1. Vim li cas tus neeg Ethi-aupia xav ua kevcai raus dej?

 NYOB rau thawj 100 xyoo, muaj ib tug txivneej Ethi-aupia tau nug tias: “Saib maj, ntawm no muaj dej. Muaj dabtsi khuam cheem ua rau kuv ua tsis tau kevcai raus dej?” Ib tug Khixatia hu ua Fili tau pab nws pom tias Yexus yog tus Mexiyas uas Vajtswv Txojlus tau cog tseg. Tej no raug tus txivneej Ethi-aupia siab kawg li. Nws thiaj txiav txim siab ua kevcai raus dej!​—Tubtxib Tes Haujlwm 8:26-36.

2. Vim li cas koj yuav tsum ua tib zoo xav txog kevcai raus dej?

² Yog tias koj twb ua tib zoo kawm phau ntawv no nrog Yehauvas ib tug Timkhawv lawm, tej zaum koj kuj yuav xav tias: ‘Muaj dabtsi khuam cheem ua rau kuv ua tsis tau kevcai raus dej?’ Koj twb kawm phau Vajlugkub tej lus cog tseg txog txojsia ib txhis tsis kawg hauv lub Vaj Kaj Siab lawm. (Luka 23:43; Qhia Tshwm 21:3, 4) Koj twb kawm qhov tseeb txog cov tuag, thiab txog txojkev cia siab tias Vajtswv yuav tsa cov tuag sawv rov qab los. (Laj Lim Tswvyim 9:5; Yauhas 5:28, 29) Tej zaum koj twb mus koom Yehauvas  Cov Timkhawv tej kev sib txoos, thiab koj twb pom lawm tias lawv muaj txojkev ntseeg tseeb. (Yauhas 13:35) Tiamsis qhov uas tseem ceeb tshaj, yog qhov uas koj pib ntaus phoojywg nrog Vajtswv Yehauvas.

3. (1) Yexus tau sam hwm li cas rau nws cov thwjtim? (2) Tibneeg ua kevcai raus dej li cas?

³ Yog tias koj xav teev tiam Vajtswv, koj yuav tsum ua li cas? Yexus qhia nws cov thwjtim tias: “Cia li mus coj txhua haiv neeg los ua kuv li thwjtim, thiab muab lawv ua kevcai raus dej.” (Mathai 28:19) Yexus tus kheej kiag tau ua kevcai raus dej. Thaum Yexus ua kevcai raus dej tsis yog muab dej nchos lossis laub rau saum nws taubhau xwb. Tiamsis yog muab tag nrho nws lub cev raus kiag rau hauv dej.​—Mathai 3:16.

4. Qhov uas koj ua kevcai raus dej qhia tau li cas?

⁴ Yog tias koj xav muaj kev sib raug zoo nrog Vajtswv Yehauvas, koj yuav tsum ua kevcai raus dej. Qhov uas koj ua li ntawd, yuav qhia rau sawvdaws paub tias koj xav teev tiam Vajtswv. Thiab qhia tias koj zoo siab ua raws li Yehauvas lub  siab nyiam. (Ntawv Nkauj 40:7, 8) Tiamsis yog tias koj xav ua kevcai raus dej, muaj tej yam uas koj yuav tsum ua.

5. (1) Yog tias koj xav ua kevcai raus dej, koj yuav tsum xub ua dabtsi? (2) Vim li cas cov Khixatia tej kev sib txoos ho tseem ceeb ua luaj?

⁵ Ua ntej koj yuav ua tau kevcai raus dej, koj yuav tsum xub los paub Vajtswv Yehauvas thiab Yexus Khetos. Qhov uas koj ua tib zoo kawm Vajlugkub tsis tu ncua, yuav pab koj ua li no. (Nyeem Yauhas 17:3.) Tiamsis, tsis yog tas li ntawd xwb. Cov Khixatia xav kawm kom lawv “paub tag nrho Vajtswv lub siab nyiam.” (Khaulauxi 1:9) Yuav kom koj ua tau li ntawd, tseem ceeb heev rau koj mus koom Yehauvas Cov Timkhawv tej kev sib txoos. (Henplais 10:24, 25) Yog tias koj mus koom tej kev sib txoos tsis tu ncua, ces koj yuav paub Vajtswv zoo zuj zus ntxiv.

