HAUV daim duab no, tus txivneej uas ntog rau hauv av yog leejtwg? Tus txivneej ntawd yog Xolau. Koj puas nco qab Xolau yog leejtwg? Thaum tibneeg muab pob zeb ntaus Xatefanau, Xolau yog tus uas saib lawv cov tsho ntev. Hauv daim duab no, koj puas pom tus duab ci ci ntawd? Ua li cas ho muaj li no?

Tom qab Xatefanau tuag lawm, Xolau yog tus uas mus tsim txom Yexus cov thwjtim. Nws mus ib lub tsev rau ib lub tsev, mus ntes Yexus cov thwjtim coj mus kaw. Yexus cov thwjtim coob leej thiaj khiav mus rau lwm lub nroog. Lawv qhia “txoj xov zoo” rau tej nroog ntawd. Tiamsis Xolau tseem mus nrhiav Yexus cov thwjtim rau tej nroog ntawd thiab. Hauv daim duab no, nws tabtom mus rau lub nroog Damaxaka. Tiamsis thaum nws mus, txawm muaj ib yam txawv heev tshwm sim.

Txawm muaj ib tug duab ci ntsa iab tuaj rau Xolau, nws thiaj vau hlo rau hauv av, zoo li peb pom hauv daim duab no. Ces muaj ib lub suab hais tuaj tias: ‘Xolau, Xolau! Ua li cas koj ua phem rau kuv?’ Cov txivneej uas nrog Xolau ua ke ntawd, pom tus duab ci, thiab lawv hnov lub suab, tiamsis lawv tsis to taub cov lus ntawd.

Xolau thiaj nug tias: ‘Tus Tswv, koj yog leejtwg?’

Lub suab ntawd teb tias: ‘Kuv yog Yexus, tus uas koj ua phem rau.’ Yexus hais li no rau qhov thaum Xolau tsim txom Yexus cov thwjtim, ces zoo ib yam li Xolau tsim txom Yexus thiab.

Xolau nug ntxiv tias: ‘Tus Tswv, kuv yuav tsum ua li cas?’

Yexus teb tias: ‘Cia li sawv tsees thiab mus rau lub nroog Damaxaka. Thaum koj mus txog, yuav muaj neeg qhia rau koj paub tias koj yuav tsum ua li cas.’ Thaum Xolau sawv los thiab qheb qhov muag, ua ciav nws tsis pom kev lawm! Cov txivneej uas nrog Xolau ua ke thiaj tuav nws tes, coj nws mus rau hauv Damaxaka.

Hauv Damaxaka, Yexus hais rau nws ib tug thwjtim tias: ‘Anania, cia li sawv tsees, mus rau txojkev hu ua Kev Ncaj. Mus nrhiav tus txivneej hu ua Xolau hauv Yudas tsev. Kuv tau xaiv Xolau los ua tes haujlwm tseem ceeb heev.’

Anania ua raws li Yexus hais. Thaum Anania ntsib Xolau, nws cev tes tuav Xolau thiab hais tias: ‘Tus Tswv txib kuv tuaj pab kom koj rov qab pom kev, thiab kom koj tau Vajtswv lub hwj huam dawb huv.’ Tamsim ntawd, txawm muaj ib yam zoo li daim nplai ntses poob hauv Xolau qhov muag los, nws thiaj rov qab pom kev.

Yexus tau txib Xolau mus ua tes haujlwm tseem ceeb heev. Nws tshaj tawm txoj xov zoo rau ntau haiv neeg. Tom qab no, luag muab nws hu ua tus tubtxib Povlauj. Peb tseem yuav kawm txog nws ntxiv. Tiamsis ua ntej ntawd, cia peb kawm saib Vajtswv txib Petus mus ua dabtsi.