YAUXEJ xav paub saib nws 10 tus tijlaug puas tseem phem li qub. Yog li ntawd, Yauxej thiaj hais tias: ‘Nej yog neeg tshuaj tebchaws xwb. Nej xav tuaj tshuaj saib peb lub tebchaws puas qaug zog.’

Lawv teb tias: ‘Tsis yog li koj hais. Peb yog neeg ncaj ncees. Peb sawvdaws puavleej yog kwvtij. Peb muaj 12 leeg kwvtij. Tiamsis ib tug tsis nyob lawm, thiab tus tub ntxawg nrog peb txiv nyob pem tsev.’

Yauxej ua txuj tsis ntseeg lawv hais li. Nws muab nws tus tijlaug Xime-oo kaw rau hauv nkuaj. Tiamsis nws cia cov thauj mov mus tsev. Thiab nws hais rau lawv tias: ‘Thaum nej rov qab tuaj, nej yuav tsum coj nej tus kwv ntxawg nrog nej tuaj.’

Thaum Yauxej cov tijlaug rov mus txog pem Khana-as tebchaws, lawv qhia txhua yam rau lawv txiv Yakhauj paub. Yakhauj nyuaj siab heev. Nws quaj tias: ‘Twb tsis muaj Yauxej lawm es zaum no ho tsis muaj Xime-oo lawm thiab. Kuv yuav tsis cia kuv tus tub Npeeyamee nrog nej mus.’ Tiamsis thaum lawv tej mov yuav tas, Yakhauj mam li tso Npeeyamee nrog lawv mus nram Iyi tebchaws mus yuav mov ntxiv.

Thaum Yauxej pom nws cov kwvtij rov tuaj, nws zoo siab heev tau pom nws tus kwv Npeeyamee. Tiamsis lawv tsis muaj ib tug paub tias tus neeg tseem ceeb ntawd yog Yauxej li. Yauxej thiaj sim nws 10 tus tijlaug.

Yauxej hais kom cov tub qhe muab nplej ntim lawv tej hnab puv nkaus. Yauxej kuj hais kom cov tub qhe muab nws lub khob nyiaj ntsaws rau hauv Npeeyamee lub hnab, tiamsis Yauxej tsis pub qhia rau nws cov kwvtij paub. Tom qab lawv tawm hauv nroog mus tsis tau deb, Yauxej xa nws cov tub qhe caum lawv qab. Thaum cov tub qhe caum cuag cov kwvtij lawm, cov tub qhe hais tias: ‘Vim li cas nej nyiag peb tus tswv lub khob nyiaj lawm?’

Tag nrho cov kwvtij hais tias: ‘Peb tsis tau nyiag nws lub khob. Yog tias nej nrhiav tau lub khob ntawm peb cov no ib tug twg, cia li muab tus ntawd tua.’

Yog li ntawd, cov tub qhe thiaj tshawb tag nrho cov hnab. Lawv nrhiav tau lub khob nyob hauv Npeeyamee lub hnab, zoo li koj pom hauv daim duab no. Cov tub qhe hais tias: ‘Nej mus tsev los tau, tiamsis Npeeyamee yuav tsum nrog peb mus.’ Zaum no Yauxej 10 tus tijlaug yuav ua li cas xwb?

Lawv sawvdaws puavleej nrog Npeeyamee rov mus rau ntawm Yauxej tsev. Yauxej hais rau nws cov kwvtij tias: ‘Nej sawvdaws mus tsev los tau, tiamsis Npeeyamee yuav tsum nyob ua kuv qhev.’

Yuda thiaj li hais rau Yauxej tias: ‘Yog kuv mus txog tsev es tsis coj tus tub no mus, kuv txiv yuav cia li tuag rau qhov nws hlub tus tub no heev. Yog li ntawd, thov cia kuv nyob qhov no ua koj qhev, tiamsis tso tus tub mus tsev.’

Yauxej pom tias nws cov tijlaug hloov siab lawm tiag. Lawv tsis phem li yav thaum ub lawm. Cia peb kawm saib Yauxej ua li cas ntxiv.