TABTOM muaj li cas hauv daim duab no? Phem kawg li, puas yog? Lawv tabtom muab Yexus tua. Lawv muab nws ntsia rau saum tus ncej ntoo. Lawv muab ntsia hlau los ntsia nws 2 txhais tes thiab 2 txhais taw huv tibsi. Vim li cas lawv ho ua phem li no rau Yexus?

Yog vim muaj ib txhia ntxub Yexus. Koj puas paub cov uas ntxub Yexus yog leejtwg? Muaj ib tug yog Xatas uas yog Ntxwg Nyoog. Nws yog ib tug tubtxib saum ntuj uas limhiam heev. Nws yog tus uas ntxias tau Adas thiab Eva kom txhob mloog Yehauvas lus. Thiab Xatas yog tus uas ntxias kom Yexus cov yeeb ncuab muab Yexus tua pov tseg.

Ua ntej Yexus cov yeeb ncuab muab Yexus ntsia rau saum tus ncej no, lawv twb ua phem kawg li rau nws lawm. Koj puas nco qab thaum lawv tuaj ntes Yexus hauv lub vaj Kexemane? Cov yeeb ncuab uas tuaj ntes Yexus ntawd yog leejtwg? Twb yog cov thawj coj ntag. Cia peb kawm saib tau muaj li cas tom qab lawv ntes Yexus.

Thaum cov thawj coj tuaj ntes Yexus, nws cov tubtxib khiav tas lawm. Lawv tso Yexus tib leeg tseg nrog nws cov yeeb ncuab, vim lawv ntshai heev. Tus tubtxib Petus thiab Yauhas khiav, tiamsis nkawd khiav tsis deb. Nkawd raws qab saib seb yuav muaj li cas rau Yexus.

Cov pov thawj coj Yexus mus rau ntawm tus yawg laus Anas. Anas yog tus pov thawj hlob qub. Tiamsis lawv nyob tsis ntev nrog Anas. Tom qab ntawd, lawv coj Yexus mus rau ntawm tus pov thawj hlob tshiab Khayafa tsev. Cov thawj coj coob leej tuaj ua ke hauv Khayafa tsev.

Lawv txawm hais plaub hauv Khayafa tsev. Lawv coj neeg tuaj dag txog Yexus. Cov thawj coj puavleej hais tias: ‘Yuav tsum muab Yexus tua.’ Ces lawv nto qaub ncaug rau Yexus ntsej muag, thiab xuas nrig ntaus nws.

Thaum tabtom muaj tej xwm no, Petus nyob sab nraum lub tshav puam. Hmo ntawd no heev, cov tibneeg thiaj rauv ib cub taws nte. Thaum lawv nte taws ntawm qhov cub, muaj ib tug ntxhais qhev saib saib Petus, ces nws hais tias: ‘Tus txivneej no yog ib tug nrog Yexus thiab.’

Petus txawm teb tias: ‘Tsis yog kuv!’

Muaj neeg hais 3 zaug rau Petus tias, nws yeej nrog Yexus tiag. Tiamsis txhua zaus lawv hais li ntawd Petus tsis lees li. Zaum 3 uas Petus tsis lees, Yexus txawm tig los saib Petus. Petus tu siab heev uas nws tau dag li ntawd, ces nws tawm mus sab nraud thiab quaj tu siab kawg li.

Hnub 5 (Friday) thaum kaj ntug, cov pov thawj txawm coj Yexus mus rau hauv lawv lub tsev sablaj loj, uas hu ua lub Xaheree. Ntawm qhov chaw no lawv tham saib lawv yuav ua li cas rau Yexus. Lawv txawm coj Yexus mus cuag Philaj uas yog tus nom kav lub xeev Yudia.

Cov pov thawj hais rau Philaj tias: ‘Tus txivneej no yog ib tug neeg phem. Yuav tsum muab nws tua pov tseg.’ Tom qab uas Philaj nug Yexus txog ntau yam, Philaj hais tias: ‘Kuv pom tias nws tsis tau ua ib qho txhaum li.’ Ces Philaj txawm xa Yexus mus cuag Helauj Atipa. Helauj yog tus nom kav lub xeev Kalilais, tiamsis lub caij ntawd Helauj tuaj xyuas Yeluxalees. Helauj kuj pom tias Yexus tsis tau ua ib qho txhaum li thiab. Yog li ntawd, nws thiaj xa Yexus rov mus rau Philaj.

Philaj xav tso Yexus mus. Tiamsis Yexus cov yeeb ncuab yeem tso tus neeg raug txim. Lawv tsis xav tso Yexus. Tus neeg raug txim ntawd yog tus tub sab Npalanpa. Thaum Philaj coj Yexus mus nraum zoov twb yog tav su lawm. Nws hais rau cov tibneeg tias: ‘Ntsia saib! Yog nej tus vajntxwv!’ Tiamsis cov thawj ntawm cov pov thawj qw tias: ‘Coj nws tawm mus! Muab nws tua! Muab nws tua!’ Yog li ntawd, Philaj thiaj tso Npalanpa mus, thiab lawv coj Yexus mus tua pov tseg.

Hnub 5 (Friday) thaum tav su, lawv muab Yexus ntsia rau saum ib tug ncej ntoo. Nyob ntawm Yexus ob sab, lawv muab 2 tug tub sab ntsia ib yam li lawv ntsia Yexus thiab. Tiamsis koj tsis pom nkawd nyob hauv daim duab. Ua ntej Yexus yuav tuag, 2 tug tub sab ntawd muaj ib tug txawm hais rau Yexus tias: ‘Thaum koj kav koj lub nceeg vaj thov koj nco txog kuv thiab.’ Yexus teb nws tias: ‘Kuv cog lus rau koj tias koj yuav nrog kuv nyob hauv lub Vaj Kaj Siab.’

Lo lus cog tseg no zoo kawg nkaus li, puas yog? Koj puas paub Yexus hais txog lub vaj kaj siab twg? Koj puas nco qab thaum chiv keeb Vajtswv tsim lub vaj kaj siab nyob qhovtwg? Twb yog nyob hauv lub ntiajteb no. Yog li ntawd, thaum Yexus ua vajntxwv kav saum ntuj ceeb tsheej, nws yuav tsa kom tus txivneej no ciaj sawv rov los nyob hauv lub Vaj Kaj Siab tshiab hauv lub ntiajteb no. Tej no ua rau peb zoo siab kawg li, puas yog?