Ob lub hlis tom qab cov Yixayee tawm Iyi tebchaws, lawv los tsuam chaw rau ntawm lub Roob Xinai. Yehauvas hu kom Mauxe nce mus rau saum roob. Thaum Mauxe mus txog saud, Yehauvas hais tias: ‘Kuv tau cawm cov Yixayee dim. Yog tias lawv mloog thiab coj kuv tej kevcai, lawv yuav yog ib haiv neeg tshwj xeeb rau kuv.’ Mauxe nqes rov los qhia Yehauvas tej lus rau cov Yixayee. Ua li cov Yixayee puas yuav mloog Yehauvas hais? Lawv teb tias: ‘Peb yuav ua txhua yam uas Yehauvas tau hais.’

Tom qab ntawd, Mauxe rov nce mus rau saum roob. Yehauvas hais ntxiv tias: ‘Peb hnub saum no, kuv yuav muab lus rau koj. Mus qhia rau cov Yixayee tias tsis txhob pub leejtwg nce tuaj saum lub Roob Xinai.’ Mauxe thiaj rov los qhia Yehauvas tej lus rau cov Yixayee, thiab npaj tos seb Yehauvas yuav muab lus li cas ntxiv rau lawv coj.

Peb hnub tom qab ntawd, cov Yixayee pom xob laim liab vog, thiab muaj huab tsaus nti saum lub roob. Cov Yixayee kuj hnov xob nthe thiab ib lub suab raj kub yaj nrov heev. Yehauvas nyob hauv cov nplaim taws nqes los rau saum lub roob. Thaum cov pejxeem pom tej no, lawv ntshai tshee na xwb. Lub roob ua zog koog thiab muaj pa ncho puv nkaus. Lub suab raj kub yaj txawm nrov heev zuj zus. Ces Vajtswv hais tias: ‘Kuv yog Yehauvas. Nej yuav tsum tsis txhob pe lwm tus vajtswv.’

Mauxe rov nce mus saum roob. Yehauvas qhia tej kevcai uas Nws xav kom Mauxe coj los rau cov pejxeem xwv lawv thiaj paub pe hawm Nws. Mauxe muab tag nrho tej kevcai ntawd sau cia thiab coj mus nyeem rau cov Yixayee mloog. Lawv thiaj cog lus tias: ‘Peb yuav ua txhua yam raws li Yehauvas hais.’ Cov Yixayee cog lus rau Vajtswv li ntawd. Tiamsis lawv puas yuav ua raws li lawv tau cog tseg?