6. Yuav kom ua tau kevcai raus dej, koj yuav tsum paub phau Vajlugkub zoo npaum li cas?

⁶ Tsis yog koj yuav paub txhua yam hauv phau Vajlugkub ua ntej, koj thiaj ua tau kevcai raus dej. Tus txivneej Ethi-aupia kuj paub mentsis txog Vajtswv Txojlus, tiamsis muaj tej nqe uas nws tsis to taub. Fili thiaj pab nws. (Tubtxib Tes Haujlwm 8:30, 31) Ib yam li ntawd, tseem muaj ntau yam rau koj kawm. Tiamsis, yeej yuav tsis muaj ib hnub uas koj yuav kawm tau txhua yam txog Vajtswv. (Laj Lim Tswvyim 3:11) Ua ntej koj ua kevcai raus dej, koj yuav tsum paub thiab ntseeg tej yam uas tseem ceeb hauv phau Vajlugkub. (Henplais 5:12) Koj yuav tsum paub tej yam xws li, qhov tseeb txog cov tuag, paub tias Vajtswv lub npe tseem ceeb npaum li cas, thiab paub txog nws lub Nceeg Vaj.

7. Txojkev kawm Vajlugkub yuav pab koj li cas?

⁷ Qhov uas peb paub qhov tseeb xwb, zoo tsis txaus. “Yog tsis muaj kev ntseeg yeej ua tsis tau [haum] Vajtswv siab li.” (Henplais 11:6) Phau Vajlugkub qhia tias yav  thaum ub, ib txhia uas nyob hauv lub moos Khaulee tau hnov cov Khixatia txoj xov zoo. Lawv “kuj ntseeg thiab ua kevcai raus dej.” (Tubtxib Tes Haujlwm 18:8) Ib yam li ntawd, txojkev kawm Vajlugkub, yuav pab koj muaj kev ntseeg tias phau Vajlugkub yog Vajtswv Txojlus tiag. Qhov uas koj kawm Vajlugkub, yuav pab koj muaj kev ntseeg rau Vajtswv tej lus cog tseg thiab ntseeg tias Yexus txojkev tuag yeej cawm tau koj.​—Yausua 23:14; Tubtxib Tes Haujlwm 4:12; 2 Timaute 3:16, 17.

8. Dabtsi yuav ua rau koj xav qhia qhov tseeb rau lwm tus?

⁸ Thaum koj txojkev ntseeg loj hlob zuj zus lawm, koj yuav pom tias nyuaj heev rau koj muab qhov tseeb ceev cia, tsis qhia rau lwm tus. (Yelemi 20:9) Koj yeej yuav mob siab qhia lwm tus txog Vajtswv thiab nws lub ntsiab.​—Nyeem 2 Khaulee 4:13.

9, 10. (1) Koj yuav xub qhia qhov tseeb rau leejtwg? (2) Yog tias koj xav nrog Yehauvas Cov Timkhawv mus tshaj tawm txoj xov zoo ua ke, koj yuav tsum ua li cas?

⁹ Thaum koj pib qhia qhov tseeb hauv phau Vajlugkub rau lwm tus, koj yuav tsum ua tib zoo qhia kom txhob siab lawv. Tej zaum koj yuav xub qhia rau koj cov kwvtij neej tsa, cov phoojywg, cov neeg zej zos lossis cov uas nrog koj ua haujlwm. Ntev mus koj yuav xav nrog Yehauvas Cov Timkhawv mus tshaj tawm txoj xov zoo ua ke. Thaum koj npaj siab ua li ntawd, qhia rau tus Timkhawv uas nrog koj kawm Vajlugkub. Yog tias tus uas qhia Vajlugkub rau koj, pom tias zaum no koj mus qhia tau Vajlugkub lawm, ces nws mam li npaj kom neb mus nrog 2 tug txwj laus hauv lub koom txoos tham.

