KOJ puas paub lawv siv lub tsev hauv daim duab no ua dabtsi? Lub tsev ntawd yog ib lub tsev ntaub uas tseem ceeb heev siv los pe hawm Yehauvas. Lub tsev ntawd kuj hu ua lub tsev ntaub sib ntsib. Ib xyoos tom qab lawv khiav tawm Iyi tebchaws, lawv mam li ua tau lub tsev ntawd. Koj puas paub leejtwg hais kom lawv ua lub tsev ntaub?

Yehauvas yog tus hais kom lawv ua. Thaum Mauxe tseem nyob saum Roob Xinai, Yehauvas qhia kom nws paub ua lub tsev ntawd. Yehauvas qhia lawv ua lub tsev ntaub kom yoojyim tsa thiab yoojyim rhuav. Thaum lawv mus rau lwm qhov chaw, lawv thiaj kwv tau lub tsev ntaub nrog lawv mus, thiab rov qab muab tsa dua. Yog li ntawd, thaum cov Yixayee khiav ib qho rau ib qho hauv tebchaws moj sab qhua, lawv kwv lub tsev ntaub nrog lawv mus.

Yog tias koj ntsia hauv chav me me tom kawg ntawm lub tsev ntaub, koj yuav pom ib lub thawv, lossis ib lub phij xab. Lub ntawd hu ua lub phij xab sib cog lus. Muaj 2 tug tubtxib saum ntuj, lossis khelunpee, uas xuas kub ua nyob saum lub phij xab, 1 tug nyob rau ib tog. Vajtswv rov qab sau 10 Txoj Kevcai rau 2 daim txiag zeb, rau qhov Mauxe twb muab thawj 2 daim ua tawg lawm. Ces lawv muab 2 daim txiag zeb ntawd khaws cia rau hauv lub phij xab sib cog lus. Kuj muaj 1 hub mana nyob rau hauv thiab. Koj puas nco qab mana yog dabtsi?

Mauxe tus tijlaug Aloo yog tus uas Yehauvas xaiv los ua tus pov thawj hlob. Nws yog tus coj cov tibneeg pe hawm Yehauvas. Aloo cov tub kuj ua pov thawj thiab.

Koj puas pom chav tsev ntaub loj loj? Chav ntawd loj dua chav me 2 npaug. Koj puas pom lub thawv, lossis lub phij xab me me, uas ncho pa lug ntawd? Lub no yog lub thaj uas cov pov thawj hlawv hmoov tshuaj tsw qab. Thiab muaj ib tug ncej txawb teeb uas muaj 7 lub teeb. Thiab yam 3 uas nyob hauv chav tsev no yog ib lub rooj. Nyob saum lub rooj no muaj 12 lub ncuav tso rau saud.

Nyob hauv lub tshav puam ntawm lub tsev ntaub sib ntsib, muaj ib lub hub loj heev, lossis ib lub rhawv, uas ntim dej. Cov pov thawj siv cov dej ntawd los ntxuav tes ntxuav taw. Kuj muaj ib lub thaj loj loj thiab. Lawv muab cov tsiaj uas lawv tua, hlawv xyeem rau Yehauvas saum lub thaj loj loj ntawd. Lub tsev ntaub nyob hauv plawv, thiab cov Yixayee tsa lawv tej tsev ntaub nyob puag ncig.