IB XYOOS tas ib xyoos tuaj​—10 xyoo, 20 xyoo, 30 xyoo, 39 xyoos, los cov Yixayee tseem nyob hauv tebchaws moj sab qhua li qub. Nyob rau lub sijhawm ntawd Yehauvas yeej saib xyuas nws cov tibneeg. Nws pub mana rau lawv noj. Nws tso ib tug ncej huab coj lawv thaum nruab hnub, thiab ib tug ncej hluavtaws coj lawv thaum hmo ntuj. Thiab lub sijhawm ntawd lawv tej khaubncaws tsis ntuag thiab lawv tej kotaw tsis mob.

Twb tau 40 xyoo lawm, txij thaum cov Yixayee tawm hauv Iyi tebchaws los. Lawv rov los txog ntawm Khade. Khade yog qhov chaw uas Mauxe tau txib 12 tug txivneej mus tshuaj tebchaws Khana-as. Mauxe tus muam Mili-as tuag rau ntawm Khade. Peb yuav kawm tias cov Yixayee rov qab muaj teeb meem ntawm qhov chaw no, ib yam li yav thaum ub thiab.

Cov tibneeg nrhiav tsis tau dej haus. Ces lawv txawm yws rau Mauxe tias: ‘Yog peb tuag ntshe yuav zoo dua. Vim li cas koj yuav coj peb tawm hauv Iyi tebchaws los nyob ib lub tebchaws phem ua luaj li? Tsis muaj ib yam dabtsi tuaj taus li. Tsis muaj nplej, tsis muaj txiv cev, tsis muaj txiv hmab, tsis muaj txiv ntsiav kws. Twb tsis muaj ib qho dej haus li thiab.’

Thaum Mauxe thiab Aloo mus rau ntawm lub tsev ntaub sib ntsib mus thov Vajtswv, Yehauvas hais rau Mauxe tias: ‘Hais kom cov tibneeg tuaj sib sau ua ke. Thaum sawvdaws tuaj ua ke lawm, koj cia li hais lus rau phab pob zeb rau lawv saib ntsoov. Yuav muaj dej tawm hauv phab pob zeb los txaus rau cov tibneeg thiab cov tsiaj haus.’

Yog li ntawd, Mauxe thiaj hu kom cov tibneeg tuaj, thiab nws hais rau lawv tias: ‘Nej cov uas tsis tso siab rau Vajtswv, cia li mloog! Puas yog Aloo wb yuav tsum ua dej tawm hauv lub pob zeb no los rau nej haus?’ Ces Mauxe txawm muab nws tus pas ntaus phab pob zeb 2 teg, thiab dej txawm tawm hlob heev hauv phab pob zeb los. Muaj dej txaus rau tag nrho cov tibneeg thiab cov tsiaj haus.

Tiamsis Yehauvas npau taws rau Mauxe thiab Aloo nkawd. Koj puas paub yog vim li cas? Twb yog vim Mauxe thiab Aloo tau hais tias nkawd yuav ua dej tawm hauv phab pob zeb los. Tiamsis tiag tiag yog Yehauvas ua xwb. Vim Mauxe thiab Aloo tsis qhia qhov tseeb, Yehauvas thiaj hais tias nws yuav rau txim rau nkawd. Yehauvas hais tias: ‘Koj yuav tsis tau coj kuv haiv neeg mus rau hauv Khana-as tebchaws.’

Tsis ntev xwb ces cov Yixayee tawm hauv Khade mus. Tom qab ntawd lawv los txog ntawm lub Roob Hau. Aloo los tuag rau saum lub roob ntawd. Lub sijhawm Aloo tuag nws muaj 123 xyoos. Cov Yixayee nyuaj siab heev, lawv thiaj quaj Aloo tau 30 hnub. Aloo tus tub Ele-axa tau los ua haiv neeg Yixayee tus pov thawj hlob tshiab.