¹⁰ Qhov uas koj mus ntsib cov txwj laus ntawd, yuav pab kom koj paub lawv zoo dua. Lawv yog cov uas tu Vajtswv pab yaj. (Tubtxib Tes Haujlwm 20:28; 1 Petus 5:2, 3) Cov txwj laus yuav tsum pom tias koj coj li cas? Koj yuav  tsum to taub thiab ntseeg tej uas phau Vajlugkub qhia. Koj yuav tsum coj lub neej raws li Vajtswv lub siab nyiam. Koj yuav tsum xav ua Yehauvas ib tug Timkhawv tiag. Yog tias cov txwj laus pom tias koj coj li ntawd, ces lawv mam li qhia rau koj paub tias koj ua tau ib tug tshaj tawm uas tsis tau raus dej. Koj nrog Yehauvas Cov Timkhawv mus qhia tau Vajlugkub lawm.

11. Ua ntej koj yuav mus qhia tau Vajlugkub, tej zaum koj yuav tsum hloov tej yam twg?

¹¹ Tej zaum cov txwj laus ho pom tias tseem muaj tej yam uas koj yuav tau hloov hauv koj lub neej, ua ntej koj mus qhia tau Vajlugkub. Tej zaum muaj tej yam uas koj ua zais ntshis tsis pub leejtwg paub. Yog li ntawd, ua ntej koj ua tau ib tug tshaj tawm uas tsis tau raus dej, koj yuav tsum tso tseg tej kev txhaum loj zoo li kev nkauj kev nraug, kev quav dej quav cawv, thiab quav yeeb quav tshuaj.​—Nyeem 1 Khaulee 6:9, 10; Kalatia 5:19-21.

12. Vim li cas peb yuav tsum ntxeev dua siab tshiab?

¹² Ua ntej koj ua tau kevcai raus dej, muaj dua lwm yam uas koj yuav tsum tau ua. Tus tubtxib Petus hais tias: “Ntxeev dua siab tshiab thiab tig rov los kom thiaj ntxuav tau nej lub txim.” (Tubtxib Tes Haujlwm 3:19) Kev ntxeev dua siab tshiab yog qhov uas koj tu siab rau tej kev txhaum uas koj tau ua tas los lawd. Yog tias ib tug neeg coj lub neej uas tsis huv, tseem ceeb heev rau nws ntxeev dua siab tshiab. Tiamsis kuj tseem ceeb rau tus uas coj zoo, ntxeev dua siab tshiab ib yam thiab. Vim li cas? Vim tias txhua leej txhua tus yog neeg txhaum. Yog li ntawd, txhua tus yuav tsum tau kev zam txim los ntawm Vajtswv. (Loos 3:23; 5:12) Ua ntej koj kawm Vajlugkub, koj tsis tau paub txog tej uas Vajtswv xav kom peb ua, koj thiaj tsis paub coj raws li nws lub siab nyiam. Yog li ntawd, koj yuav tsum ntxeev dua siab tshiab.

13. Qhov uas koj tig rov los yog li cas?

 ¹³ Tom qab koj ntxeev dua siab tshiab, koj yuav tsum ‘tig rov los.’ Qhov uas koj tig rov los yog li cas tiag? Tsis yog koj tu siab rau tej kev txhaum yav tas los xwb. Koj yuav tsum muab koj lub neej qub tso tseg, thiab txiav txim siab tias txij hnub ntawd mus koj yuav ua qhov ncaj. Yog li ntawd, ua ntej koj ua tau kevcai raus dej, koj yuav tsum ua 2 yam no: Ntxeev dua siab tshiab thiab tig rov los.

14. Ua ntej koj ua kevcai raus dej, koj yuav tsum ua dabtsi ntxiv?

¹⁴ Ua ntej koj ua kevcai raus dej, muaj ib yam tseem ceeb heev uas koj yuav tsum tau ua thiab. Koj yuav tsum muab koj tus kheej cob rau Vajtswv Yehauvas.

15, 16. Qhov uas koj muab koj tus kheej cob rau Vajtswv yog li cas tiag, thiab dabtsi yuav ua rau koj xav ua li ntawd?

