ZAJ KAWM 40
Yuav Ua Li Cas Peb Thiaj Dawb Huv Rau Yehauvas?
Thaum yuav tawm rooj mus ib qho twg, leej niam muab nws tus me nyuam da dej thiab muab khaub ncaws huv si rau nws hnav kom luag tej pom los luag paub tias nws niam thiab nws txiv hlub nws thiab tsis xav kom nws muaj mob. Zoo ib yam ntawd, peb Leej Txiv Yehauvas los xav kom peb ua neeg nyiam huv thiab ua neeg dawb huv. Yog peb ua li no ces yuav pab tau peb thiab peb yuav ua rau Yehauvas tau koob meej.
1. Peb yuav ua neeg nyiam huv li cas?
Yehauvas hais tias, ‘Nej yuav tsum ua neeg dawb huv.’ (1 Petus 1:16) Tus neeg dawb huv yuav tsum nyiam huv thiab. Tus neeg nyiam huv yuav nquag da dej, hnav khaub ncaws kom huv si, tu vaj tse qab vag tsib taug kom du lug, thiab tu lub tsheb kom du dais. Nws kuj mus pab tu lub Tsev Nceeg Vaj thiab. Yog peb ua neeg nyiam huv ces yuav pab tau peb thiab yuav coj tau lub koob lub npe zoo los rau Yehauvas.—2 Kauleethaus 6:3, 4.
2. Tus neeg dawb huv yuav tsis ua tej yam twg?
Phau Vajlugkub hais tias, ‘Peb yuav tsum tso plhuav tej kev txhaum uas peb ua thiab peb xav huv tib si tseg.’ (2 Kauleethaus 7:1) Yog li, tus neeg dawb huv yuav tsis ua tej uas yuav ua rau nws lub cev los sis nws lub hlwb puas, thiab tej uas nws xav los yuav tsum haum Yehauvas siab. Yog li ntawd, peb yuav tsum tsis txhob xav txog tej uas tsis dawb huv. (Phau Ntawv Nkauj 104:34) Thiab peb yuav tsum tsis txhob hais tej lus phem lus qias.—Nyeem Kaulauxais 3:8.
Muaj tej yam uas yuav ua rau peb lub cev tsis huv thiab muaj mob. Xws li haus luam yeeb, ntsuas peeb lab, los sis haus yeeb haus tshuaj. Yog peb saib txoj sia uas Yehauvas muab rau peb muaj nqis ces peb yuav zam tsis ua tej no kom peb thiaj li noj qab nyob zoo. Peb kuj yuav tsum zam tej uas Yehauvas hais tias tsis dawb huv, xws li kov yus qhov chaw mos thiab saib duab liab qab. a (Phau Ntawv Nkauj 119:37; Efexus 5:5) Yeej tsis yooj yim tso tej no tseg tiam sis Yehauvas yuav pab peb kom peb ua tau.—Nyeem Yaxayas 41:13.
KAWM NTXIV
Cia peb tham seb yog vim li cas cov uas dawb huv thiaj ua rau Yehauvas tau koob meej. Thiab yuav ua li cas peb thiaj li thum tau tej uas tsis dawb huv.
3. Cov neeg nyiam huv ua rau Yehauvas tau koob meej
Thaum peb nyeem txog tej kev cai uas Yehauvas muab rau haiv neeg Ixayees, peb pom tias qhov uas Yehauvas sam hwm kom lawv ua neeg nyiam huv ntawd tseem ceeb heev rau nws. Nyeem Khiav Dim 19:10 thiab 30:17-19 thiab tham txog ob lo lus no:
-
Cov nqe Vajlugkub no qhia tias kev nyiam huv tseem ceeb npaum li cas rau Yehauvas?
-
Koj yuav ua li cas koj thiaj ua tau ib tug neeg nyiam huv?
Ua neeg nyiam huv yeej tsis yooj yim vim peb yuav tsum nquag thiab siv sij hawm ntau. Tiam sis txawm peb yuav nyob qhov twg thiab yuav muaj yuav pluag los peb sawv daws yeej ua tau. Saib zaj YEEB YAJ KIAB thiab tham txog lo lus no:
-
Vim li cas cov uas peb mus tshaj tawm rau thiaj qhuas Yehauvas thaum lawv pom tias peb tu peb tej teej tug zoo thiab huv si?
4. Thum tej uas tsis zoo
Yehauvas yeej pab tau peb tso tej yam uas tsis dawb huv tseg
Yog koj haus luam yeeb los sis haus yeeb haus tshuaj ces yeej tsis yooj yim rau koj muab tso tseg. Yuav ua li cas koj thiaj li thum tau? Nyeem Mathais 22:37-39 thiab tham seb kev haus luam yeeb los sis haus yeeb haus tshuaj yuav ua tau li cas rau . . .
-
koj txoj kev sib raug zoo nrog Yehauvas.
-
koj tsev neeg thiab cov uas koj nrog ua ke.
Xav seb koj yuav ua li cas koj thiaj thum tau yeeb tau tshuaj. b Saib zaj YEEB YAJ KIAB.
Nyeem Filipis 4:13 thiab tham txog lo lus no:
-
Vim li cas thaum peb niaj hnub thov Vajtswv, kawm Vajlugkub, thiab mus kev sib txoos tsis tu ncua thiaj pab tau peb muab tej kev phem tso pov tseg?
