ZAJ KAWM 14
Yuav Ua Cas Peb Thiaj Pe Hawm Tau Haum Vajtswv Siab?
Raws li peb tau kawm zaj tas los, tsis yog txhua txoj kev ntseeg yuav ua haum Vajtswv siab. Tiam sis peb yeej pe hawm tau haum Yehauvas siab. Peb yuav peb hawm li cas thiaj haum nws siab? (Yakaunpaus 1:27) Saib seb phau Vajlugkub qhia li cas.
1. Yuav ua cas peb thiaj pe hawm tau haum Vajtswv siab?
Peb yuav tsum pe hawm Vajtswv raws li phau Vajlugkub qhia. Yexus hais rau Vajtswv tias: “Koj txojlus yog lus tseeb.” (Yauhas 17:17) Ib txhia kev ntseeg tsis pe hawm raws li Vajtswv Txoj Lus tiam sis lawv tsuas pe hawm raws li neeg tej tswv yim thiab tej kab lig kev cai xwb. Yehauvas tsis txaus siab rau cov neeg uas tsis quav ntsej txog nws tej kev cai. (Nyeem Malakaus 7:9.) Peb yuav ua rau Yehauvas zoo siab heev yog peb coj raws li phau Vajlugkub qhia.
2. Peb yuav tsum pe hawm Yehauvas li cas?
Peb yuav tsum pe hawm Yehauvas tib leeg xwb vim nws yog tus uas tsim ib puas tsav yam huv tib si. (Tshwmsim 4:11) Qhov no txhais tias peb yuav tsum hlub thiab pe hawm nws tib leeg xwb es tsis txhob siv ib tug mlom, ib daig duab, los sis ib lub cim dab tsi li.—Nyeem Yaxayas 42:8.
Peb txoj kev pe hawm yuav tsum “dawbhuv thiab haum Vajtswv siab.” (Loos 12:1) Yog li ntawd, peb yuav tsum xyaum ua peb lub neej kom raws li Vajtswv tej kev cai. Muab piv txwv li no tias, thaum ib khub txij nkawm twg sib yuav, cov uas hlub Yehauvas yeej xav ua raws li nws tej kev cai. Thiab lawv yuav zam tej yam tsis zoo xws li haus luam yeeb, quav yeeb quav tshuaj los sis qaug dej qaug cawv. a
3. Vim li cas peb yuav tsum nrog cov uas muaj tib txoj kev ntseeg li peb pe hawm Yehauvas ua ke?
Txhua lub lim tiam peb muaj cib fim qhuas Yehauvas thaum peb tuaj sib sau ua ke hauv peb tej kev sib txoos. (Phau Ntawv Nkauj 111:1, 2) Ib qho uas peb qhuas tau Vajtswv yog thaum peb hu nkauj. (Nyeem Phau Ntawv Nkauj 104:33.) Yehauvas xav kom peb tuaj sib txoos ua ke rau qhov nws hlub peb thiab nws paub tias tej kev sib txoos ntawd yuav pab peb ua lub neej nyob kaj siab lug mus ib txhis. Thaum peb tuaj sib txoos ua ke, peb ib leeg yuav txhawb tau ib leeg lub zog.
KAWM NTXIV
Tshuaj xyuas seb vim li cas Yehauvas thiaj tsis pom zoo rau peb siv mlom los pe hawm nws. Kawm txog tej kev uas peb qhuas tau Vajtswv.
4. Peb yuav tsum tsis txhob siv tej mlom los pe hawm Vajtswv
Ua cas peb thiaj paub tias Vajtswv tsis txaus siab yog peb ua li ntawd? Saib zaj YEEB YAJ KIAB, thiab tham txog lo lus no.
-
Tau muaj li cas rau Vajtswv ib co neeg txheej thaum ub thaum lawv puab tau ib tug mlom los peb hawm nws?