¹⁵ Koj yuav muab koj tus kheej cob rau Vajtswv Yehauvas li cas? Koj yuav tsum thov Yehauvas tawm hauv lub siab dawb paug tuaj, thiab cog lus rau nws tias koj yuav muab siab npuab nws mus ib txhis. Vim li cas, peb yuav tsum ua li ntawd? Muab ua piv txwv li no: Muaj ib tug tub uas pib nyiam ib tug ntxhais. Ntev mus, thaum nws pom tias tus ntxhais ntawd muaj tus yam ntxwv zoo, nws yuav hajyam nyiam tus ntxhais ntawd. Thaum kawg, nws yeej yuav nug seb tus ntxhais ntawd puas kam yuav nws. Nws paub tias tes haujlwm ua ib tug txiv tsev yeej tsis yoojyim. Tiamsis vim nws hlub tus ntxhais ntawd, nws kuj zoo siab ua tes haujlwm ntawd.

¹⁶ Thaum koj paub thiab hlub Yehauvas lawm, koj yeej yuav teev tiam nws. Koj yuav tsis cia ib yam dabtsi txwv koj kiag li. Txhua tus uas xav raws Vajtswv tus Tub Yexus Khetos qab, yuav tsum “tswj nws tus kheej.” (Malakau 8:34) Peb yuav tswj peb tus kheej li cas? Peb yuav tsum muab Vajtswv tso ua ntej ntawm peb tus kheej thiab mloog nws  lus kom kawg siab. Peb yeej yuav tsis cia ib yam dabtsi uas peb ntshaw ua rau peb tsis mloog Vajtswv lus. Yog li ntawd, ua ntej koj yuav ua tau kevcai raus dej, lub hom phiaj uas tseem ceeb tshaj hauv koj lub neej, yuav tsum yog qhov uas koj ua raws li Vajtswv Yehauvas lub siab nyiam.​—Nyeem 1 Petus 4:2.

17. Vim li cas ib txhia tsis kam muab lawv tus kheej cob rau Vajtswv?

¹⁷ Muaj ib txhia tsis kam muab lawv tus kheej cob rau Yehauvas rau qhov lawv ntshai tsam Vajtswv yuav suav txim rau lawv, yog tias lawv ua tsis tau raws li lawv cog lus tseg. Lawv xav tias lawv yuav ua yuam kev thiab ua rau Yehauvas tu siab. Yog li ntawd, lawv xav tias zoo dua yog lawv tsis txhob muab lawv tus kheej cob rau Vajtswv.

18. Dabtsi yuav ua rau koj muab koj tus kheej cob rau Yehauvas?

¹⁸ Thaum koj muaj kev hlub rau Yehauvas, koj yuav xav muab koj tus kheej cob rau nws. Thiab koj yuav ua npaum li koj ua tau, raws li koj cog lus tseg. (Laj Lim Tswvyim 5:4) Tom qab koj muab koj tus kheej cob rau Vajtswv lawm, koj yeej yuav xav “ua lub neej raws li uas tsim nyog ua rau [Yehauvas], thiab txaus nws lub siab txhua yam.” (Khaulauxi 1:10) Qhov uas koj ua raws li Vajtswv lub siab nyiam tsis yog ib lub nra hnyav, rau qhov koj hlub Vajtswv. Koj yuav xav ib yam li tus tubtxib Yauhas uas sau tias: “Qhov uas peb hlub Vajtswv yog li no, yog qhov uas peb tuav rawv nws tej lus nkaw. Nws tej lus nkaw tsis ua nra hnyav rau peb.”​—1 Yauhas 5:3.

19. Vim li cas koj tsis tas ntshai muab koj tus kheej cob rau Vajtswv?

¹⁹ Tsis yog koj yuav ua tau ib puas tsav yam zoo kawg nkaus, koj mam li muab koj tus kheej cob rau Vajtswv. Yehauvas paub tias muaj tej yam uas koj ua tsis tau, thiab nws yeej tsis hais kom koj ua tshaj li koj ua tau. (Ntawv Nkauj 103:14) Vajtswv xav kom koj tau zoo xwb. Nws yeej yuav  txhawb thiab pab koj. (Nyeem Yaxaya 41:10.) Koj yeej cia siab tau tias yog koj tso siab plhuav rau Yehauvas, “nws yuav pub koj taug txojkev ncaj.”​—Paj Lug 3:5, 6.

20. Vim li cas qhov uas koj muab koj tus kheej cob rau Vajtswv tsis yog ib yam uas koj ua twjywm hauv nruab siab xwb?

²⁰ Ua tib zoo xav txog tej uas peb nyuam qhuav kawm tas los no. Qhov ntawd yuav pab tau koj muab koj tus kheej cob rau Yehauvas. Txhua tus uas hlub Vajtswv tiag yuav tsum “lees” li ntawd rau sawvdaws, nws thiaj dim. (Loos 10:10) Koj yuav lees li cas?

