TOM QAB dej nyab ntiajteb tas muaj ib qho chaw uas tibneeg tau khiav mus nyob hu ua Aw. Qhov chaw ntawd tau los ua ib lub moos loj heev uas muaj vaj tse zoo kawg li. Tiamsis cov tibneeg ntawd pe hawm tej vajtswv cuav, ib yam li thaum lawv nyob hauv Npanpee thiab. Cov tibneeg uas nyob hauv Aw thiab Npanpee tsis coj zoo li Nau-a thiab nws tus tub Xeeb uas teev tiam Yehauvas tsis tseg.

Tau 350 xyoo tom qab dej nyab, Nau-a uas yog tus neeg ncaj ncees mam li tuag. Ob xyoos tom qab ntawd mam li yug tus txivneej uas koj pom hauv daim duab no. Nws yog ib tug neeg tseem ceeb heev rau Vajtswv. Nws lub npe hu ua Aplahas. Nws nrog nws tsev neeg nyob hauv lub moos Aw.

Muaj ib hnub Yehauvas hais rau Aplahas tias: ‘Cia li khiav tawm ntawm lub moos Aw, tso koj cov kwvtij neej tsa tseg mus nyob lub tebchaws uas kuv yuav qhia rau koj.’ Aplahas puas mloog Vajtswv lus es tso tag nrho tej yam zoo hauv lub moos Aw tseg? Nws tau ua li ntawd. Aplahas yeej ib txwm ua raws li Vajtswv hais, nws thiaj yog Vajtswv tus phoojywg.

Aplahas tsev neeg ib txhia nrog nws khiav tawm hauv lub moos Aw mus. Nws txiv Thela nrog nws mus. Nws tus tijlaug tus tub Lauj kuj nrog nws mus. Thiab nws tus pojniam Xala nrog nws mus. Tom qab ntawd lawv thiaj los txog rau lub moos Halas. Thela tuag hauv lub moos ntawd. Lawv nyob deb heev ntawm lub moos Aw lawm.

Ib ntus tom qab Thela tuag lawm, Aplahas thiab nws tsev neeg khiav tawm hauv Halas mus nyob ib lub tebchaws hu ua Khana-as. Nyob hauv Khana-as tebchaws Yehauvas hais rau Aplahas tias: ‘Lub tebchaws no kuv yuav muab pub rau koj cov menyuam nyob.’ Aplahas thiaj tsa tsev ntaub nyob hauv Khana-as.

Vajtswv tau pab Aplahas muaj tej pab yaj coob coob thiab lwm yam tsiaj txhu. Nws muaj tub qhe coob heev thiab. Tiamsis Aplahas thiab Xala tsis muaj ib tug menyuam li.

Thaum Aplahas muaj 99 xyoos lawm, Yehauvas cog lus rau nws tias: ‘Koj yuav ua ntau haiv neeg leej txiv.’ Tiamsis yuav ua li cas muaj tau li ntawd, rau qhov Aplahas thiab Xala laus heev lawm, twb dhau lub caij muaj menyuam lawm?