5. Ua kom yeej tej kev xav uas tsis huv thiab kev phem kev qias
Nyeem Kaulauxais 3:5 thiab tham txog ob lo lus no:
-
Vim li cas saib duab liab qab, ntaus ntawv hais lus dev lus npua thiab xa duab liab qab rau lwm tus, thiab kov los sis rhoob yus qhov chaw mos thiaj tsis huv rau Yehauvas?
-
Koj puas xav tias qhov uas Yehauvas xav kom peb ua neeg dawb huv ntawd yeej yog ib qho uas peb yeej ua tau? Piav seb yog vim li cas koj thiaj xav li ntawd.
Saib seb yuav ua li cas koj thiaj li tsis xav txog tej uas tsis dawb huv. Saib zaj YEEB YAJ KIAB.
Yexus zaj lus piv txwv qhia tias peb yuav tsum ua li cas peb thiaj ua tau neeg dawb huv. Nyeem Mathais 5:29, 30 thiab tham txog lo lus no:
-
Yexus yeej tsis kom peb dawj peb lub qhov muag tawm los sis txiav peb phab tes pov tseg tiag tiag. Tiam sis nws qhia meej tias peb yuav tau muab tej uas yuav ua rau peb raug kev puas tsuaj tso kiag pov tseg. Yog li, yuav ua li cas peb thiaj tsis pheej xav txog tej yam uas tsis dawb huv? c
Thaum koj rau siab ua kom koj tsis txhob xav txog tej yam uas tsis dawb huv, Yehauvas yeej pom. Nyeem Phau Ntawv Nkauj 103:13, 14 thiab tham txog lo lus no:
-
Yog hais tias tseem nyuaj heev rau koj tso tseg tej yam uas tsis dawb huv, nqe Vajlugkub no yuav pab tau koj li cas?
Rau siab ntso, tsis txhob tso tseg!
Yog koj pheej rov mus ua kev txhaum kev tsis dawb huv, tej zaum koj yuav xav tias, ‘Kav liam, kuv yeej yuav tso tseg tsis tau li.’ Tiam sis muab xav li no, thaum ib tug neeg mus sib tw khiav es nws ntog ib teeg los tsis txhais hais tias nws swb lawm, los sis nws yuav tau rov pib khiav pem hauv paus tuaj dua. Zoo ib yam li ntawd, yog hais tias nyob nyob koj ho rov ua yuam kev ib zaug los, tsis txhais hais tias koj yeej yuav tso tseg tsis tau li, thiab tsis txhais hais tias qhov uas koj rau rau siab hloov tsis muaj nuj nqis. Peb yog neeg xwb ces muaj tej thaud peb yuav rov ua yuam kev. Tiam sis kav tsij rau siab ntso hloov! Muaj Yehauvas pab koj, koj yeej yuav tso tau tej ntawd tseg.
IB TXHIA HAIS TIAS: “Kuv muaj yees lawm, kuv yeej tso tseg tsis tau.”
-
Koj yuav siv nqe Vajlugkub twg los txhawb ib tug tias Yehauvas yeej pab tau nws muab tej uas tsis dawb huv tso pov tseg?
KOJ KAWM TAU DAB TSI
Yog peb nyiam huv thiab txhua yam peb xav thiab peb ua los dawb huv ces peb yuav ua rau Yehauvas zoo siab.
Rov Tham Dua
-
Vim li cas thiaj tseem ceeb rau peb ua neeg dawb huv?
-
Koj yuav ua li cas koj thiaj ua tau ib tug neeg nyiam huv?
-
Koj yuav ua li cas koj thiaj yuav tsis xav txog tej uas tsis dawb huv thiab tsis mus ua kev phem kev qias?
TSHAWB NTXIV
Txawm hais tias peb txom nyem los, yeej muaj tej yam uas peb ua tau kom peb nyob tau huv si.
Muaj ntau txoj hau kev uas yuav pab tau koj thum luam yeeb.
“Yuav Thum Luam Yeeb Li Cas?” (Tsim Dheev! lub 5 Hlis xyoo 2010)
Yuav ua li cas rau cov uas saib duab liab qab?
“Saib Duab Liab Qab Puas Phem?” (Phau Tsom Faj lub 8 Hli tim 1 xyoo 2013)
Ib tug txiv neej muaj yees saib duab liab qab. Nws ua li cas nws thiaj tso tseg tau?
“Kuv Ua Ntau Zaus Kuv Mam Tso Tseg Tau” (Phau Tsom Faj Phau 4 Xyoo 2016)
a Hmoob ib txwm txaj muag piav txog tej uas yuav hais no, tiam sis yuav tau piav kom meej sawv daws thiaj yuav to taub tias Yehauvas xav kom nws cov tib neeg coj li cas tiag.
b Mus nyeem zaj “Yuav Thum Luam Yeeb Li Cas?” hauv ntu Tshawb Ntxiv seb yuav ua li cas koj thiaj thum tau luam yeeb.
c Yog xav paub seb yuav ua li cas koj thiaj tso tau tseg tsis kov koj qhov chaw mos ces mus nyeem zaj “Yuav Ua Li Cas Kuv Thiaj Tswj Tau Tsis Kov Kuv Chaw Mos?” hauv phau ntawv Kev Pab Rau Cov Hluas, Phau 1 Tshooj 25.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
