Tim Khawv tsis sau nyiaj thaum lawv tuaj tej kev sib txoos?
Nrog tus uas qhia Vajlugkub rau koj tham seb yuav kawm txog dab tsi ntawm txoj kev sib txoos tom ntej no.
-
Puas muaj tej yam ntawm txoj kev sib txoos uas koj xav paub txog los sis yuav pab tau koj?
Koj puas paub?
Hauv jw.org, koj nrhiav tau tej kev sib txoos thoob plaws lub qab ntuj seb muaj nyob rau qhov twg thiab rau thaum twg.
-
Nyob rau hauv peb tej kev sib txoos muaj lus qhuab qhia, kev xyaum qhia Vajlugkub, thiab yeeb yaj kiab. Peb hu ib zag nkauj thiab thov Vajtswv thaum pib thiab thaum xaus kev sib txoos
-
Muaj ib lub caij hauv kev sib txoos, peb caw cov uas tuaj mloog tsa tes teb thiab qhia tej uas lawv kawm tau
-
Peb zoo siab tos txais txhua tus—tsev neeg, cov tub ntxhais hluas, cov laus, thiab cov me nyuam huv tib si
-
Yehauvas Cov Tim Khawv tsis thov nyiaj los sis tsis muab ib lub tais yais los sau nyiaj ntawm tej kev sib txoos. Cia li tuaj dawb xwb
5. Yuav tau siv dag siv zog thiaj mus koom tau tej kev sib txoos
Cia peb tham txog Yexus tsev neeg seb thaum ub lawv tau ua li cas. Nyob ntawm Naxales mus rau Yeluxalees deb li 60 mais los sis 100 kilumev thiab muaj toj roob hauv pes quas. Yuav kom lawv mus pe hawm tau Vajtswv hauv Yeluxalees txhua lub xyoos, lawv yuav tau mus ko taw nce toj nqes taug hla roob hla hav ob peb hnub ke thiaj li mus txog. Nyeem Lukas 2:39-42, thiab tham txog cov lus no:
-
Koj puas xav tias yuav tau siv dag siv zog thiaj li mus txog Yeluxalees?
-
Vim li cas tej zaum koj yuav tau siv dag siv zog kom mus koom tau tej kev sib txoos thiab?
-
Koj puas xav tias qhov uas mus tej kev sib txoos yeej zoo rau koj tab txawm yuav tsis yooj yim? Vim li cas koj xav li ntawd?
Phau Vajlugkub hais tias qhov uas peb mus sib txoos pe hawm Yehauvas ua ke tseem ceeb heev. Nyeem Henplais 10:24, 25, thiab tham txog lo lus no:
-
Vim li cas peb yuav tsum mus tej kev sib txoos tsis tu ncua?
IB TXHIA HAIS TIAS: “Yus kawm yus Vajlugkub hauv tsev xwb yeej tau lawm, tsis tas yuav mus koom nrog lwm tus li.”
-
Nqe Vajlugkub twg los sis ib tug qauv twg hauv phau Vajlugkub qhia tias Yehauvas xav kom koj ua dab tsi?
KOJ KAWM TAU DAB TSI
Thaum koj mus koom tej kev sib txoos, koj yuav kawm tau ntxiv txog Yehauvas, yuav pab koj muaj kev sib raug zoo nrog nws zoo zuj zus tuaj, thiab yuav tau nrog lwm tus pe hawm nws ua ke.
Rov Tham Dua
-
Vim li cas Yehauvas xav kom peb mus sib txoos ua ke?
-
Koj yuav kawm tau dab tsi ntawm Yehauvas Cov Tim Khawv tej kev sib txoos?
-
Koj xav tias tej kev sib txoos puas pab tau koj rau lwm yam thiab?
TSHAWB NTXIV
Yog tias koj ho ntshai mus rau ib txoj kev sib txoos ne? Saib seb ib tug txiv neej uas xav li ntawd tau ua li cas nws thiaj li pib nyiam tej kev sib txoos.
Wb Yeej Yuav Nco Ntsoov Qhov Lawv Tos Txais Wb Luag Ntxhi (4:16)
Saib seb ua cas ib tug tub hluas ho nyiam tej kev sib txoos thiab nws ua dab tsi kom thiaj mus koom tau tsis tseg.
Mus kawm seb lwm tus xav li cas txog qhov uas mus tej kev sib txoos.
“Ua Cas Ho Mus Sib Txoos Tom Tsev Nceeg Vaj?” (Nyeem hauv jw.org/hmn)
Mus kawm txog seb ib tug txiv neej ua laib uas phem heev ua li cas thiaj hloov tau nws lub neej tom qab nws mus rau Yehauvas Cov Tim Khawv ib txoj kev sib txoos.
“Kuv Yeej Tsis Mus Ib Qho Twg Yog Tsis Nqa Kuv Rab Phom” (Phau Tsom Faj lub 7 Hli tim 1 xyoo 2014)
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