21, 22. Koj yuav “lees” li cas, kom sawvdaws paub tias koj muaj kev ntseeg?

 ²¹ Qhia tus dhia haujlwm ntawm pab txwj laus hauv koj lub koom txoos tias koj xav ua kevcai raus dej. Tus txwj laus ntawd mam li npaj kom lwm cov txwj laus tuaj saib koj. Ces lawv mam li nug koj txog tej nqe Vajlugkub tseem ceeb. Yog cov txwj laus ntawd pom tias koj ua tau kevcai raus dej lawm, ces lawv mam qhia rau koj paub. a  Hnub uas koj ua kevcai raus dej, yuav muaj ib tug muab lus qhuab qhia txog lub ntsiab ntawm txoj kevcai raus dej. Ces tus hais lus qhuab qhia yuav caw tag nrho cov uas yuav ua kevcai raus dej los teb 2 lo lus nug. Qhov uas lawv teb li ntawd yog “lees” rau sawvdaws tias lawv muaj kev ntseeg.

²² Qhov uas koj ua kevcai raus dej qhia tau li cas? Qhia rau sawvdaws paub tias koj twb muab koj tus kheej cob rau Vajtswv thiab zaum no koj yog Yehauvas ib tug Timkhawv lawm. Cov uas ua kevcai raus dej yuav tsum raus tag nrho lub cev rau hauv dej, kom sawvdaws pom tias lawv muab lawv tus kheej cob rau Yehauvas.

23. Qhov uas tibneeg ua kevcai raus dej hauv Leej Txiv, Leej Tub thiab lub hwj huam dawb huv lub npe, yog txhais li cas tiag?

²³ Yexus hais tias nws cov thwjtim yuav ua kevcai raus dej hauv “leej Txiv, leej tub thiab [“lub hwj huam dawb huv,” NW] lub npe.” (Mathai 28:19) Qhov ntawd txhais li cas? Txhais tias tus uas ua kevcai raus dej yuav tsum xam pom Vajtswv Yehauvas thiab Yexus Khetos lub hwjchim. (Ntawv Nkauj 83:18; Mathai 28:18) Thiab nws yuav tsum pom tias Vajtswv siv nws lub hwj huam dawb huv li cas.​—Kalatia 5:22, 23; 2 Petus 1:21.

24, 25. (1) Kevcai raus dej piv txwv txog dabtsi? (2) Peb yuav tsum teb lo lus nug twg?

²⁴ Tiamsis thaum ib tug neeg ua kevcai raus dej, tsis yog nws lam da dej xwb. Tiamsis kevcai raus dej piv txwv txog ib yam tseem ceeb heev. Thaum muab tus neeg raus rau hauv dej piv txwv tias nws lub neej qub tuag lawm. Tiamsis thaum tsa nws sawv hauv dej rov los, qhov ntawd piv txwv tias nws ciaj los ua lub neej raws li Vajtswv lub siab nyiam. Nco ntsoov tias, koj muab koj tus kheej cob rau  Vajtswv Yehauvas kiag. Tsis yog koj cob rau ib txoj haujlwm, rau tej tibneeg, lossis rau ib lub koom haum. Qhov uas koj muab koj tus kheej cob rau Yehauvas thiab ua kevcai raus dej, yog qhov uas koj pib txojkev phoojywg zoo heev nrog Yehauvas.​—Ntawv Nkauj 25:14.

²⁵ Tsis yog yus ua kevcai raus dej ces yus yuav dim xwb xwb li. Tus tubtxib Povlauj tau sau tias: “Nimno nej yuav tsum ntshai tshee hnyo ua lub neej phim nej txojkev dim kom tiav.” (Filipi 2:12) Thaum yus ua kevcai raus dej, yus nyuam qhuav pib taug txojkev mus tau kev cawm dim xwb. Yog li ntawd, peb yuav tsum xav txog lo lus nug no, Koj yuav ua li cas koj thiaj nyob ruaj hauv Vajtswv txojkev hlub? Tshooj kawg nkaus yuav teb lo lus nug no.