KOJ puas paub vim li cas tus txivneej hauv daim duab no tabtom muab nws lub tsho dua ua tej daim? Yehauvas hais kom nws ua li ntawd. Nws lub npe hu ua Ahiya. Nws yog ib tug txivneej cev Vajtswv lus. Vajtswv qhia nws txog tej uas yuav muaj tshwm sim rau yav tom ntej.

Hauv daim duab no Ahiya tabtom hais lus rau Yelaunpau-as. Yelaunpau-as yog ib tug txivneej uas Xalaumoo tsa los saib xyuas cov neeg ua vaj ua tsev. Thaum Ahiya ntsib Yelaunpau-as ntawm txojkev no, Ahiya ua ib yam uas txawv heev. Nws muab nws lub tsho tshiab hle los dua ua 12 daim. Nws hais rau Yelaunpau-as tias: ‘Coj 10 daim mus rau koj yuav.’ Koj puas paub vim li cas Ahiya muab 10 daim rau Yelaunpau-as?

Ahiya piav tias Yehauvas yuav muab lub nceeg vaj tshem tawm ntawm Xalaumoo mus. Thiab Ahiya hais tias Yehauvas yuav muab 10 xeem rau Yelaunpau-as kav. Yog li ntawd, tsuas tshuav 2 xeem rau Lehaunpau-as kav lawm xwb.

Thaum Xalaumoo hnov txog qhov uas Ahiya hais rau Yelaunpau-as, nws npau taws heev. Nws nrhiav kev muab Yelaunpau-as tua. Yelaunpau-as thiaj khiav mus nyob nram Iyi tebchaws. Thaum Xalaumoo kav tau 40 xyoo lawm, nws mam li tuag. Lawv thiaj tsa Xalaumoo tus tub Lehaunpau-as ua vajntxwv. Thaum Yelaunpau-as hnov tias Xalaumoo tuag lawm, nws thiaj li tawm hauv Iyi tebchaws rov los nyob hauv Yixayee tebchaws.

Lehaunpau-as tsis yog ib tug vajntxwv uas coj zoo. Nws tseem ua phem tshaj nws txiv Xalaumoo ua rau cov tibneeg thiab. Yelaunpau-as thiab ib co neeg tseem ceeb thiaj mus cuag Vajntxwv Lehaunpau-as thiab thov kom nws ua zoo rau cov tibneeg. Tiamsis Lehaunpau-as tsis mloog li. Nws tseem ua phem tshaj yav tas los. Yog li ntawd, cov tibneeg thiaj tsa Yelaunpau-as ua vajntxwv kav 10 xeem, tiamsis xeem Npeeyamee thiab xeem Yuda cia Lehaunpau-as ua lawv tus vajntxwv.

Yelaunpau-as tsis xav kom nws cov tibneeg mus pe hawm ntawm Yehauvas lub tuam tsev uas nyob hauv Yeluxalees. Yog li ntawd, nws thiaj ua 2 tug thav nyuj kub. Ces nws hais kom 10 xeem hauv lub nceeg vaj uas nws kav mus pe hawm 2 tug mlom ntawd. Tsis ntev tom qab ntawd, muaj tej neeg tsis coj cai thiab kev ua nruj ua tsiv nyob thoob lub tebchaws.

Nyob hauv lub nceeg vaj uas muaj 2 xeem los kuj muaj teeb meem thiab. Thaum Lehaunpau-as ua vajntxwv yuav luag tau 5 xyoos, Iyi tus vajntxwv txawm tuaj ntaus Yeluxalees. Nws txeeb tau nyiaj txiag ntau heev hauv Yehauvas lub tuam tsev mus. Yog li ntawd, lub tuam tsev thiaj zoo nkauj ib ntus xwb, tsis zoo li thaum nyuam qhuav ua tau lawm.