TEJ kev lig kevcai uas tibneeg niaj hnub ua tsis yog los ntawm phau Vajlugkub. Yog tias koj tshawb nrhiav tej kevcai ntawd seb los qhovtwg los, koj yuav pom tias tsis yog pib li koj xav. Cia peb kawm seb ib txhia kevcai pib li cas.

Kevcai Easter. Phau ntawv The Encyclopædia Britannica tau hais tias: “Phau Tshiab tsis muaj ib nqes uas qhia tias tibneeg ua lub koob tsheej Easter.” Txoj kevcai Easter los qhovtwg los? Los ntawm cov neeg uas tsis pe hawm Vajtswv. Niaj hnub no, tibneeg xav tias txoj kevcai no yog ua nco txog thaum Yexus sawv hauv qhov tuag rov los. Tiamsis cov Khixatia yeej tsis ua tej kevcai uas txuam nrog Easter. Tibneeg nyiam siv tus luav rau txoj kevcai Easter. Tiamsis phau ntawv The Catholic Encyclopedia, qhia tias tus luav yog ib lub cim rau cov uas tsis pe hawm Vajtswv. Tus luav “ib txwm piv txwv txog kev muaj tub muaj ki.”

Ua Kevcai Xyoo Tshiab Thiab Kevcai Noj Tsiab Peb Caug. Ntau lub tebchaws muaj txoj kevcai ua Xyoo Tshiab. Nyias ua nyias rau ib lub caij. Phau ntawv The World Book Encyclopedia  hais tias: “Xyoo 46 U.Nt.Y., cov Loos tus nom hu ua Julius Caesar teem lub 1 Hlis tim 1, ua hnub ua kevcai Xyoo Tshiab. Cov Loos muab hnub ntawd cob rau tus vajtswv hu ua Janus. Nws yog tus vajtswv uas kav tej rooj loog, tej qhov rooj, thiab tej yam uas nyuam qhuav pib.” Lawv muab lub 1 Hlis (January) tis npe raws li tus vajtswv Janus. “Tus vajtswv ntawd muaj 2 lub ntsej muag, 1 lub ntsia tom hauv ntej, 1 lub ntsia tom qub qab.” Hmoob lub Tsiab Peb Caug los kuj muaj ntau yam kab lig kevcai. Xws li, hu plig, laig poj yawm, niam txiv, thiab xeeb leej xeeb ntxwv, uas twb tuag lawm thiab tso plig tag lawm. Yuav tau hu cov ntawd los nrog noj nrog haus quas lub niaj lub xyoo, kom tej kev phem nrog lub xyoo laus mus. Ua li no kom tsev neeg thiaj noj qab haus huv thiab tsis ntsib mob nkeeg rau xyoo tshiab. Ib txhia noj Tsiab Peb Caug li 3 hnub. Yog li ntawd, txoj kevcai ua Xyoo Tshiab thiab noj Tsiab Peb Caug ncau los ntawm kev ntseeg cuav.

Kevcai Halloween. Phau ntawv The Encyclopedia Americana, qhia tias txoj kevcai Halloween ncau los ntawm tej kevcai cuav uas cov neeg Celts coj puag thaum ub. Lawv coj tej no ua ntej muaj cov Khixatia. “Cov Celts ua koob tsheej rau 2 tug vajtswv loj. Ib tug yog tus vajtswv uas kav lub hnub thiab ib tug yog tus vajtswv uas kav cov tuag . . . , lub koob tsheej rau tus vajtswv uas kav cov tuag yog ua rau lub 11 Hlis tim 1, uas yog hnub pib cov Celtics lub Xyoo Tshiab.” Tom qab no tibneeg tau muab lub koob tsheej uas ua rau cov tuag, los txuam nrog tej kevcai Khixatia.

Lwm Yam Kev Lig Kevcai. Peb yuav piav tsis tas tej kev lig kevcai uas tibneeg nyiam ua hauv lub qab ntuj no. Nco ntsoov tias Yehauvas tsis txaus siab rau tej kev lig kevcai uas qhuas tibneeg thiab tibneeg tej koom haum. (Yelemi 17:5-7; Tubtxib Tes Haujlwm 10:25, 26) Peb yuav tsum nco ntsoov tshawb nrhiav seb tej kev lig kevcai pib li cas, peb thiaj paub tias Vajtswv pom zoo tej kevcai twg. (Yaxaya 52:11; Qhia Tshwm 18:4) Phau Vajlugkub tej lus qhia uas muaj nyob rau Tshooj 16 hauv phau ntawv no, yuav pab koj txiav txim siab seb Vajtswv pom zoo koj koom nrog tej kev lig kevcai twg.