Ib txhia siv mlom los pe hawm Vajtswv rau qhov lawv xav tias yog ua li ntawd ces lawv yuav muaj kev sib raug zoo nrog Vajtswv dua. Tiam sis qhov lawv ua li ntawd, puas haj yam yuav ua rau Vajtswv txav deb ntawm lawv xwb? Nyeem Khiav Dim 20:4-6 thiab Phau Ntawv Nkauj 106:35, 36, thiab tham txog cov lus no:
-
Koj kheev pom tib neeg siv tej yam twg los sis tej duab zoo li cas los pe hawm Vajtswv?
-
Yehauvas xav li cas txog qhov uas siv tej mlom los pe hawm nws?
-
Koj xav li cas txog qhov uas siv tej mlom los pe hawm Vajtswv?
5. Thaum peb pe hawm Yehauvas tib leeg xwb peb yuav dim plaws ntawm tej tswv yim dag
Mus saib seb thaum peb pe hawm Yehauvas raws li nws siab nyiam ho yuav tso tau peb dim ntawm tej tswv yim dag li cas. Saib zaj YEEB YAJ KIAB.
Nyeem Phau Ntawv Nkauj 91:14, thiab tham txog lo lus no:
-
Thaum peb qhia tias peb hlub thiab pe hawm Yehauvas tib leeg xwb nws cog lus li cas rau peb?
6. Peb pe hawm Vajtswv ntawm tej kev sib txoos
Thaum peb hu nkauj thiab tsa tes teb ntawm tej kev sib txoos twb yog peb qhuas Yehauvas thiab sib txhawb zog. Nyeem Phau Ntawv Nkauj 22:22, thiab tham txog ob lo lus no:
-
Koj puas zoo siab thaum koj hnov lwm tus teb ntawm tej kev sib txoos?
-
Koj puas npaj siab los teb ib qho thiab?
7. Thaum peb qhia tej uas peb kawm tau rau lwm tus mloog ces yuav ua rau Yehauvas zoo siab
Muaj ntau ntau txoj kev uas peb qhia tau rau lwm tus kom paub qhov tseeb hauv phau Vajlugkub. Nyeem Phau Ntawv Nkauj 9:1 thiab 34:1, thiab tham txog lo lus no:
-
Koj kawm tau dab tsi hauv phau Vajlugkub uas koj xav muab coj mus qhia rau lwm tus thiab?
IB TXHIA HAIS TIAS: “Leej twg yuav pe hawm Vajtswv li cas los xij tsuas yog nws ua ib tug neeg zoo xwb.”
-
Koj xav li cas?
KOJ KAWM TAU DAB TSI
Yog peb pe hawm Yehauvas tib leeg, qhuas nws thaum tuaj kev sib txoos, thiab qhia rau lwm tus txog tej uas peb kawm tau ces yuav ua rau Yehauvas zoo siab heev.
Rov Tham Dua
-
Yuav ua li cas peb thiaj paub pe hawm Vajtswv raws li nws siab nyiam?
-
Vim li cas peb yuav tsum pe hawm Yehauvas tib leeg xwb?
-
Vim li cas peb yuav tsum nrog cov uas xav ua haum Vajtswv siab pe hawm ua ke xwb?
TSHAWB NTXIV
Mus nyeem zaj “Kuv Tsis Ua Qhev Rau Cov Mlom Ntxiv Lawm”, seb ib tug poj niam tau ua li cas nws thiaj nti dim ntawm tej kev pe dab mlom lawm.
“Vajlugkub Kho Tau Lub Neej” (Phau Tsom Faj lub 7 Hli tim 1 xyoo 2011)
Kawm seb dab tsi thiaj pab tau koj xav tsa tes teb ntawm tej kev sib txoos.
“Qhuas Yehauvas Hauv Lub Koom Txoos” (Phau Tsom Faj lub 1 Hlis xyoo 2019)
Saib seb thaum ib tug tub hluas mus tej kev sib txoos ho pab tau nws li cas txawm tias tsis yooj yim rau nws kiag li.
Muaj coob tus xav tias tus ntoo khaub lig yog ua txog kev ntseeg Vajtswv, tiam sis puas zoo rau peb siv los pe hawm Vajtswv?
a Peb yuav tham txog cov ntsiab no rau lwm zaj kawm.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
